الموضوع: فرش سياره (عاجل)

المشاركة الأصلية كتبت بواسطة dr.nemo

ايوة ياريت تحطلنا صورة
او تقلنا فين في شبين
لاني مش لاقي ولا سروجي كويس لحد دلوقتي

كل اللي اعرفه ان بتوع طنطا هم الافضل

أنا الحمد لله ربنا وفقنى فى سروجى عشرة على عشرة فى شبين وهو من أسطوات طنطا على فكرة ..
اسمه الاسطى أحمد رشاد ، هتلاقيه بالظبط قدام مصنع التلج ،الناحية التانية من الشارع قدام مصنع التلج فيه حتة واسعة كده مش مبنية هو جوه على اليمين جنب واحد بتاع قطن ، بس خللى بالك عشان فيه سروجى تانى على الشمال ده مالكش دعوة بيه.

روح وهتدعيلى، الفرش اللى عمله لى طلع ممتاز ..
قول له من طرف د. عزت بتاع الرينو اللى عمل عند الأسبوع اللى فات

وبالنسبة للصور فدى مداخلة سابقة ليا بتشرح الفرش والأسعار

المشاركة الأصلية كتبت بواسطة egyzizo

الفرش يا جماعة طلع تحفــــة ..
أنا كنت حاطط ايدى على قلبى ، خصوصاً ان السروجى أخد منى فقط الخطوط العامة فقط واتصرف بعد كده من دماغه ، بس الحقيقة طلع فنان ، وكويس انى سبته يتصرف ..
احنا كنا متفقين على فرش أسود فى رصاصى ، قام راح لف على أسود يكون فيرانى غامق مش أسود غطيس علشان يبقى نفس لون تابلوه العربية ، وكمان التحبيبة اللى فيه هى نفس التحبيبة اللى فى التابلوه ، فتحس ان الفرش فابريكه لأن هو والتابلوه حاجة واحدة ..
ده غير الاتقان فى العمل وعمل غرزة بارزة كده على الحواف مديه الفرش فخامة ..
وعمل فرش جلد كامل للأرضية ميه ميه ، وكذلك عمل فرش للشنطة فيه تجزيعة لطيفة. مع عمل حواف مرتفعة حسب طلبى.

وبالنسبة للأسعار فالسعر شامل كل حاجة (فرش وأرضية وشنطة) كان ألف جنيه فقط لا غير ، وأنا شايف ان ده سعر ممتاز على حسب ما شفت الأسعار فى القاهرة والأسكندرية.
أنا رحتله يوم التلات ، فك الكراسى والكنبة عشان يشتغل فيهم براحته ، وحطلى كرسى بتاع عربية 128 علشان أروح العربية
وجيت له بالعربية الأربعاء صباحاً عمل فرش الأرضية والشنطة وركب الكراسى من الساعة 11 صباحاً إلى الساعة 2 ظهراً.

مش هاعرف أوصف .. وهاسيبكم مع الصور ، بس تأكدوا ان الحقيقة أحلى بكتييييير ....

سبحان الله
انا كنت بروح للي في الحتة الواسعة
الحقيقة تعامله مش كويس خالص
ومرتحتش له خالص

ابقى اعدي على الراجل ده

وعلى فكرة الفرش بتاع عربتك ما شاء الله عليه جميل جدا
والراجل شغله نضيف

ربنا يباركلك فيها

بص يا دكتور نيمو ، هو بصراحة شغلة تمام ..
أما بالنسبة للتعامل فالأسطى أحمد دايماً بيبدأ بجمل من طراز (أنا مش باشكر فى نفسي) و (من تواضع لله رفعه) وبعد كده بتلاقى الكلام بيختلف تماماً ويحسسك انه أسطى الأسطوات .. يعنى هو قال لى ان كل اسطوات طنطا تلامذته ، وان مكنة الغرز البارزة اللى عنده من سنة 1920 ومافيش منها فى مصر ، وزعل لما قلت له واحد صاحبى بيعمل فى مصر وهاشوف شغلك واللا شغل مصر ، وحسسنى انى شتمته ..
ما علينا من ده كله ، جايز يكون الراجل عنده حق وجايز ماعندوش ، احنا مش هنناسبه وهو يوم وكل واحد بيروح لحاله واللى بيبقى شغله مش كلامه .. وطالما الشغل كويس يبقى انت الكسبان.
وبصراحة ، الغرزة البارزة اللى هو عملها دى حاجة بتميزه وبتدى فخامة للفرش، وماشفتهاش فى ولا عربية من اللى عاملين فى مصر واسكندرية.

الخلاصة ، احقاقاً للحق يعنى ، أى حد عايز شغل عالى هابعته للأسطى أحمد رشاد ..

بس خللى بالك الأسطى أحمد هو المحل اللى جوه على اليمين جنب بتاع القطن
لأنك أول ماتخش الوسعاية هتلاقى سروجى واضح على الشمال ماعرفش عنه حاجة وماجربتوش.

وياريت ما تتأخرش فى عمل عربيتك علشان ماتتبهدلش وخصوصاً موكيت الأرضيات.

لأ العربية مافيهاش اير باجز فى الكراسى ، وأعتقد ان لو فيه مش هاينفع الفرش يركب، بس ممكن برضه تستفسر منه.
وانت بتختار الألوان اللى انت عايزها والتفصيلة اللى تحبها وممكن تجيب له صورة لو عايز الفرش بشكل محدد عاجبك وهو بيطلع اللى انت عايزه.
وانت بتحدد معاه مستوى الجلد اللى انت عايزه (تايلاندى ، أمريكى ، إلخ) وبناء على كده بيديك سعر شامل كل حاجة.

المشاركة الأصلية كتبت بواسطة egyzizo

بص يا دكتور نيمو ، هو بصراحة شغلة تمام ..
أما بالنسبة للتعامل فالأسطى أحمد دايماً بيبدأ بجمل من طراز (أنا مش باشكر فى نفسي) و (من تواضع لله رفعه) وبعد كده بتلاقى الكلام بيختلف تماماً ويحسسك انه أسطى الأسطوات .. يعنى هو قال لى ان كل اسطوات طنطا تلامذته ، وان مكنة الغرز البارزة اللى عنده من سنة 1920 ومافيش منها فى مصر ، وزعل لما قلت له واحد صاحبى بيعمل فى مصر وهاشوف شغلك واللا شغل مصر ، وحسسنى انى شتمته ..
ما علينا من ده كله ، جايز يكون الراجل عنده حق وجايز ماعندوش ، احنا مش هنناسبه وهو يوم وكل واحد بيروح لحاله واللى بيبقى شغله مش كلامه .. وطالما الشغل كويس يبقى انت الكسبان.
وبصراحة ، الغرزة البارزة اللى هو عملها دى حاجة بتميزه وبتدى فخامة للفرش، وماشفتهاش فى ولا عربية من اللى عاملين فى مصر واسكندرية.

الخلاصة ، احقاقاً للحق يعنى ، أى حد عايز شغل عالى هابعته للأسطى أحمد رشاد ..

بس خللى بالك الأسطى أحمد هو المحل اللى جوه على اليمين جنب بتاع القطن
لأنك أول ماتخش الوسعاية هتلاقى سروجى واضح على الشمال ماعرفش عنه حاجة وماجربتوش.

وياريت ما تتأخرش فى عمل عربيتك علشان ماتتبهدلش وخصوصاً موكيت الأرضيات.

انا لسه مستلمتش السيراتو
ان شاء الله اول ما استلم هروح له

والخياطة البارزة دي جميلة وشيك جدا
وموجودة في السيراتو في الابواب والدركسيون وفي الكراسي الجلد في الهاي لاين وبلون أحمر
مخليه شكلها تحفة من جوة