اخيرا جبت فوانيس شبورة للأفيو الحمد لله
الحمد لله اخيرا وبعد عناء جبت فوانيس شبورة للأفيو
بقالي حوالي شهرين بشوف فوانيس شبورة عجب واسعار غالية جدا
كنت سألت عنهم من حوالي شهرين في شارع دمشق مكنوش لسه نزلو السوق
وبعدين وانا في احمد سعيد مرة كنت بجيب قطع غيار لسيارة لانسر بسأل عن فوانيس شبورة للأفيو الراجل قالي عندي قولت بكام قالي 100 جنيه معقولة قولتلو اشوفهم وراني عدد 2 كرتونة لونهم بني بس بصراحة الفوانيس شكلها حلو بس الخامة كان باين عليها تقفيل اي كلام وقولتلو فين الوش قالي وش ايه قولتلو يعني لما اشيل الوش اللي راكب في العربية واركب الفوانيس لازم يكون في وش معاهم طبعا قالي هما بيتباعو كده
وفضلت كام يوم افكر و بعدين نزلت شارع دمشق بسأل واحد عن الفوانيس يقولي 350 جنيه وصيني
واروح لواحد تاني يقولي 290 بال وش بتاعهم وهما نفس اللي شوفتهم في شارع احمد سعيد اللي كانو ب 80 جنيه بعد التخفيض بس كان الراجل جايب وش معاهم بس برده تقفيل اي كلام و بلاستيك حاسس انه اول ما هيركب هيسيح من الحرارة
وبعدين قررت انزل احمد سعيد تاني وادور اكتر لغاية لما لقيت ماركة كويسة اسمها dala وعلبة كويسة شكلها نظيف و مرسوم عليها العربية الافيو والفانوس شكلو حلو والتقفيل كمان ومعاهم الوش بتاعهم والخامة جيدة جدا سألت عن السعر قالي 280 جنيه الصراحة مقارنة بالي شوفتهم ب 80 جنيه السعر يفرق بس الخامة كويس وانا عايز اركب حاجة نظيفة و كويسة و بعدين اسأل تاني عند حد تاني يقول 275 و هكذا لغاية لما دخلت محل و اول لما سألت قالي 250 جنيه و اشتريتهم و هما مش بيجي معاهم اي حاجة تاني ولا ضفيرة ولا زرار بس الفوانيس و الوش
المرحلة التانية مرحلة التركيب
صاحب المحل قالي اجيبلك كهربائي وانتا تحاسبه طبعا لأ اجيب اي حد يلعب في العربية و يعمل حاجة غلط و تخرج
بره الضمان و بعدين قررت اروح للكهربائي اللي بتعامل معاه وانا من عمر 10 سنين وانا صغير لما كنت بروح مع والدتي نصلح العربية ما شاء الله الناس هناك بتفهم و صاحب المحل اسمة فيصل شرارة و ولاده خريجي هندسة
المكان آخر شارع جسر السويس خلي مستشفي منشية البكري علي ايدك الشمال وكمل علي طول والشارع اللي فيه تقاطع خش يمين الناصية بتاعت طومان باي وأسأل عن المهندس احمد شاب ما شاء الله عليه
قالي طبعا الفوانيس دي رخمة و صعبة في تركيبها نظرا لضيق المكان وقالي لو حد تاني هايفك الاكصدام بس والمهم رفع العربية علي كوريك وفك مسامير بعض الكارتيرة والحمد لله في مكان جوه في الاكصدام استاندر للفوانيس و ركب الوشوش وكله تمام وعمل توصيلة من النور الصغير و سلك كهرباء خاص للفوانيس و كتاوت و كله شغل نظيف والمهم ان الفوانيس بتيجي في مكان لفيشة يعني لازم يركبلها فيشة والحمد لله لقيت الفيش عنده و بصراحة هو الكهربائي الوحيد اللي ممكن يركب اي حاجة في العربية و مش خايف انه يلعب فيها علشان هو مهندس كهرباء و عند عدة خاصة به و جرب الفوانيس وكله تمام و اخد 100 جنيه تركيب شامل الكتاوت والسلك والتعذيب في الاماكن الضيقة في العربية بصراحة هو لو طلب اكتر كنت اعطيته علشان شغل نظيف والحمد لله الامور ماشية
دي تجربة محدش يشتري حاجة قبل ما يسأل كذا مرة و يدور و يشوف الخامة و ما يركبش عند اي حد و مش مهم المصنعية طالما الشغل نظيف
والسلام عليكم ورحمة الله