ممكن حضرتك تقولنا الطريق بالتفصيل ؟؟
عرض للطباعة
و انت فى ميدان التحرير و جاى من ناحية القصر العينى هتخش يمين كأنك رايح باب اللوق (لو جاي من ناحية عبد المنعم رياض كأنك هتخش شمال بي طبعا هتلف الميدان) و انت بتلف الميدان هتلاقى قدامك 3 اختيارات يمين قوى (ده باب اللوق) و يمين حاجه بسيطه و ده طلعت حرب و طوالى تطلع على عبد المنعم رياض تانى ... تخليك فى باب اللوق و تمشى طوالى بعد شويه هتعدى اشارة شريف و بعدها فى اشاره تانيه تخش شمال (ده شارع محمد فريد) هتعدى الميدان و بعديه تقاطع و طوالى هتلاقى برج بنك مصر على اليمين و اشارة ميدان مصطفى كامل ... عدى الميدان برضه و خش الشارع اللى بعده (عبد الخالق ثروت) يمين و عند الاشاره انت فى ميدان الاوبرا و مدخل النفق هتلاقيه فى وشك بعد الميدان (خللى بالك لو طلعت الكوبرى هتوصل برضه بس دخلة صلاح سالم فى اتجاه مدينة نصر بتتوه ساعات و تطلعك فى اتجاه الجيزه فخليك فى النفق افضل) هتطلع من النفق تبقى كده فى صلاح سالم فى اتجاه مدينة نصر ... لو عايز تكمل فيه ممكن بس انا عن نفسى بعد ما اعدى كوبرى الفردوس (اول كوبرى بعد النفق) و قبل الكوبرى اللى فوق امتداد رمسيس بخش يمين فى شارع السكه البيضه و امشى فيه طوالى (خلى بالك فى مزلقان بعد تلته الاولانى) لحد الاوتوستراد و الف يوترن ابقى عند نادى المقاولين و اروح اى حته فى مدينة نصر من هناك (طوالى اوتوستراد او يمين من تحت اخر كزبرى اكتوبر في شمال عند اوليمبيك جروب و اخد مصطفى النحاس من اوله)
لو قلت رايح فين فى مدينة نصر اقدر ارشحلك افضل طريق من وجهة نظرى
يا راجل ده كده الف شكر .. شرح حضرتك ممتاز
بس فى كام سؤال كده برده ..معلش
هل النفق ليه مواعيد ؟ و عاوز اعرف مداخل و مخارج كوبرى و نفق الأزهر
وجزاك الله خيرا
النفق ليه مواعيد ... مش متأكد من 5 او 6 صباحا لحد 12 ليلا (و ساعات 1)
النفق مدخل واحد و مخرج واحد بيوصل من صلاح سالم لميدان الاوبرا و العكس
الكوبرى من ميدان الاوبرا تنزل عند جامع الازهر و طوالى الحسين على الشمال و مستشفى الحسين الجامعى يمين ... هناك الطريق بيلف سنه بسيطه شمال ... لو كملت طوالى هتخش صلاح سالم فى اتجاه القلعه يمين او شمال تلف مع مشيخة الازهر ... علشان تخش صلاح سالم فى اتجاه مدينة نصر يبقى بعد ما تعدى مستشفى الحسين (و الطريق يلف سنه بسيطه شمال) ب 50-100 متر كده هتلاقى فتحه يمين تاخدها هتنزل نفق اسمه نفق المماليك تحت صلاح سالم و تطلع منه شمال و كده هتكون فى السليم
والله موضوع ممتاز بارك الله فيكم
على كده نفق المماليك بيلحم مع نفق الأزهر فى المطلع عند صلاح سالم فى اتجاه مدينه نصر .. صح كده ولا فهمت غلط ؟
سؤاااااااال تانى .. عارف انى كرهتك فى المنتدى اساسا اليومين دول !! بس اعذرنى حضرتك من الناس اللى عندها خبره كبيره فى الطرق وفرصه كبيره نتعلم منك
لو انا رايح الحسين .. من وسط البلد قول ميدان الأوبرا.. هاخد الكوبرى و فى اخره خلاص الحسين ع شمالى زى ماحضرتك قلت .. بس المشكله فى الركنه .. فين احسن و اسرع مكان للركن فى المنطقه ؟
و لو رايح من صلاح سالم للحسين برده ايه احسن طريق و اسرع ركنه ؟
وجزاك الله خيرا :)
نفق المماليك مجرد حفره تحت صلاح سالم و مخرجه بيطلع فى الحاره اللى بعد 100 متر تلاقى اللى طالع من نفق الازهر على شمالك .. يبقى انت فهمت صح
متقولش كده .. المهم توصل بالسلامه
بص يا سيدى ... بعد نزلة الكوبرى على طول على اليمين فى محل جاد .. قبليه فى حته يمين كده ساعات بيركنو فيها بس انا مبحبهاش ... اللى بعملو انى بكمل و عند مستشفى الحسين فى باركنج بالساعه (الساعه رخيصه يعنى لو هتعد 3-4 ساعات مش هتوصل 5 جنيه بس هتراضى الراجل اللى هيركنك و يطوقلك العربيه) بس ساعات بيكون مليان ... فى ناس بتخليك تركن فى الشارع الضيق يمين (سور المستشفى قبل الباركنج) بس ده هيقولك عشره جنيه ...
لو رايح من صلاح سالم بتخش قبل نفق الازهر يمين و بعدين شمال ... هتوصل فى وش مستشفى الحسين ... هتكون عايز تخش يمين علشان توصل الحسين ... متخشش .. اركن فى اى حته على الشمال لو في .. او هتلاقى اشاره هناك لو حد هيعدى لمستشفى الحسين ... عديها و اركن فى الباركنج (ساعات الاشاره دى بيكونو قافلينها و مفيش حد يعدى) ...
لو اتزنقت و دخلت ناحية الحسين و معرفتش تركن ... امشى طوالى و اطلع اول مطلع كوبرى و لف من ميدان الاوبرا و ارجع تانى ... هتوفر كتير علشان لو مطلعتش اول مطلع هتلف و ترجع من العتبه و الدنيا بتبقى زحمه موت
كلام زى الفل .. تسلم اديك و كيبوردك والله يا استاذ محمد
جزاك الله خيرا
تيجى بالسلامه و لو فى اى استفسار تانى انا فى الخدمه