هل انتهت اسطورة ال 504 ام لا

**sir_servizio** · 08-12-2009 06:20 PM

رد فائق الجمال من الاخ الي قال تيتنيك غرقت لاكن 504 لا مشكوررر جدا جدا

**د.محمود صلاح** · 09-12-2009 05:55 PM

محبوبة جدا لدى أهل الصعيد بس سعرها نزل مع هوجة نزول الأسعار للمستعمل عموما , ولها زبونها اكيد , ووجهة نظرك غير ملزمة للغير

**husseinoo** · 09-12-2009 06:22 PM

اذا كان سعرها نزل ... هو ده يبقى عيب فيها خصوصا لما تكون موش ناوى تغير السيارة
اذا كان هناك عربيات شكلها احلى ... هو ده يكون عيب فيها اذا كان يهمك الكفاءة موش الشكل
واذا كان العربيات الجديدة كلها كماليات ... هو يكون عيب فيها اذا كان يهمك القوة والسرعة والإعتمادية

أهم سؤال : هل قطع غيارها الاساسية موجودة ولا لأ
انا موش بتكلم على الكماليات ولا على الرفايع بتاعة العربية "لان الرفايع موش هى اللى هاتمشى العربية"

لو قطع غيارها موجودة "كربراتير - فتيس - فوانيس - دينامو - ... والعفشة ... الخ

يبقى مافيش اى مشكلة مع الاسد الفرنساوى وهاتكون طول عمرها ميت فل وعشرة

اما لو كنت عايز حاجة جديدة "لزوم الوجاهة والخروجة الحلوة" .... يبقى برده عندك حق انك تركب حاجة جديدة

ولو كان الموضوع ده ما يفرقش معاك .... موش هاتلاقى اقوى واحلى من الاسد الفرنساوى وحمال آسية على طول الخط

اللى عنده تعليق على موضوع قطع الغيار الاساسية بالذات ياريت يكتبه لنا .... خصوصا من الناس اللى طاحنة فى السوق وعارفة كل حاجة

اما معلهش اللى بيستلف عربية "بابا" ... وبابا هو اللى بيصلح فى الآخر ... اعتقد انه موش هايكون عنده خبرة كفاية ... إلا إذا كان شاب "روش" وغاوى موضوع العربيات ده جامد

الاسد يمرض ولا يموت

مع اطيب التمنيات
اخوكم حسين غزالة

**osama_ruan** · 12-12-2009 01:28 AM

كل سنة وانتم طيبين ياعم ام كلثوم بتقول اية يا فؤادي لا تسل اين الهوي كان صرحا من خيال فهوي

**husseinoo** · 12-12-2009 01:46 PM

انا اخويا الكبير عنده عربية فيات 1300 موديل 1964 ومازالت بموتورها الأصلى لم يتم تغيير اى شىء فيها وما شاء الله ما زالت تعمل والحمد لله بكفاءة جدا من ايام ابويا الله يرحمه

يعنى اكثر من 45 سنة شغل "اشغال شاقة مؤبدة"

طيب لما تتكلم على الاسد الفرنساوى خصوصا موديل 1979 يعنى بتكلم فى 30 سنة فقط اقل من الفيات بـ 15 سنة

الإجابة واضحة

الأسد عمره ما هايموت ... كل الحكاية ان الناس عايزة الشكل الجديد فقط بدون المقارنة بالقوة والمتانة

"كتر الزن امر من السحر"
ستة آلاف ماركة عربية فى السوق ... طبعا لازم اذواق الناس تتأثر
اللى ما يتأثرش ... دى الناس اللى فاهمة ... او معاه فلوس ويقدر يشترى عربيات شديدة وتستحمل وتقدر تقارنها مع الاسد الفرنساوى ... لو معاك فوق الـ 40 الف جنيه تقدر تشترى سيارة وممكن تقارنها مع الاسد

تحت المبلغ ده ... اوعى تفكر فى المقارنة .... الاسد عايش على طوووووووووووووووول

فى احد الصفحات ... كتب احد السائحين عن تجربته مع البيجو 504 ... وانه اضاف على الكنبة الخلفية "تنك" بنزين .... وبعد كده عمل جولة كاملة فى استراليا

وبعد انتهاء الجولة اخذها منه احد الاصدقاء وذهب بها الى "انجلترا" ومازالت تعمل بكفاءة جدا

عربية لف بيها قارة استراليا ... عايزين كلام تانى بعد كده

مع اطيب التمنيات
اخوكم حسين غزالة

**samcar** · 12-12-2009 06:37 PM

المشاركة الأصلية كتبت بواسطة osama_ruan

كل سنة وانتم طيبين ياعم ام كلثوم بتقول اية يا فؤادي لا تسل اين الهوي كان صرحا من خيال فهوي

هو مين اللى هوى ده يا باشا- فين السزوكى سويفت اللى نزلت سنه 1993 ب 54 الف جنيه - فين الاكسل اللى نزلت سنه 1997 - فين التمبرا اللى نزلت سنه 1998 - بلاش فين الفكترا اللى نزلت سنه 1994 ب 115 الف- شوف حالة اى واحده من دول وشوف حالة عربيه بيجو متحافظ عليها من سنه 1979 كانت ب 5000 جنيه
ده الجديد هو اللى كله وهم وخيال عربيات اخرها نهاية مده الضمان

**husseinoo** · 12-12-2009 09:34 PM

المشاركة الأصلية كتبت بواسطة samcar

هو مين اللى هوى ده يا باشا- فين السزوكى سويفت اللى نزلت سنه 1993 ب 54 الف جنيه - فين الاكسل اللى نزلت سنه 1997 - فين التمبرا اللى نزلت سنه 1998 - بلاش فين الفكترا اللى نزلت سنه 1994 ب 115 الف- شوف حالة اى واحده من دول وشوف حالة عربيه بيجو متحافظ عليها من سنه 1979 كانت ب 5000 جنيه
ده الجديد هو اللى كله وهم وخيال عربيات اخرها نهاية مده الضمان