عرض للطباعة
السلام عليكم
كل سنة و انتم طيبين وعيد سعيد عليكم جميعاً
عندي مشكلة غريبه النهارده حاسس ان الميكانيكي لغبط العربيه
العربيه دلوقتي لما بشغلها ، لو سيبتها من غير ما ادوس بنزين ، الماتور بيقف ،
لكن لو اديتها بنزين ، الماتور بيفضل شغال ، يعني طول مانا ملمس بدال البنزين العربيه بتفضل شغاله
لكن بمجرد اني اسيبه ، فالماتور بيقف
انا حاسس انها بسيطه ، فياريت تقولولي منين المشكله بالظبط و ازاي اظبطها ـ لأني مش عايز اروح تاني للميكانيكي ده
لو المكنه كربوراتير
يبقى أنت محتاج تنظف بيك السلانسيه
وياريت تكشف على فلتر الهواء
بشمهندس سمير ،
الف شكر علي ردك
الفكره ان الميكانيكي ده كنت بعمل عنده شغله و قالي هيظبط الكربراتير
بس حاسس من اللي استنتجته بشكل عام انه سد الكربراتير اوي ، و المتور بيبطل علشان مبيوصلوش بنزين ، لكن لما بدوس البدال فبدفعله بنزين
فمن رأيك أجرب اعمل فيه حاجه بنفسي ولا اروح للميكانيكي و خلاص ؟
أعتقد أنه هوى شويه على مسمار البنزين
وياريت تروحله تانى وخليه يظبط سرعة السلانسيه
بعمل رجلاش لمسمارى البنزين والهواء
وخليه ينظف بيك السلانسيه بالمره ويكشف على فلتر الهواء
ممكن يكون الكطاربيراتير عايز يتنضف وممكن يكون الماتور عايز يعلى شوية
الف شكر ليكم يجماعه والله
ليا سؤال كمان .. الكهربا ملهاش دخل بالموضوع ده ؟
لأني حاسس ان فيه حاجه غلط برده ، لما بدور العربيه فأمبير الحراره يقوم طالع للأخر و يرجع تاني علطول لطبيعته ، حاسس ان فيه حاجه غلط في الكهربا ؟
انا لما غسلت العربية من جوة الراجل وهو بيغطى الموبينة و الاسبراتير خلع سلك من اسلاك البوجيهات و العربية كانت لما ادورها لازم المس البنزين و لو شلت رجلى تترجرج و تبطل فشوف الاسلاك كلها
الف شكريا باشا
والله يا جماعه انا هجرب بنفسي اكشف كده عليها النهارده و امري لله ، و عندي استفسار، تنصحوين افك عمة الكربراتير و أهوي المسمار شوية ؟ ولا دي ميكانيكي بس اللي يعملها ؟؟
الحكاية دى كانت بتحصل عندى كتير وأشهر سبب ليها هو انسداد "بك السلانسيه" ومن كتر ما حصلت عندى عرفت سكته وبقي باسلكه لوحدى.
نضف بيك السلانسيه
الف شكر ليكم يجماعه
وديتها للميكانيكي وهو ظبطها
علي الماتور شوية ، و ظبط الأسبراتير و بقت تمام
بس العربيه بقت مزعجه شوية من ناحية الشكمان ، كنت كشفت عليه قبل كده الراجل بتاع الشكمانات قالي الشكمان عايز يتغير بعد كده لأنه دايب
فأنتم أيه رأيكم ؟