الموضوع: سؤال عن الاوفر درايف

معنى كده ان الاوفر درابف ممكن يبقى موجود و ممكن ان يستعاض عنه ان الفتيس الاوتوماتيك ينقل الى الرابع لوحده
اصل انا ما عندبش اوفر درايف فى العربية

معلش اسمحلى يا حازم اختلف معاك شوية

الأوفر درايف غير الكيك داون

الافر درايف زرار بيكون موجود فى العربيات الاوتوماتيك اللى فتيسها فيه 3 حارات بس زى النيسان صانى، ووظيفته هو تمكين او منع الفتيس انه يروح للغيار الرابع

يعنى إيه الكلام ده؟

الفتيس الأوتوماتيك فى معظم سياراتنا يحتوى على اربعة غيارات امامية وواحدة خلفية (انا هنا بتكلم عن الغيارات اللى جوا صندوق التروس نفسه مش الحارات اللى انا شايفها على عصا الفتيس) وهذة الغيارات الامامية هى اللى الفتيس بغير بينها اوتوماتيكا اثناء قيادتى للسيارة حسب ظروف الطريق والسرعة

مصممى الفتيس الاوتوماتيك عاملين للسائق بعض انواع التحكم فى النقلة وذلك من خلال اربعة اختيارات مختلفة لوضع العصا تحدد ايه غيارات يمكن للفتيس ان ينتقل خلالها

فهناك نموذج عبارة عن 4 اختيارات امامية لوضع العصا (L,2,d3,D) مثل للانسر،وهناك شكل آخر عبارة عن 3 اختيارات لوضع العصا+فتح او ققل رزار الأوفر درايف(1،2،D) و over drive on or off مثل النيسان صانى

الوضع L فى النوع الأول يقابل الوضع 1 فى النوع الثانى وهذا الوضع يجعل الجير بوكس محصورا فى النقلة الأولى فقط وغير مسموح له بالإنتقال الى النقللات الأعلى

الوضع 2 فى النوعين يسمح للجير بوكس بالنقل الأوتوماتيكى بين الاول والثانى فقط

الوضع D3 فى النوع الأول يساوى الوضع D مع إغلاق زر الأوفر درايف فى النوع الثانى ويسمح للجيربوكس بالنقل بين الغيار الأول والثانى والثالث فقط

الوضع D فى النوع الأول يساوى الوضع D مع فتح الأوفر درايف فى النوع الثانى ويسمح للفتيس بالنقل بين كل النقلات الأول والثانى والثالث والرابع

الكيك داون اى كبس البنزين بشدة على ايه غيار يجعل الجير بوكس ينقل الى الغيار الأقل لإعطاء تجميع افضل للسيارة

يقع الكثيرون فى اللبس ويظنون ان زرار الاوفر درايف له نفس خاصية الكيك داون، وذلك لانه يحدث كثيرا ان يضغطه السائق حينما يكون الجير بوك على النقلة الرابعة فيقفز الجير بوكس مباشرة الى النقلة الادنى وهى الثالث حيث ان إغلاق الأوفر درايف يمنع الجير بوكس من استعمال الرابع وبالتالى ينتقل به مباشرة الى الثالث، وهو نفس التأثير الذى يحدث عند الكبس بشدة على البنزين والسيارة على الرابع،

ولكن يمكن ببساطة بيان ان دور زرار الأوفر درايف للا علاقة له بموضوع الكيك داون، لو تم استعمال الزرار فى وقت يكون فيه الجير بوكس اصلا على التالت او التانى او الاول، أى ليس على الرابع فسنجد ان زرار الاوفر درايف معملش حاجة خاص، فقط سنلاحظ اننا لو كبسنا بالسيارة والزرار ده مقفول ان العربية هتوصل لRPM عاليه جدا على التالت بدون ان تنقل لللرابع(كأنك بتحرق على التالت فى عربية مانيوال) وهو نفس التأثير الذى يحدث فى عربية اوتوماتيك ذات اربعة حارات امامية لو انا حاطط العصاية على d3، ومش بتروح تانى للرابع غير لما ادوس الزرار تانى علشان افتح الأوفر درايف


فى حين ان الكيك داون(كبس البنزين بشدة) يؤدى دوره فى نقل الفتيس للغيار الأقل على ايه نقلة وبعد ان تجمع السيارة يعود الفتيس اوتوماتيكا للنقلة الأعلى

شكرا جدا على المعلوملت الجامده دى