الموضوع: هل انت راضى عن حياتك فى مصر ؟

انا مندهش اوى من اللى وصلوا الشعب المصرى

500 مشاهدة للموضوع
50 بس هم اللى صوتو ( راضى او غير راضى )

ياة هو الخوف وصل بينا للدرجة دى

قول رايك
قول اةةةةةةةةةة
من اللى بيوجعك علشان بس الدكتور يعرف ان العلاج ( فية سم قاتل )

لا
والغريب فينا كمان
لو سألت اى واحد على القهوة اية رايك فى العيشة ( هيقعد يسب ويلعن لحد منتا تقوم
ولو اى مسئول او مذيع سأله ( هيقعد يغنى بحبة للنظام والبلد ويستغل الفرصة ليشكر السادة اعضاء مجلس الشعب والسادة الوزراء و و و)

يا جماعه دة نفاق

لما الكل بيقول لا الحكومة بتستجيب
احنا اللى بنغش الحكومة وبنغش نفسنا

انا مش بقول تعالو نعمل انتفاضة ولا انقلاب علشان الناس تخاف تقول رأيها
لا والله
انا بس عايز الكل يقول رأية بصراحة
وبعدين هو دة اللى دينا امرنا بية وبالترتيب
( من رأى منكم منكرا فليغيرة 1 بيدة 2 بلسانة 3 بقلبة وذلك اضعف الايمان )
كل الناس مش راضية ( 3 بقلبة )
احنا عندنا فرصة هنا نخلية ( 2 بلسانة )
وذى مقولت قبل كدة قول رأيك بصراحة ومن نغير متزعل حد ولا تعمل حاجة بس قولللللللللللللللللل
وطب وهيفيد بأية ؟
لا
تصدقو بيفيد اوى وبيعمل اكبر تأثير

ونأخد عبرة من رجالة دمياط
وموضوع مصنع الاسمدة المدمر للبيئة

انتو عارفين عملو اية ؟


كل واحد علق على بيتة يافطة سوداء ( انا مش عايز المصنع )
وعلى عربيتة يافطة سوداء ( لا لاجريوم )اسم المصنع
انتم متخيلين المنظر كل شبر فى دمياط معلق يافطة سوداء بتقول لا

مفيش حد كسر حاجة ولا ولع حاجة ولا ضرب حد ولا شتم الحكومة
قمة التحضر

والنتيجة

الحكومة استجابت والمصنع اتلغى خالص بأمر من الريس
فيبقى العيب فمين ؟
افتكر مرة دخلت لمسئول ما اشتكى لسعادتة من طريق بيحصل علية حوادث كتير انتو عارفين قاللى اية ( اشمعنا انت اللى بتتكلم , حصلك حاجة ,لا , طيب مالناس كلها رايحة جاية ومحدش زعلان اشمعنا انت يعنى , فونت بقى )

هو معزور فعلا محدش قال ان فية غلط غيرى والشكوة الفردية لا يلتفت لها !

وعلشان كدة

نفسى الكل يقول رأية يقول بس ( ومتعملش حاجة خالص يا سامح )

واكيد لو الصوت جماعى هيبقى عالى وهيتسمع اكيد
وهيبقى فية تغيير للافضل


اذا ما الشعب يوما اراد الحياة = فلا بد ان يستجيب القدر

دة اذا