أخوكم طالب رأيكم: هل استبدل لانسر 99 بميجان2006

أخوكم حيران ومش عارف يقرر شوية تغرينى الميجان بشياكتها وأدائها و شوية يخوفنى فرق اسعار الصيانة
المو ضوع بالتفصيل كما يلى:
عربيتى لانسر 99 أتوماتيك بحالة ممتازة و لا تعانى من أى مشاكل بخلاف الحكات الظريفة اللى بيصبح عليا بيها جيرانى الأعزاء كل يوم تقريبا و الاكصدام الأمامى مكسور و عاملة 128 ألف كيلومتر
الميجان بتاعت واحد صاحبى هى الموديل الل فيه كل حاجة و عاملة تقريبا 45 أف كيلومتر
مع الميجان ها اكسب
1- شياكة
2- وسع
3- موتور 1600
4- فتيس ستبترونيك
5- أمان (6 ايرباجز)
6- موديل حديث و عدد كيلومترات أقل بكتير

مميزات لانسر:
1- ها أوفر الفرق
2- صيانة أوفر و أسهل
3- ها أوفر أجرة الجراج ( اصلى مش ها استحمل اركن الميجان فى الشارع)

يللا يا جدعان قولوا رأيكم وأنهى كفة ترجح

لو تقدر على مصارفها يبقى اتوكل على الله و دلع نفسك :D :D :D

أنا كان عندى قبل الميجان لانسر 98
من الأخر الميجان حاجة تانية خالص و حتحس بفرق رهيب فى الفخامة و السواقة
من الأخر لو تقدر على مصاريف الصيانة اللى حتلاقيها فى اللينك دا توكل على الله
http://www.nilemotors.net/Forum/viewtopic.php?t=2899

بالضبط لو تقدر علي صيانتها و قطع غيارها يبقي توكل علي الله بس اسأل كويس علي قطع غيارها و شوف اللينك بتاع شاركي باشا

طبعا اكييييييييييييييد لو حتقدر على المصاريف

توكل على الله

نصيحتى ليك اشترى الميجان طبعا لكن بشرط تأمن عليها فـــورا من غير كلام

اقتباس:

---

المشاركة الأصلية كتبت بواسطة Hossam Hassan

لو تقدر على مصارفها يبقى اتوكل على الله و دلع نفسك :D :D :D

---

+1

اقتباس:

---

المشاركة الأصلية كتبت بواسطة sabbagh

أخوكم حيران ومش عارف يقرر شوية تغرينى الميجان بشياكتها وأدائها و شوية يخوفنى فرق اسعار الصيانة
المو ضوع بالتفصيل كما يلى:
عربيتى لانسر 99 أتوماتيك بحالة ممتازة و لا تعانى من أى مشاكل بخلاف الحكات الظريفة اللى بيصبح عليا بيها جيرانى الأعزاء كل يوم تقريبا و الاكصدام الأمامى مكسور و عاملة 128 ألف كيلومتر

---

ممكن صور لسيارتك ؟

يا اخي و تهون عليك عشرة اللانسر طالما مريحاك ليه ترميها خصوصا انك بتشكر فيها , راجع نسك ووفر الفرق في بند تاني اكثر اهمية .

اقتباس:

---

المشاركة الأصلية كتبت بواسطة Hossam Hassan

لو تقدر على مصارفها يبقى اتوكل على الله و دلع نفسك :D :D :D

---

+100

الفرق شاسع بس مصاريفها عالية فكر فى حاجة تانية بسعر الميجان واخيارات كتير وكويسة قوى

واضح انه شبه اجماع على الميجان
بأمر الله المصاريف اقدر عليها بس برضة لازم افكر شوية عشان ما تبقاش فلوس فى الهوا وبصراحة حاسس ان الفرق يستاهل
بس انا كنت متوقع عاصفة من محبى لانسر تهجم عليا و مفيش ولا لانسراوى رد

شكر خاص للاخ sharky عشان هو الوحيد حتى الان اللى مجرب ال2 و اكيد تجربته هتكون مرجع ليا فى اتخاذ القرار

اقتباس:

---

ممكن صور لسيارتك ؟

---

انا مش مصورها بس لو قررت اعرضها ان شاء الله اصورها و احط الصور

اقتباس:

---

يا اخي و تهون عليك عشرة اللانسر طالما مريحاك ليه ترميها خصوصا انك بتشكر فيها , راجع نسك ووفر الفرق في بند تاني اكثر اهمية

---

اهو ده الكلام اللى بيتقال لى برضوا
بس فى نقطة عجبانى قوى فى الميجان و هى الأمان و خصوصا عشان الكتكيت حمزة و صفية
طبعا القدر بيد الله وحده بس اخذا بالأسباب الميجان اكثر أمانا بكتير
ده طبعا غير باقى المميزات اللى قلتها

و بعدين يا أخى مين قال انى ها ارمى لانسر. غالبا ها ياخدها واحد صاحبى برضه عارف قيمتها و قد ايه انا كنت مواظب على صيانتها

اقتباس:

---

الفرق شاسع بس مصاريفها عالية فكر فى حاجة تانية بسعر الميجان واخيارات كتير وكويسة قوى

---

انا اصلا مش با افكر اغير ولا كنت با ادور على عربية. و الحمد لله زى ما وصفت عربيتى ممتازة
هو صاحبى ده اللى عايز يغير عشان هو بيغير العربية كل سنتين أو سنتين ونص بالكتير

يعنى الميجان اللى جت قصادى من غير بحث وطبعا العربية فابرقة بالكامل

نصيحة لوجه الله تعالى أنا لا أوافقك الرأي لأسباب عدة :-

1- كونك تقدر على مصاريفها ده كلام إنت بتقوله دلوقتي لكن مش هتحس بيه إلا لما تبدأ تدفع .
2- الانسر عربية بياعه ممكن تفكر تبيع الأول وبعدين تقرر تجيب زيرو على قد فلوسك أو مستعمل حتى لو ميجان تخليك على الحديدة
3- فكر إنك برضهخ أكيد هتنوي تغير وشاعتها هتلف حوالين نفسك علشان تعرف تبيعها وكان فيه موضوع هنا عن واحد برضه كان بيبيع الميجان وتقريبا خسر فيها حوالي 14 ألف جنيه ( مبلغ وقدره يعني ) .
4- أنا غير معترض على الميجان كسيارة بس لما ركبتها وجربتها محستش إنها تستاهل التهويل المعمول حواليها ده يعني ساعتاها برضه ركبت وجربت السيفك الجديدة فرق بشع وشااااااااااااااااااااااا اااااااااااااااسع بين الإثنين السيفك حاجة تانية خالص .
5- لو أنا مكانك هأعمل إيه :-
لو على إفتراض إن معايا فرق فلوس كويس هبيع الانسر وأجيب السيفك
لو ممعايش الفرق الكبير ده هدور على حاجة مستعملة بس تكون كسر زيرو وأكبر وأحسن من الانسر لكن عمري ما هفكر في الميجان .

تحياتي .

اقتباس:

---

لو على إفتراض إن معايا فرق فلوس كويس هبيع الانسر وأجيب السيفك
لو ممعايش الفرق الكبير ده هدور على حاجة مستعملة بس تكون كسر زيرو وأكبر وأحسن من الانسر لكن عمري ما هفكر في الميجان .

---

اسلام باشا عميد الانسراوية :-)
يا باشا السيفك فيها فرق سعر اكتر من 80 ألف عن عربيتى و الميجان اللى با احكى عليها حاجة بتاع 25 ألف فرق
انا معاك ان سيفيك ممكن تكون احسن بس مش سكتى دلوقت انى اجيب زيرو
ممكن تقول لى ايه الحاجة المستعملة كسر الزيرو و اكبر من لانسر و مصاريفها حنينة و فى نفس مستوى الميجان؟ وفرق سعرها عن عربيتى ها يكون كام؟

ملحوظة مهمة:
انا لا مع لانسر و لا ميجان لحد دلوقتى
انا با ارد عشان افتح كلام و اخد من اخواتى افكار تساعدنى اخد قرار صح

ما هو اصل أنا مش عارف إنت عايز تغير ليه ؟ لأانك قولت إنه ما كانش في دماغك إلا لما الميجان جت قدامك !!!

طيب ما شفتش مثلا أوكتافيا أو سيفك 2006 ؟

ابو حمزة
سلام عليكم
النطة دي جامدة حبتين عليك الفرق مش كبير في الفلوس لكن كتير في المصروف
جراج وصيانة توكيل (مفيش وجدي بقي) وبرستيج وما يتتبعة حتي السايس لازم تعاملة معاملة انك راكب ميجان
هاتلاقي العربية بتفرض عليك نمط واسلوب حياة
مش هاتستحمل تسيبها محكوكة ولا مخبوطة خبطة صغيرة
الامان على الله واحنا لازم ناخد بالاسباب بس كمان ما تروحش تامن وتاخد اثم التامين
مانت عارف اللي فيها
ربنا يكرمك ويكرم اولادك بس لو بتاعتك بتتكلم في الخمسينات وهاتحط 25 في اختيارت كتير في كسر الزيرو عشان انت فلوسك كاش مش تقسيط فالاختيارات كتير قدامك
ال 80 يجبولك حاجات حلوة كتير في مصر

ربنا يوفقك

اخى كريم
و عليكم السلام و رحمة الله و بركاته
كلامك موزون و يدخل الدماغ و الكلام المنطقى ده هو اللى بجد يساعد فى اتخاذ القرار
بس يعنى الميجان مش فظيعة قوى لدرجة تغيير نمط حياة بحاله

كمان انا مش با اجيب عربية مستعملة الا من حد اعرفه كويس (ال127 كانت بتاعة ابن خالى و لانسر بتاعة جارتنا و الميجان بتاعة صاحبى)
فالمقارنة مش بين الميجان و باقى اللى فى السوق
المقارنة بين عربيتى بحالتها و مميزاتها و الميجان بتاعت صاحبى بحالتها و مصاريفها و سعرها اللى كتير قالوا عليه لقطة

أنا مع الميجان أنا عملت بالانسر 400 كيلو و عملت بالميجان 400 (تبع التأمين)
المهم الفرق حقيقة شاسع في كل حاجة اللانسر عربية جميلة لكن لا تقارن بالميجان أنا هنا هكلمك عن مميزات العرض بتاع حضرتك
1-السعر شكله لقطة مثلا اللانسر بتتباع ب80 ألف و تزود عليها 25 ألف يبقى 105 سعر كويس جدا بالمواصفات إلي بتقول عليها
2- اسلام قالك إن في واحد في الموقع ( محمود) خسر في الميجان 14 ألف ده لإنه كان جايبها جديدة أكيد حضرتك أما تفكر تبيع العربية مش هتخسر كل ده( إن شاء الله)
3- إنت هتشتريها من واحد صاحبك يعني ثقة
4-الفرق بين الموديل إاحنا بنتكلم عن 99 أو 2006
5- حكاية إنك هتتفع للجراج ده مؤقت حتى لو جبت المرسيدس s-class أي عربية بتخبو مع الزمن و بتبقى عادي تلاقيها مخدوشة ( كلام بجد)
6-الفرق العملي بين الميجان والانسر ( واحد مجرب الاتنين) كبيير مع العلم إني ركبت لانسر2006و ميجان2006 فما بالك بين لانسر99 وميجان2006
7-أنا هضم صوتي مع صوت شاركي و أقولك الميجان حاجة تانية و حرام تتقارن باللانسر
و ربنا الموفق

أخ "محمدايهاب"
متفق معاك تماما بس انت اغفلت تكاليف الصيانة من المعادلة
وللا ايه رايك

اقتباس:

---

اسلام قالك إن في واحد في الموقع ( محمود) خسر في الميجان 14 ألف ده لإنه كان جايبها جديدة أكيد حضرتك أما تفكر تبيع العربية مش هتخسر كل ده( إن شاء الله)

---

السلام عليكم،

أنا متفق مع حضرتك ان التغيير للميجان جيد بس للعلم الأستاذ محمود كان جايب الميجان مستعملة مش زيرو.
شكرا.

اقتباس:

---

بس للعلم الأستاذ محمود كان جايب الميجان مستعملة مش زيرو.
شكرا.

---

دكتور محمود كان شارى السيارة أصلا غالية و على ما أطن إنه كان جايبها بـ115.000 الف

اقتباس:

---

أخ "محمدايهاب"
متفق معاك تماما بس انت اغفلت تكاليف الصيانة من المعادلة
وللا ايه رايك

---

أنا كلمت حضرتك عن مميزات العرض فقط مش العيوب

اقتباس:

---

السلام عليكم،

أنا متفق مع حضرتك ان التغيير للميجان جيد بس للعلم الأستاذ محمود كان جايب الميجان مستعملة مش زيرو.
شكرا.

---

شكرا على التصحيح

اقتباس:

---

دكتور محمود كان شارى السيارة أصلا غالية و على ما أطن إنه كان جايبها بـ115.000 الف

---

طب مالها النيسان كسر أو لانسر كسر زيرو - صدقنى هتبقى صفقة كويسة

اشتريتها ب 111 الف لأن سعرها كان فى المتوسط ده فى وقتها أواخر اغسطس فبل نزول ال 2008
وبعتها ب شهرين استعمال بالتبديل بما يوازى 97 الف
قبل شراءك للميجان بجمالها وحلاوتها وأمانها تأكد انك هتخسر فى سعر اعادة البيع حتى لو كان سعرها لقطة قدامك الان
فكر فى لانسر رياضية 2006 أو 2007 قبل قرار التغيير
ولعلمك من ساعة ما غيرت عربيتى القديمة ( كيا برايد موديل 97 من الزيرو ) بعد عشرة 7 سنوات وأنا فى دوامة السيارات ومش مستريح وخسرت أكثر من37 الف جنيه
تغيير السيارات بالذات لو عشرة معاك مش كويس
وشكرا