موضوع للسؤال عن أي شئ في اللينكس

**yoko** · 18-09-2009 03:59 AM

الموضوع ده للي عنده أي سؤال عن اللينكس وإن شاء الله نرد عليكم
طبعا الموضوع ده إتفتح بعد ما تم طردنا من موضوع windows 7
بهزر طبعا

**M.Osman** · 18-09-2009 04:04 AM

متشكر جداً على الموضوع... انا اصلاً في دماغي اتعلم لينكس بس انشغلت شوية و كنت ناوي اسأل شوية اسئلة فعلاً....

ممكن حضرتك تفيدني بخصوص الأسئلة دي:
1- ممكن انزل نسخة لينكس مع الويندوز فيستا في نفس الوقت (على نفس اللابتوب؟)
2- يا ريت حضرتك تفيدني انزله منين و ازاي .. عشان انا ابيض ؟ (احدث نسخة و اسمها اية؟)
3- انا معرفش في اللينكس خالص و عايز اتعلم.... هل هيكون من السهل اتعلمه لوحدي ؟

متشكر......

**M.Osman** · 18-09-2009 04:42 AM

بشكر حضرتك جداً على سرعة الرد

المواقع والكتب عن اللينكس كتير. قول لي، عايز تقرأ عن اللينكس بالعربي ولا الانجليزي؟

بالإنجليزي...

**itsonlyme** · 18-09-2009 04:49 AM

نزل الكتاب ده.
http://rute.2038bug.com/rute.html.tar.bz2

ممكن تحتاج برنامج 7zip عشان تفك ضغط الملف.

بس نصيحة. نزل اللينكس الأول واستخدمه كام يوم بعدين نزل الكتاب واقرأه.

الكتاب تقني للغاية وممكن تستخدم اللينكس من غير ما تقرأه. الكتاب هدفه تعليم واجهة سطر الأوامر. مع النسخ الحديثة للينكس، استخدام سطر الأوامر قليل جداً للمستخدم الجديد.

**PRO-DRIVE** · 18-09-2009 04:58 AM

شويه نصائح كدا !

وقت تجربه لينكس لازم تفهم شويه حاجات عن التوزيعه اللي بتستخدمها ! الملفات اللي بتستخدمه التوزيعه و هي مبنيه علي ايه و الحاجات دي
ازاي تنزل ملفات و مكتبات ازاي تستخدم الترمينال عموما

تاني حاجه للي ححطوها علي الجهاز لازم ضروري تقرا كل خطوه بتعملها !! الموضوع مش نكست نكست نكست

كتير الهارد كله بيتفرمت عندهم بسبب انهم بيستخدمو الطريقه دي !

اخيرا اوبونتو الفا 6 نزلت من ساعتنين كدا :) ! اخر نسخه تجريبيه من اوبونتو 9.10 اللي حتنزل في اول اكتوبر
مع اني بقيت من جماعه سلاكوير اللي قاربو علي الانقراض هههههه بس خبر اوبونتو لمستخدميها

**yoko** · 18-09-2009 05:08 AM

بصراحة الناس كفت ووفت بس قبل ما تعمل سطب للنسخة دور في جوجل عن ubuntu dual boot وهتلاقي شرح إزاي تنزل لينكس جمب الويندوز
ثانيا اللينكس مش حاجة واحده مش زي الويندوز xp بعديه فيستا بعديه ٧
ﻷ ده فية أكتر من نسخة(يقال عليها توزيعة)وكل توزيعة ليها إصداراتها
ثالثا لازم يكون عندك حب للتعلم والبحث والسؤال لإنك مش بتجرب برنامج جديد ده نظام تشغيل كامل

لPRO-DRIVE
أنا حرمت أنزل ألفا وبيتا أخر مرة نزلت البيتا الجهاز طلع عيني عشان كرت النفيديا مع إني بعرف من البيناري!!!
وسلاكوير خلاص بينقرضوا بالذات بعد ما backtrack إتبنت على الubuntu وكمان slack بقت على الkde بس وأنا بصراحة مبحبش الkde

**mood_8210** · 18-09-2009 05:36 AM

انا عاوز انزل لينكس بس المشكلة ان الجهاز عندى قديم و منفعش معاة الاوبونتو الجهاز ايسر , 128 رامات , 1300 بروسيسور , فيجا 8

انا عاوز بقى لينكس يكون خفيف و يشتغل على المواصفات دى و عاوز اعرف اية نظامو مع التعريفات عشان انا السبب انى حنزلوا انى مش عارف اعرف كارت الصوت على الاكس بى
و شكرا مقدما ليكم.

**itsonlyme** · 18-09-2009 05:43 AM

المشاركة الأصلية كتبت بواسطة mood_8210

انا عاوز انزل لينكس بس المشكلة ان الجهاز عندى قديم و منفعش معاة الاوبونتو الجهاز ايسر , 128 رامات , 1300 بروسيسور , فيجا 8

انا عاوز بقى لينكس يكون خفيف و يشتغل على المواصفات دى و عاوز اعرف اية نظامو مع التعريفات عشان انا السبب انى حنزلوا انى مش عارف اعرف كارت الصوت على الاكس بى
و شكرا مقدما ليكم.

جرب النسخة دي من توزيعة Linux Mint
The Linux Mint Blog » Blog Archive » Linux Mint 7 ‘Gloria’ XFCE released!

دي بتستخدم واجهة XFCE الخفيفة. ان شاء الله تبقى خفيفة على الجهاز وكارت الصوت يشتغل.