توكيل لا يطبق سياسة الامان و الجودة

**gagareen** · 21-09-2009 12:15 PM

المشاركة الأصلية كتبت بواسطة mantoros

أشعر انكم تتعاملوا مع الموضوع ببساطة غريبة اوي الي درجة السلبية!!!!!
انا لو حصل الموقف الاول او الثاني كنت قلبت الدنيا و بعت -e-mails و قابلت المديرين و جبت الصنايعي من قفاه و جبت جزاء للمهندس المسؤؤل
يعني ايه زيت يتسرب بسبب صامولة مفكوكة و يعني ايه مهندس محترم يقول غير حاجة و هو ما غيرهاش!!!!
السلبية بتاعتنا دي اللي موديانا في داهية و غيركم كتير عربيتوا حتقع تحت ايديهم و ممكن ناس تموت بسبب اهمالهم و سكوتكم .اصل احنا اول ما مصلحتنا تنقضي نسكت و نشتري دماغنا.
انا لسة مستلم التيجو لزوجتي من ابو غالي و لما جيت في المعاد قالولي ان استني الاسبوع اللي بعده و حسيت ان في تأخير مقصود لمصلحة غيري!!!! المهم فورت المكان....بعت e-mail للمديرين في ابو غالي و قدمت شكاوي و تاني يوم الصبح كانت العربية جاهزة !!!
و ده كان قمة الاحترام انهم اهتموا و قروا الميل و اثنين مديرين كلموني.....بس ده كمان عشان انا مكنتش سلبي.

و خلونا نتغير و نغير الغلط من حولينا عشان ربنا يرضي عنا و بلدنا تكون احسن بينا

و كل عام و انتم بخير

كلام سليم 100% والتوكيل فيه شويه ملاحظات ولازم الواحد يخللى باله على قد ما يقدر

ربنا يسترها علينا كلنا

**hesham_soaida** · 21-09-2009 02:01 PM

أعتقد بعد قرائة الفقرة اللي فاتت وادراكنا مستوى التوكييل السيئ, أي حد حيروح التوكييل وهو متحفز. وربنا يسترها معانا في الاخر.

**mmsgalhoom** · 21-09-2009 04:19 PM

مبدئيا بشكر جدا صاحب المشاركة على حرصه فى إستفادة غيره من أعضاء المنتدى من الخطأ إلى حصل معاه فجزاه الله كل خير ولكن أنا شايف إن رد الفعل مش على قدر الحدث..يا جماعة أنا شايف إن إحنا بنقعد نمنى نفسنا و نقول إن التوكيل فى تقدم مستمر .. ممكن ده يكون ملحوظ لبعض الأعضاء فى جوانب معينة و لكن إنه يحصل خطأ فادح زى ده و يحصل مرتين مع عضوين مختلفين من المنتدى فقط فما بالك ببقيت الناس إلى مش مشتركين ياترى كام واحد حصل معاه كده؟؟؟؟؟!!!!!!!!

وكذلك إحنا فى المنتدى هناخد بالنا طيب و بقيت الناس بره المنتدى؟؟!!

إلى حصل ده للأسف عز العرب إلى يتحمله لوحده لأنه خطأ مصريين و بروتون ملهاش زنب فيه و معلش منقلش دى غلطة فنى لوحدة أنا مهندس و عارف إمكانيات الفنين إلى بيشتغلوا معايا و لازم أكون فاهم أوى عشان الفنى ميدحكش علىً.

أنا بطلب من الأعضاء إلى لهم وصلة مباشرة بتوكيل عز العرب إن إحنا عايزين تحقيق فى الموضوع و رد من مهندس آمر .... و إزاى نضمن إن ده ميحصاش تانى لأن مش كلنا بنفهم فى الميكانيكا زى ما صاحب المشاركة فاهم.

يا ريت ناخد الأمر بإيجابية شوية عشان لو سكتنا الخطأ هيتكرر و ده طبع المصريين للأسف مبيشتغلش إلا تحت ضغط ولازم يكون عليه رقيب.

**مصطفى_صديق** · 22-09-2009 11:18 AM

سؤال جانبى على هامش الموضوع..
لو حصل والموتور نتيجة تسرب الزيت ....باظ، هايبقى ايه الوضع مع التوكيل
هل سيتم تغيير الموتور ولا سيتم التنصل من المشكله ، وخصوصا ان الزيت متغير فى التوكيل والاوراق بتثبت ذلك