عايز عفش شيك ومش غالي

**A.Lotfy** · 23-09-2009 01:32 PM

السلام عليكم

ازيكو يا جماعة وكل سنة وانتو طيبين
أنا عايز افرش البيت عندي سفرة وأنتريه بمبلغ بسيط وكنت عايز أعرف اماكن بتبيع عفش مش غالي
وهل الصيني الموجود كويس ولا مضروب وبيتباع فين وايه الاسعار

أرجو مساعدتي في هذا الموضوع

1000 شكر مقدما

**محمد عز** · 23-09-2009 01:38 PM

قولنا الميزانيه ايه واحنا نقدر نساعدك

على العموم لو قدرت تنزل دمياط يبقى احسن

لان فيها جميع الاسعار وحاجات بتبقى حلوة

والبضاعه ذات الجودة العاليه والتقفيل الممتاز فى الغالب بتبقى فى المعارض الكبيره وبتبقى غاليه الثمن نوعا ما

ولكن هناك ورش بتقدم عفش جيد مشابه وباسعار منافسه جدا

**m000dy** · 23-09-2009 01:52 PM

واحد صاحبى نزل دمياط النهارده يجيب عفش جوازه ( الله يرحمه كان روش وصغنن )
اول مايرجع هاقوللك ايه النظام هناك والاسعار عامله ايه
بس قبل مايروح كان فى ناس اصحابنا قاعدين معاه وفطموه ان الحاجه ام عشرين الف تبدأ انت فيها من 5 وتطلع واحده واحده هتاخدها ب 7 او 8 بالكتير
واوعى تمشى وتخليهم يحملولك العفش تانى يوم
تاخده وانت واقف عشان ماحدش يبدله

**elansary** · 23-09-2009 02:01 PM

بص ياباشا عليك وعلي دمياط في كل اللي انت عاوزه بص فاصل جاااااااااااااااامد وخلي بالك هما بغيرو الحاجات يعني ممكن تلاقي نفسك اشتريت حاجة غير اللي اتفاقت عليها عموما انت ميزانيتك كام بالنسبة للانتريهات بتبدا من 3000 جنية وطبعا في اقل بس ورق وبالنسبة للسفرة من 5000 الي كتيييييييييييييير وربنا يوفقك

**M.Mosaad** · 23-09-2009 03:26 PM

نصيحه لو مش بتفهم في الخشب بلاش دمياط لان هيضحك عليك حيضحك عليك و لو بتفهم فيه و شوفت حاجة عجبتك شيلها و انت واقف متبعدشي عينك عنها لحد ماتحملها في عربيه
لو عاوز تريح نفسك في معرض تحفةةة انا جايب منه العفش بتاعي كله اسمه المضيفه هو مش عالي و لا رخيص بس بيعمل اللي انت عاوزة يعني عندهم كاتلوجات حاجات تحفةةة و شيك جدا و افكار جميله اوي المعرض هتلاقيه في ارض المعارض في معرض دايم هناك بتاع صناع الاثاث اسال عنه هناك و في كمان واحد تاني جنب توكيل بيجو شارع النزهه و المصنع قبل القناطر في حته اسمها ابو الغيط بس مش هفيدك لاني نسيت المكان ممكن تنزل هناك و تسال