أعرف منين إن الموتور جايب طقم شنبر

**thedeveloper87** · 23-09-2009 12:53 PM

السلام عليكم ورحمة الله وبركاته
يا جماعة أعرف منين إن الموتور جايب طقم شنبر.
الزيت عندي بينقص بس مفيش دخنة زرقاء والسحب ماشاء الله تمام والبوجيهات لسة مغيرها وبصيت على البوجيهات القديمة طالعة زي الفل الحمدلله. بس تقريبا العمة فيها زيت مطرح خرطوم الفايظ وكل لما أمسحه يجيب زيت تاني كل فترة كبيرة(شهر تقريبا).
ده كده طقم شنبر ولا كاوتشات صباب، اعذروني أنا لسة جديد في موضوع العربيات ده.

**SAMEH_FOUAD** · 23-09-2009 02:39 PM

كدة انت عندك طقم شنبر والماتور خفيف ,والحقة عشان مابيوظش حاجة تانى وبالمرة وانت بتفك شيك على كاوتش الصمامات ومن الافضل انك تغيرة بالمرة

**MMamdouh** · 23-09-2009 03:20 PM

لو العربية فيها طقم شنبر حتدخن من الشكمان و البوجيهات حتعرق زيت و كمية الابخرة اللى حتطلع من خرطوم الفايظ حتبقى كبيرة

خرطوم الفايظ بطبيعتة ممكن يعرق زيت... دة مش معناه ان العربية فيها شمبر... اكتر حاجة تدل على ان العربية فيها شنبر هو ضعف الاداء و كمان اختبار الكبس

MMamdouh

**tabeb** · 23-09-2009 03:33 PM

طيب ايه اللي بيتغير تاني في النص عمرة غير الشنبر؟وهل بنزينة شل الهرم فيها اختبار كبس الموتور؟

**MMamdouh** · 23-09-2009 04:20 PM

المشاركة الأصلية كتبت بواسطة thedeveloper87

هو ايه اختبار الكبس ده؟ وأعمله فين وبكام؟

اختبار الكبس ببساطة شديدة هو قياس الضغط داخل غرفة الحريق... لو الضغط اقل بكتير من الموصى به فى كتالوج السيارة او فيه فروق كبيرة ببين البساتم و بعضها يبقى فيه تهريب للكبس... لو اتعاد الاختبار تانى بس بعد اضافة شوية زيت موتور من خلال فتحة البوجية و النتائج اتحسنت يبقى فيه مشكلة فى الشنبر... لو النتيجة هى هى تبقى مشكلة صبابات

اعتقد كالتكس اللى على ناصية عباس العقاد و النحاس فيها القصة دى

MMamdouh

**SAMEH_FOUAD** · 23-09-2009 04:43 PM

مش شرط ان يكون الماتور خفيف انة يخرج دخان من الشكمان ,هو دلوقتى بيقول فى زيت بينقص باستمرار وبيلاقى زيت تحت غطاء العمة
طيب هاسالك سؤال ؟؟؟
الزيت اللى بينقص قد اية وفى اى ظروف تشغيل يعنى لو ماشى عادى او فى حالة القرص بس ؟