المشاركة الأصلية كتبت بواسطة cairo2005
انا بشوف ومتقوليش
والله العظيم البعض طبعا وليس الاغلبية من المستشارين تحس انهم قمة البلطجة اكتر من البلطجية وهقول مواقف بسيطة جدا على عينة من الاشكال دي:
1- واحد من البهوات في محطة قطار الجيزة مسك عامل الركن في الباركينج مسح بيه الارض علشان ممسحش العربية للبيه
2- واحد تاني مالقاش حجز من الجيزة لبني سويف او المنيا مش فاكر (بيركبوا درجة اولي مكيفة لاي مكان مجاني ) شخط في الراجل بتاع شباك التذاكر وخلاه حجز له تذكرة اسوان لان تذاكر اسوان هي الىل كانت موجودة (طبعا ما هو لو هيدفع مليم من تمنها مكانش عمل كدة)
3- موقف تاني اغرب من الخيال واقسم بالله اني كنت طرف فيه
في عربية رقم 1 اللى هي الدرجة الاولى مكيف في قطار الصعيد بتاع الساعة 7 وتلت البنت والعامل بتوع البوفيه اللى بيلفوا القطار بالعربية بتاعة البوفيه خلصوا العربية الاولى ووقفوا بين الباب بتاع العربية والباب اللىل بعده في الممر وواحد محترم لابس بدلة وجرافتة ماسك موبايل نوكيا حديث وعمال يصور البنت من غير ما تاخد بالها بالموبايل بتاعه صور وافلام
واحد من الركاب شافه فسأل واحد تانى شكله وكيل نيابة او قاضي صغير لو مسكته فيه مشكلة قاله لا ده يتعمله محضر (هتقولي عرف ازاي انه وكيل نيابة او قاضي صغير هقولك لو ركبت القطار ده بالذات مرات متتالية هتعرف القضاة ودكاترة الجامعة كويس جدا)
صاحبنا راح الاول للبنت وسالها هل هي موافقة ان حد يصورها البنت اترعبت وقالت لا طبعا قالها طيب لو حد بيصورك ومسكته هتعملي ايه قالت هخلي ريس القطار يسلمه في اول محطة
صاحبنا راح للراجل اللى يبصور وقاله عيب كدة اللى بتعمله امسح الصور والافلام
البجاحة بقة انه رفض فصاحبنا على صوته ونده البنت جت وزعقت للراجل وقالت انا هروح اجيب لك ريس القطار
قام واحد تاني من الركاب بردو شكله محترم وببدلة وجرافتة وراح لصاحبنا اللى كان بيشد مع المصور وقاله خلاص اتفضل استريح وانا هخلص كل حاجة والصور والفيديو هيتمسحوا وفضل واقف جنب ابو موبايل
على ما البنت جابت ريس القطار كان القطار وصل لمحطة معينة مش هقولها علشان لا اسيء لناس منها او احدد بالتقريب الشخص المصور المنيل
الراجل ريس القطار جاي للراجل ابو موبايل اللى كان بيصور البنت لقينا التانى اللى واقف جنبه بيقول لريس القطار والبنت الراجل ده رئيس المحكمة هنا في المحافظة دي ولو فتحتوا بقكم بكلمة هتتحبسوا حالا
صاحبنا اللى كان متحمس صدم جدا ونزل من القطار مش مصدق نفسه
الاظرف ان بعدها بكام يوم اتقابلوا الاتنين في نفس القطار المحترم رئيس المحكمة حاول يجر شكل صاحبنا وتعمد يمد رجله ادامه وهو معدي بين الكراسي علشان يوقعه وتحصل مشكلة لولا ان صاحبنا انتبه وتفاداه
بذمتكم مش كل عمل فيه ناس محترمة وناس تانية الله يهديها تسيء لعملها وتستغل سلطاتها اسوا استغلال ؟