الموضوع: هى الاصحاب جرالها ايه ؟؟

انا أتفق مع رأي أستاذ طارق هيومان .. دي حاجة انا إتعلمتها مؤخراَ .. انا أكبر منك بس مش كتير يعني (22 سنة)
و الصداقات اللي في حياتي معظمها قعدت 3 أو 4 سنين .. يعني إنت عارف و الواحد صغير مثلاَ بمجرد ما يغير المدرسة الصحاب بيتغيروا
بتخش الكلية بيتغيروا تاني حتي لو لسة مع صحاب المدرسة بس مبيبقاش زي الأول .. بتخلص الكلية كل واحد بيروح لحاله و تبدأ من جديد .. و صحاب الشغل بيتغيروا اما تغير الشغل و كل شوية تروح في حتة !

لذلك بقيت أنزل بتوقعاتي خااااالص في الناس و خاصة الأصدقاء .. بمعني أصح .. مبستناش منهم جدعنة ولا أي حاجة .. لأن فيه أصدقاء كنت متخيل إن هنفضل صحاب طول عمرنا و بتاع و في مواقف هايفة بتلاقي نفسك خذلت فيهم .. أبسطها أصدقاء لي كنت بأجل شغلي و رحت إمتحاني مطبق و مش مذاكر كويس عشان سهران شغال معاهم في مشروع تخرجهم و انا عملت فيه ما لا يقل عن 80% لأنهم لا يفقهون البطيخ عن اللي هيتعمل .. و بعدها اما إحتجتهم في مشروع التخرج بتاعي .. و أيام التنفيذ .. اللي مبيردش و اللي قفل موبايله و اللي و اللي .. و راحت عليا فلوس تأجير حاجات .. و مشروعي طلع هزيل جداَ و بقرف أشوفه و انا كنت بانيله أفكار و حاجات و طلع زي الطين .. جايين بقي بعد كدة يقولولي معلش و متزعلش و بتاع .. قلتلهم انا مش زعلان ولا حاجة يا جماعة كل واحد عارف هو عمل إيه كويس و عارف هو إيه انا مش هعاتب حد ..

بعيداَ عن الموضوع .. انا شايف الخناقات تطورت أوي يا رجالة .. خالد مكسر 3 كراسي و طرابيزة علي صاحبه غير كشاف مجاش فيه .. في موضوع تاني واحد بيضرب واحد بالمفصلة اللي ماسكة المقطورتين ببعض .. وواحد نازل لكريم منير بطبنجة .. و موضوع تاني عربية إتكسرت فيه .. غير كمية الأعضاء اللي شايلين إليكتريك و عصيان هوكي و باسبول و شوم .. الصراحة الواحد يخاف يهظر معاكوا بعد كدة.

انسى يا عم خالد وكبر دماغك وبكرة يامة تصاحب وتنسى برضة بس خد بالك مش كل صاحب يتصاحب فى اصحاب زى مابيقولو على القهوة بس وفى صاحب الى هوة يبقى زى اخوك يخاف عليك ولو شافك بتعمل غلط انا بكررها اهة لو شافك بتعمل غلط يقولك لا انت رايح فين انت كدة غلطان فوق لروحك
انما بقى بتوع يلا بينا رايحين مصلحة اوكية
طب ماتييجى دة فى مصلحة نارررررر لا انا بذاكر يا عم كبر دماغك تعالى طيب انا جاى لا
من الاخر الصاحب الى مايخفش عليا ويرجعنى عن غلطى او على الاقل يحذرنى دة الى ماابكيش علية
وبعدين انتة لسة سنك صغير مش كبير يعنى قوى ولسة العمر قدامك انا عن نفسى وعندى دلوقتى 29 سنة شفت اصحاب بعدد شعر راسى وتلات تربعهم عايزين الحرق اعمل زيك كدة برضة اقول دة اية واد مية مية وبعدين عند اول امتحان لمعدن البنى ادم الاقية طلع عيل فرت زى السجاير الفرت كدة
وبعدين معلش يعنى صاحبك اية دة الى مسكتة من التى شرت قام شتمك قمت مكسر علية 3 كراسى دة الواحد بيحس من الكلمة مش من البوكس ولا الضرب صاحبى لو قالى كلمة مش كويسة بعديها بس بقولة انما ماتوصلش للضرب وبعدين يا سيدى هاقولك حاجة هوة زعلان انك شتمتة بس دة انا ايام الجيش مكنش فى فى بق الواحد غير الشتيمة والهزار بالايد
ولحد دلوقتى احسن اصحاب قابلتهم فى حياتى همة بتوع الجيش دول
المهم علشان ماوجعش دماغك نصحتى يا خالد حرص شوية فى اختيار اصحابك والى حصلك دة مش عيب محدش بيتعلم ببلاش وخلى دايما حدود فى التعامل بين وبين اصحابك لا تبقى المعاملة جافة قوى ولا داخلين جوة بعض قوى كدة علشان لما تحصل حاجة ماتبقاش تزعل وتعرف تصد الى قدامك

الحمد لله كله بقى تمام بس أنت كدا فكرتنى بصديقى