كيف تشترى الجين 2 فى سبع خطوات ( الخطوه السادسه - الحجز )
السلام عليكم ورحمة الله وبركاته
اخيرا وبعد طول انتظار تم الحجز والحمد لله جين 2 2010 اتوماتيك مع استاذ محسن صالح فى فرع الصحراوى وطبعا الموضوع كان بسيط جدا رحت انا واستاذ ايمن بعد ماقابلته فى الجيزه ورحنا سوا وطبعا ايمن زى ما انتوا عارفين خبير فى طرق القاهره والجيزه فمسالناش الا كام مره بس مش عشان كنا تايهين ولا حاجه لا عشان زيادة اطمئنان والحمد لله وصلنا للمحور اللى انطلق ايمن بعده للتوكيل فى اول الصحراوى
دخلنا ولقينا استاذ محسن صالح وكان الموضوع فى غاية البساطه طلباتك ايه جين 2 2010 اتوماتيم طب اللون لسه محددتش وكده كده الدفعه اللى جايه مش هستلم منها فلما اتفرج على الجديد واشوف اكتر على الطبيعه وطبعا لازم راى المادام فى موضوع اللون ده طبعا اللى متجوزين فاهمين احم احم.
طب ايه المطلوب صورة البطاقه ومبلغ الحجز اللى مابين 500 او 1000 جنيه وكل من تمن العربيه زى ما محسن كان بيقول دفعت الفلوس واخدت الوصل .
طب الخصم ايه نظامه؟ اعد يجيبنا يمين وشمال بس انا وايمن الصراحه حاصرناه لغاية ما اتاكدنا انه مفيش عنده معلومات مؤكده عن قيمة الخصم بالظبط وهو مستنى الادارة العليا اللى هتحدد الموضوع ده عشان يبقى فيه ديل تانى ان شاء الله بس قيمته كام مش واضح اوى وغالبا هيكون اقل شويه من اللى فات بس اكيد هيكون فيه خصم باءذن الله وطبعا الكلام ده عن الجين 2 بس برسونا وواجا الخصم ممكن يستمر - على حسب كلام محسن -بس هل على الديل القديم و لا على المفروض لسه هيتعمل الصراحه مش متاكد بس الخصم زى ماهو وفيه عرض جديد على الواجا اللى نازله فى باله جديد طبعا ايمن باشا هو اللى هيتكلم عن المواضيع دى كلها احسن منى .
بالنسبه لجين 2 2010 العربيات فى الميناء من فترة وهتنزل بعد العيد ان شاء الله برضه على حسب كلامه فخلاص هانت يا رجاله .
قابلنا المهندس امر وسالناه على r3 قال لنا تفاصيله هتنزل بعد العيد ان شاء الله وكل حاجه عنه هتبان
انا عملت الموضوع زى ما وعدتكم انقل لكم تجربة الجين 2 خطوه بخطوه عشان اى حد بعد كده عاوز يشتريها ميحترش كتير ويلاقى تفاصيل لمعظم اللى هييجى فى باله وان شاء الله الموضوع القادم فى السلسله هى الاستلام باءذن الله بكل تفاصيله ولو امكن هصور الموضوع ان شاء الله عشان تعم الفائده للكل وفاضل كده موضوعين فى تجربتى لشراء الجين وهم موضوع عن جميع المواضيع اللى اتكلمت عن عيوب ومميزات الجين وموضوع الاستلام وبكده ان شاء الله اكون خلصت اللى وعدتكم بيه وعلى امل انه يتثبت هديه منى لكل وافد جديد يرغب فى شراء الجين 2 بشكل خاص وبروتون بشكل عام . وكل عام وانتم بخير
سلامى للجميع