الموضوع: وجهة نظر

انا مؤيد فكرة عرض وجهات النظر و صاحب الموضوع او المشكلة يختار الحل المناسب ليه

اللى بتكلم علية هو وضع كل ما ليس له اساس علمى تحت بند وجهة النظر

يعنى مثلا لو واحد عندة صوت فى الفرامل... و انت مثلا قولت ان دة ممكن يرجع لنوعية التيل... و انا قولت انة ممكن يكون بسبب اعوجاج فى صاجة الحماية اللى ورا الطنبورة...

دى وجهات نظر فى تحليل المشكلة و محاولة الوصول للحل و صاحب المشكلة عندة الاختيار هل يغير التيل او يراجع على الصاجة... و ممكن نجادل انا وانت للصبح فى اى وجهة نظر هى الاقرب للصواب بناء على تحليل المشكلة... و دة عادى طالما كلامنا منطقى و علمى و نابع عن فهم... و اعتقد احنا اتكلمنا فى حاجة زى كدة لما كنا بنفكر فى تعديل مكنة اللانوس من sohc الى dohc و كان التحاور حلمى بحت و بالادلة و البراهين

لكن لما يجى واحد و تبقى وجهة نظرة ان الصوت دة ناتج من ان زيت الموتور ناقص او العربية عايزة ضبط زوايا او شحن الدينامو ناقص يبقى دة كلام غير منطقى... و لما يبقى احد الحلول المقترحة ان صاحب المشكلة ميدوسش فرامل على اساس ان الفرملة هى سبب حصول المشكلة يبقى دة هلس

من هنا نوصل الى الاستنتاج ان وجهة النظر حاجة و عدم المنطقية و الهلس حاجة تانية... و مش كل حاجة غير منطقية او غلط ندافع عنها من مبداء وجهة النظر... دا وجهة النظر شخصيا تحتمل الخطاء و الصواب... يبقى مينفعش تبقى وجهة النظر هى الدرع الواقى لاى تاليف

و زى ما انت قولت فعلا ان دى بتبقى طريقة اللى مبيسمعش غير صوت نفسة... و بيحاول يبرر كلامة الغلط بانة وجهة نظرة مع ان "وجهة نظرة "دى ممكن تعمل كارثة

انا افتكر كويس احد الزملاء اشار على واحد كان عندة مشكلة فى الفرامل انة يلغى بلوف بتاعت تعديل الضغط للفرامل الخلفية و دة غلط جدا... العضو اشار بالحل دة بسلامة نية و مكنش قصدة اى شر ولا جادل فى الموضوع خالص... لكن تخيل بقى لو كان دة احد محبى الجدال و الفصال و التثبث بالراى و من انصار "وجهة النظر" و فضل يرغى كتير فى القصة دى و راح الراجل الغلبان صاحب المشكلة اقتنع بالكلام و جرب.......

اعتقد انت عارف ممكن يحصل ايه فى وضع زى دة... فرامل خلفية مفيش عليها اى تنظيم للضغط + دوسة فرامل محترمة = فقد للسيطرة على العربية تماما و ممكن الموضوع ينتهى بخسائر فى الارواح... كل دة عشان واحد عندة "وجهة نظر"... انا شايف ان دة واحد معندوش نظر (مش قصدى على العضو اللى اشار بالغاء البلوف لكن قصدى على اى حد بيجادل فى الغلط للجدل و خلاص)

انا مع ان كل واحد تبقى له وجهة نظر... ما احنا مش عرايس بتتحرك بخيوط عشان واحد او عدد محدود من الناس تتحكم فى مجتمعنا (مجتمع نايل موتورز)... المجتمع دة مفتوح للكل و فية حرية لكل الناس انها تقول اللى عندها و تسمع اللى يعجبها و تاخد بالراى اللى تشوفة صح

المهم ان اللى يقول حاجة يتقى ربنا فيها وميتكلمش الا لو عندة علم او خبرة سابقة بالحاجة اللى بيتكلم فيها لان دى امانة حيتحاسب عليها... و ممكن عشان حب الظهور او حب الجدل العقيم او رفض الاعتراف بالخطاء يودى و احد ملش ذنب فى داهية... لا الهجس حيخلى حد يظهر اكنة بطل و لا حب الجدل مجالة هنا فى منتدى يسعى لخدمة الجميع ولا الاعتراف بالخطاء بيقلل من قيمة الانسان... بالعكس... اللى يلاقى نفسة غلطان و يقول انا كنت غلط و شكرا للى صححلى المعلومة يبقى هو انسان محترم و احترام الناس ليه بيزيد... اما اللى بيبقى غلطان و يقاوح و خلاص لمجرد انة مش عايز يقول "انا غلطان" يبقى راجل....

فى النهاية انا مع وجهة النظر شرط ان تكون وجهة نظر علمية و صحيحة خالية من الهلس و الهجس و التاليف

MMamdouh