بعد بحث ومقارنة قوية ... حجزت السوزوكي sx4 الحمدلله أخيرا
الحمد لله حجزت السوزوكي SX4 سيدان 2009
وده بعد رحلة بحث طويله دامت لعدة شهور بشكل جاد ( وربما سنة كمان )
حجزت العربيه من فرع مودرن موتورز مدينة نصر - توكيل سوزوكي - وأحب اشكر الأستاذ كريم ناصر suzuk مسؤول المبيعات في التوكيل وزميلنا في المنتدى على اهتمامه وجدعنته معانا الحقيقه عمل الواجب وزياده :B4_388:
و بالفعل كان عند وعده وكلمني عشان نعمل test drive اليوم الجمعه
تقييمي السريع للسياره من خلال فحصها عدة مرات في المعرض وتجربتها في ال test drive كالتالي :
هقول التقييم ده الأول وبعدين هقول ايه الاختيارات الاخرى اللي كانت قدامي وليه اخترت العربيه دي
1- الشكل : ده أذواق ولكن العربيه تصميمها مميز ولا يخلو من الشياكه واسبور في نفس الوقت
2- الكماليات : مرضيه جدا ... جنوط سبور 15 , سي دي mp3 , اتنين ايرباجز , ABS , طاره ملتي فنكشن ومن الجلد الطبيعي , طبعا مرايات كهربا و4 زجاج كهربا وسنتر لوك وريموت وباور وفوج لايت .
3- الوسع الداخلي ممتاز جدا ... سياره عائليه ... مقصوره واسعه ومريحه ... وشنطه كبيره جداااااااا
4- سياره يابانيه 100% وتقفيل ياباني ممتاز لا يقل عن التويوتا او الهوندا
5- السياره مواصفات خليجيه ( هي بتاعت التوكيل مش من معرض بره ) .
6- محرك 1600 سي سي قوي ونشيط بقوة 107 حصان ( انا اتقالي ارقام كتير بس غالبا هو ده الرقم الصحيح ) وعزم 145 نيوتن ...
العربيه سحبها راائع فعلا ... كيك داون استجابته ممتازه ... المحرك صوته هادي في القياده الهاديه ورياضي جدا في القياده الرياضيه ...
7- الفرامل ادائها ممتاز
8- التكييف رائع وتأثيره على السحب يكاد لا يذكر .
9- الثبات ... الحقيقه مالحقتش اختبره فعلا ومش هفتي .
10 - العفشه يا جماعه ناعمه جدا جدا جدا وانا مستغرب على الكلام اللي اتقال في المنتدى عن ان العفشه ناشفه ... انا لبست بيها كل المطبات وبلاعات وعيون القطه والعفشه في نعومة الكورولا ويمكن انعم .
11- العزل مرضي جدا لكن ماكنتش مركز معاه انا كنت مركز مع الكيك داون . :049:
12- الساوند سيستم ظريف ونقاء الصوت وتوزيعه تمام .
13 - ماليش خبره في تقييم صاج العربيه ... لكنها مصفحه خلف الشبكه الاماميه امام الردياتير وده بيوفر حمايه ان شاء الله وايضا مصفحه من الاسفل .
14- العفشه GTI زي عفشه الجولف ان العجل بيفرش على الطريق مع السرعه ودي بتدي ثبات عالي ... وفعلا لما دعبست في النت لقيت انها زي عفشة ال BMW في التكنولوجي بتاعها بس مالقتش تفاصيل .
15- العربيه محتاجه باركنج سنسور وده مقدور عليه ان شاء الله .
انا زودت Accessories وحدة رفع وانذار صلي من التوكيل وكونسول امامي وممكن بعد كده اركب باركنج سنسور وسبويلر .
ان شاء الله لما استلم العربيه واعمل بيها الف كيلو ولا حاجه هعمل تقييم اخر بالصور والتفاصيل بإذن الله .
في المجمل : انا في رأيي ان اكتر عربيه تشبه ال sx4 هي الكورولا 2007 شبهها في الوسع والنعومه والاداء ... فعلا كإني راكب الكورولا الياباني .
العربيات اللي كنت بقارن بينها وبين ال SX4 :
في البدايه كنت عايز حاجه في حدود التمانينات
شفت الاكسنت والريو والسيمبول بس ماكنتش مقتنع بيهم قلت احاول ازود شويه واجيب حاجه اعلى
شفت GEELY MK الجديده ... عربيه تحفه في كماليتها وتقفيلها وتختلف تماما عن معظم الصيني في جودة الخامات والتقفيل ... بس طبعا قلت ابعد عن الصيني وغنيله .
فكرت في الصني بس قلت برضو نبعد عن التقفيل المصري وكمان سمعت ان فيه مشكله في العفشه او علبة الدركسيون المهم صرفت نظر عنها .
الياريس ... تويوتا ... توكيل وقطع غيار واعادة بيع ... وعربيه عمليه ... وكانت منافس حقيقي ... بس الصراحه استكترت ادفع كام وتسعين باكو واجيب عربيه مافيهاش اي اوبشنز حتى الازاز عاده وكتير عليها ادفع اكتر من ال 100 الف عشان اجيبها فل اوبشنز .
النيو سيراتو كانت منافس قوي ... الفئه اللي ب 109 ... هي عربيه محترمه جدا ومع احترامي للكوري ووالدي راكب كوري برضو ( هيونداي تراجيه 2000 سي سي ) بس قلت ليه اجيب كوري لما ممكن اجيب ياباني وارخص كمان ؟؟؟
ده غير بقى الحجز والاوفر برايس وحوارات .
اللي خوفني من ال SX4 : موضوع قطع الغيار والصيانه والتوكيل ... قطع الغيار اسعارها زي كل الياباني ... والتوكيل الناس اختلفت في تقييمهم لكن انا في المبيعات الصراحه استاذ كريم ماكنش مقصر والمعامله كانت محترمه . لكن عموما لو الصيانه ماعجبتنيش في مودرن موتورز اعتقد ان ممكن اعملها في السبع ... بس لسه هتاكد من المعلومه دي
سعر اعادة البيع ... ان شاء الله مش هبيع غير بعد كتير ... مش هتفرف يعني ... والياباني برضو ان شاء الله معمر .
عندي سؤال وارجو النصيحه ... هل التأمين هام وضروري ولا نخليها على الله وناخد رزقنا ؟ وايه احسن شركة تامين ؟ :11:
وكل عام وانتم بخير
