بلد بايظه ونظام عقيم لكن المهم قانون المرور
ياجماعه انا عارف انى موضوعى مش جديد وكلنا قاسينا منه لكن بجد اللى حصل لى الاسبوع ده استحاله يحصل لاى بنى ادم فى دوله محترمه ليها قانون ونظام
اللى حصل انه ميعاد تجديد السياره الماتريكس كان الاسبوع ده فقلت بما انى تبع مرور السلام يبقى اخد حبوب مهدئ
واعمل حسابى على 3 ايام على الاقل للتجديد
المهم اول يوم للمخالفات قدمت الرخصه 9.3 اخدتها 1.45 وطبعا شمس نار ومافيش كراسى وناس لا اول ليهم ولا اخر
وكلهم على شباك واحد 50×50سم واللى مش عاجبه يخبط دماغه ى اجدع عمود
طبعا روحت قلت اجى تانى يوم ادفع التأمين والضريبه وطبعا طابور طويل وقله ادب وهمجيه وضاع اليوم وروحت
ثالت يوم قلت افحص واذا قدرت هقدم الورق واخد الرخصه ( طبعا احلام ) دخلت افحص لقيت مولد ماله صاحب ملاكى على تاكسى على موتسيكلات على ميكروباصات وظباط بتشتم وناس فوق بعضها وعسكرى البصمه ولا مدير الوحده
تجرى وراه وهتبوس ايده علشان يتعطف ويتكرم وياخد البصمه ومهندسين مالهمش هم غير لم فلوس من الناس
طبعا على مافحصت كان بقت الساعه 12.3 كان مؤكد انى خلاص مش هقدر اعمل حاجه تانى وروحت
امبارح بقى كانت قمه المسخره واللى عاروز يعرف مصر ونظامها لازم يجى يشوف امبارح
انا معايا كل الورق مظبوط ومعايا النمر القديمه كنت قدام الشباك الساعه 8.55 الموظف اخد الورق وطلب دمغه جبتها
وراجع الورق وقالى انتظر هينادوا عليكى تستلم الرخصه الساعه كام 9.05
من الوقت ده الى الساعه 4.15 فى الشمس ومافيش كراسى تكفى الناس واناواقف على رجلى اكتر من 7.3 ساعات
فى صيام وحرق دم واسطه تاخد رخصها وهى قاعده فى دقايق والناس وقف
مدير الوحده ومدير المجمع ولا على بالهم الساعه 3 اخدوا بعضهم وروحوا وسابوا الناس اكتر من 250 واحد ومنهم سيدات والله العظيم كانوا بيعيطوا بالدموع
اخدوا الورق منا والرخص والنمر ولا عارفين نروح ولا عارفين نسترد الورق والنمر القديمه ولا اخدنا الجديد ولا حد مهتم حتى يرد يقولنا هنعمل ايه هنروح ازاى بدون رخص ونمر فكرت اروح اعمل محضر فى القسم باللى حصل لكن قلت لو واحد امين شرطه ولا ظابط رخم وحجز العربيه ( اللى مش بقى فيها لا رخص ولا نمر ولاورقه تقولى انها ملكى) فقلت اتنيل واسكت
السااعه 4.15 الناس استلمت الرخص ولسه هيستلموا النمر ويروحوا لعسكرى علشان يركبها من 9 الصبح
متخيلين الناس كانت ازاى
متخيلين كام واحد اتنهى للابد ( وانا منهم) اى انتماء للبلد دى متخلين كام دعوه على الحكومه واللى ماسكين البلد كام شتيمه وكام خناقه وسب امبارح
نسيت اقولكم انى وانا برخص سالت على الشنطه والمثلث قالوا خلاص ابو بلاش اتلغى وحضرتك تشترى من اى كشك جوه المرور الاتنين يااما من ابو 55 او ابو 65
صدقونى انا بكتب دلوقتى ومش قادر اكمل من كتر تعب جسمى ونفسيتى وامبارح
اقل مايوصف انه لو احنا حيوانات كان يمكن يبقى لينا تمن فى البلد دى
واقل شئ يتعمل انه ماعدت هحترم لا قانون ولا نظام طالما فى جيبى اللى هدفعه
واتمنى الاخوه اللى بيتكلموا على اننا لازم نحترم القانون ومنركبش شئ مخالف على العربيه
يوفروا كلامهم لان الكلام ده معدش ليه قيمه فى بلد انت اصلا مالكش فيها قيمه
وسلم لى على قانون المرور الجديد