استفسار عن التأمين

**Reventon** · 18-09-2009 04:54 PM

السلام عليكم

انا معايه جين 2 2009 ...جبتها شهر 4 ...وعامل بيها حتي الان 19850 كيلو
العربية حلوة و الحمد لله...بس فيه شوية ملاحظات هبقي اكلمكوا عليها بعدين
المهم انا للاسف عملت بيها حادثة صغيرة كدة ...من 10 ايام
فودتها للتوكيل تاني يوم بعد الحادثة . و قابلت المهندس ايمن قاللي تعالي بعد العيد عشان عندهم زنقة لغاية العيد
و قيملي التكلفة من 6 الي 7 الآف ...و قاللي ان التأمين يشيل الحكاية ديه
و المطلوب مني ان اجيب صورة طبق الاصل من محضر التأمين اللي بيتعمل في القسم بعد الحادثة
فهل حد يعرف التأمين هايشيل الحكاية ولا لا ...خصوصا اني هحاسب التوكيل الاول وهاخد فلوسي بعدين من التأمين
لان العربية تقسيط ...
ولا الواحد يصلحها برة و خلاص.....؟؟
مع ان المهندس ايمن اللي في التوكيل قاللي 2009 ملوش قطع غيار بره...و بما اني مأمن مع عز العرب فكدة العربية
بتاعتهم و خسارة اصلحها برة وانا مأمن عليها
فأيه رايكوا
علي فكرة العربية هيتغير فيها (كبوت,فانوس امامي يمين,كصدام,شبكه)...وعايز اقول ان فرامل العربية مسعفتنيش
خالص ف الحادثة فهل يمكن يكون التيل قرب يخلص؟ خصوصا اني داخل عالعشرين الف ؟!

**DR_EMAD** · 18-09-2009 05:55 PM

قدر الله وماشاء فعل

الحمد لله أنك بخير

شئ طبيعى أنك تعمل الشغل فى التوكيل .. متعملوش برة

مادام أنت مأمن معاهم .. هتعمل الشغل برة ليه ؟؟؟؟!!!

ومادام التأمين هيشيل الليلة دى كلها .. هتدفع من جيبك ليه ؟؟؟!!

هو أنت ناقص بهدلة ! ! !

**mimo3000** · 18-09-2009 06:42 PM

الف حمدله على سلامتك ياباشا قدر الله وماشاء فعل
الحمد لله انها جت على قد كده

انا بس كنت عاوز اقول لحضرتك على نقطتيين الاولى انا رايي طالما العربيه متامن عليها يبقى تعمل شغلك كله فالتوكيل وباعلى جوده (ده حقك) انتا مش بتدفع تامين عشان متستفدش بيه حضرتك حصلتلك الحادثه ومكنش بايدك وانتا اتضريت فده دور التامين بقى انه يقلل الضرر المادى الواقع عليك

بس النقطه التانيه بقى ان حضرتك متدفعش اى حاجه من جيبك وبعدين تستردها منهم انا رايي انتا تروح لشركه التامين وهما يتكفلوا بالموضوع من اوله لاخره ده شغلهم وبيخدوا فلوس عشان يعملوه يبقى ليه حضرتك تدفع؟؟

وربنا يعوض عليك ويستر طريقك انتا وكل الاعضاء

**emadhamdy** · 18-09-2009 07:24 PM

السلام عليكم
اخي مفيش شك انك تعمل عربيتك في التوكيل
حتي لو انت مقتدر انك تعملها بره لاكن ده حقك
كمان المهندس ايمن شخصيه محترمه وهو صديق غالي عليا جدا
وبجد وجوده في عز العرب مكسب للتوكيل
والحمد لله انها جت علي قد كده وانك بخير

**Eng. Rafy Samy** · 19-09-2009 01:31 AM

طبعاً الف حمدلله على سلامتك اولاً
واكيد اعملها تبع التأمين والتوكيل
بس السؤال هنا ازاي الفرامل مأسعفتكش يا ريت لو حضرتك تقولنا الحادثة حصلت ازاي وكنت ماشب على كام وطبيعة الارض اللي كنت ماشي عليها وحمولة العربية علشان نتسفيد ونخلي بلنا
تقبل تحياتي

**gebreel** · 19-09-2009 01:57 AM

التأمين بيشيل اخطائك و اخطاء الغير و يصلحها في التوكيل و ده السبب في انك بتدفعلهم مبلغ كل سنة نظير انك تلاقي خدمة زي دي
في بعض الشركات تقلك ادفع و نحاسبك بس بيدوخوك على ما تستلم الشيك فحاول انك تدفعهم على طول ولو حتى تاخد وقت اطول بس مش هتدوخ على الشيك معاهم
و الف حمد الله على سلامتك

**Ayman_52** · 21-09-2009 12:53 AM

معلش قدر الله وماشاء فعل ... وربنا يحفظهالك ويكفيك شر الطريق يارب

شوف ياسيدى هتاخد المحضر اللى انت عامله ... بس خد بالك مايكونش المحضر مكتوب ضدك ؟؟؟

-----

وبتودى العربيه التوكيل مع المحضر .... والتامين بيروح يعاين العربيه خلال يوم او اتنين ... وبيعمل موافقه بتصليحها ..

وبعد التصليح ... هتروح تستلم من التوكيل ... وتدفع 10% من تكلفه الاصلاح (شروط شركة التامين كده) ... بس ممكن تفاصل معاهم باردوا ساعتها.

وبعد كده هتطلع على شركه التامين ... وتعمل حاجه اسمها معاينه بعد التصليح ... وبيطلعولك الشيك خلال 10 ايام - اسبوعين

-----

شركه التامين اللى بيامن تباعها عز حاليا .. شركه التامين التكافلى ... فى المهندسيين شارع سوريا

-----

وان شاء الله تتصلح وترجع زى الفل ...

-----

* ملحوظه : لما توديها التوكيل خليك دايما متابع معاهم ... عشان هما احيانا بيتاخروا فى مواعيد التسليم

------

تحيـــــــــــــــــاتـــ ــــــى