اعمل السبوع ازاي؟

**rov** · 23-09-2009 02:09 PM

السلام عليكم ورحمه الله وبركاته
الموضوع بصراحه اني جيلي مولود وعاوز اعمل عقيقه بدل السبوع
بس عاوز اعملها بشكل شيك وراقي
يعني مش عاوز اسمع كلام ابوك والهون والحاجات اللي ممكن تأذي البيبي
يعني انا حجيب خروف واسويه بره ...وبعد كده اعمل السبوع ازاي
حد عنده خبره من الناس اللي عملوا قبل كده
واللي ما عملش بقي ربنا يرزقه ويعمل

انا كل اللي بتمناه افكار جديده ولذيذه وراقيه

استودعكم الله

**أبو إياد** · 23-09-2009 02:21 PM

الف مبروك مقدما وربنا يباركلك فيه باذن الله

انا عملت كده جيبت خروف و معاهم 5 ك ارز بسمتك و سويهم بره بصراحه احسن من الفته الكل بياكل لكن الفته مش هتتاكل

وفى البيت بقا يوم للاهل ويوم لاصدقائك وزمايلك

**Ahmed A Rahman** · 23-09-2009 02:27 PM

لما ربنا رزقني ببنتي من 3 شهور فكرت زيك كده بس هي كانت تعبانة شوية في اول اسبوع فاضطريت اني ااجل الموضوع لحاد ما نام لوحده وقررت اني اعمل لها عقيقة احسن في عيد ميلادها لما تتم سنة..

بالنسبة لو عايز تعمل سبوع
* بالمناسبة انا كنت سمعت قبل كده عن بحث طبي بيقول ان الهون واسمع كلام ابوك في اليوم السابع بينبه مخ الطفل وبيزود الدماء في الاذن الداخلية انما طبعا مش مقصود الصوت العالي اوي اللي يؤذي الاذن.
* انزل ميدان العتبة اول شارع الجيش وحتلاقي الف محل جنب بعض كلهم حيشدوا فيك, اول ما حتتكلم معاه حيصور لك ان الموضوع في اللذيذ مش حيكلف ميت جنيه

* لكن بعد ما تسمع منه بانتباه حتكتشف ان القطعة الفخار اكتر من خمسين نوع وكل نوع بسعر من اول 75 قرش لحاد 10 جنيه

اللفة اللي بيتلف بيها الهدية ليها سعر
الفيونكة اللي بتتربط بيها اللفة ليها سعر
الكروت اللي في اللفة انواع
دا حتى الحلويات اللي جواها انواع يعني الولد قالي بص حدوقك حاجة بس مش حتعجبك !!!! والمهم اني دقتها منه !!! (مش عارف كان مالي اليوم ده) كنت حرجع من اللوزه اللي دقتها الزيت اللي فيها مزرنخ وريحتها وحشة

ودوقني واحدة ثانية كان طعمها حلو اوي وطازة
المهم ان الاولى ب 10 جنيه الكيلو والثانية بحوالي خمسين جنيه الكيلو

يعني من الاخر كل حاجه وليها سعر ممكن تعمل سبوع بميت جنيه وممكن تعمله بالف جنيه

ونصيحة ليك لو حتعمل سبوع مش تسيب له الفلوس وتمشي وتيجي كمان يومين لأ
قوله انا عايزهم دلوقتي لإما حمشي ومش راجع ثاني
وهو حيجيب ناس من تحت الارض يعملوها لك عشان دول احسن ناس تخم.

**remomemo** · 23-09-2009 02:52 PM

لو انت ناوى تكلف فى محلات متخصصة فى المناسبات دى يعنى يعملو decoration وحركات انت طبعا هاتعمل بوفيه شيك موش لازم يكون فظيع فى حدود امكانياتك برده بس رتبه حلو عشان يبان كبير يعنى ممكن عشان البهدلة انك الحاجة تتطبخ بره شوفلك حد من عند كوشيه ولا باسترودس او سان جيوفانى والباقى الرز وكده ممكن يتعمل بالبيت ويكون النظام بوفيه مفتوح بس اللحوم تكون متقطعة عشان البهدلة وادوات المائدة نصيحة بلاستيك مفيش حد ممكن يغسل بعد العزومة الكبيرة دى ههههههههههه ومكان لو متاح فى الشقة لاطفال الناس اللى هاتعزمهم ده اللى ممكن يكون فيه الديكور ده هاتلاقى الكبار قاعدين فى جو ظريف وبياكلو اهم حاجة هههههه بهدوء وفى نفس الوقت الجو موش شكله رسمى اوى فى اطفال برده جو سبوع من غير مهرجانات مالهاش لازمة وهون وكده

**remomemo** · 23-09-2009 03:11 PM

المشاركة الأصلية كتبت بواسطة rov

بصي يا ريمو انا شايفك انك من الاسكندريه
وده شئ كويس اني زيك من الاسكندريه
دلوقتي بقي تعرفي تحديديلي ايه المطاعم اللي ممكن تعمل كده
انا فكرت في نادي المهدسين....واجيبلوهم خروف
وهما يعملوا الرز بالخالطه ويسرفزوا عالناس وكانز وكده وخلاص
قوليلي ايه رايك ؟ وايه الجديد عندك
البنات عندهم افكار لذيذه

شوف يا سيدى بالنسبة للاكل احسن طباخ كوشيه وسان جيوفانى معروف بس ماعرفش السعر انا اللى اعرفه طباخ كان بيشتغل فى باسترودس اللى عاجبنى فيه انه شيك يعنى فى السيرفيس يحسس الناس اللى موجودين انهم فى جو لطيف (موش مبالغ فيه اوعى تحسس ضيوفك انهم موش فى بيت دى من اصول الضيافة ) بالنسبة لديكور السبوع ده محل فى كفر عبده انا على فكرة ماعرفهوش شفت بس صور عشان ما تقلسشباعمل دعايه ههههه لمهندسة ديكور decoration for events والكلام ده بس انت ممكن جدا توفر على نفسك وتروح تشترى بلالين هيلايم من المنشية وتتنفخ هوا عادى بس تكون لون واحد مع بعض موش زيطة وزمبليطة المراجيح دى وتتحط باركان البيت تدى جو شيك اوى غير البالونات العادية وفى نفس الوقت الاطفال اولاد المعازيم كل واحد ياخد واحدة وهو ماشى هايفرو اوى وكمان بالمرة ينضفو الشقة هههههههه لو عندك living room يا ريت الاطفال يتحبسو فيها بعد ازالة اى اشياء ثمبنة منها
نصائح عامة اكيد تربيزة سفرة تكفى العدد ده فزى ما قلت بوفيه مفتوح فى الحالة دى انت محتاج عدد من ترابيزات الاركان لان الاكل لوم مجتاجة تحط الطبق عليها وخدعة صغيرة لو الريسيبشن صغير اوى انت او المدام تقعدوا اقفو وكلو وانتو واقفين لييييه خلى جو الحفلة زى الريسيبشن لما هى بالذات تقف هاتلاقى الناس اللى فى سنكم بالذات خد حريتهم واتحركو موش كل ضيف جاى عايزله كرسى وجو المتاحف ده ههههههه
اسفة على الاطالة وطبعا الف مبروك

**remomemo** · 23-09-2009 03:32 PM

المشاركة الأصلية كتبت بواسطة rov

ريمو متشكر جدا علي تعبك
طيب مقولتليش رايك ....ايه رايك لو عملته في مطعم بره ؟ ووفرت البهدله والشيف والكلام ده...
ولو انتي محبزه الفكره عندك اسماء مطاعم ممكن احجزها ساعتين
وشكرا

مطعم بره هايكلف اكتر وكمان هاتوزع من العقيقة ازاى ؟ اسال المدام احنا مخنا صغير فى الحاجات دى ممكن تكلف نفسك اد كده و بعد سنه تقلك ماعملتليش سبوع توقع اى شىء

وبالنسبة للمطاعم انا ماعرفش مطاعم كتير وموش عارفة ميزانيتك بس الى انا رحتها وحلو الاكل فيها سان جيوفانى وتيكاجريل وفى المحروسة عامة فى قعدة معروفة فى اسكندرية اى حد بياخد اكله من مطاعم سان جيوفانى ممتاز بس الا السلاملك (لو عايز تترسم اوى على حد ممكن ههههههه) وهو اصلا ماينفعكش فى المناسبة بتاعتك عقيقة فى مطعم مممممممم عايزة ميزانية كبيرة بس لو الناس قريبين اوى اى مطعم مشويات على عشاء هاتقضى وقت ظريف من غير اى ترتيبات ضيافة وسعره احسن طبعا وفى الحالة دى يبقى معاك فلوس عشان توزع فى اى مسجد ماتنساش انها عقيقة