النمر بيجرى ليه وراء العربية-مقال رائع لابراهيم عيسى
النمر يجري وراء العربية؟
مقال لابراهيم عيسى
ساعة ما يستلمني أولاد أخواتي بالفوازير بتاعتهم تبقي ساعة رخامة؛ ففوازيرهم تسخر من الفوازير وغالبًا تسخر ممن يسمعها كذلك وتستخف بفكرة البحث عن حل منطقي في واقع غير منطقي إطلاقًا، أكيد خنقك عيل من عائلتك وسألك أسئلة من نوعية:
يا عمو أو يا خالو ليه الفراعنة كانوا عيال؟
فتفكر أنت وتفتكر المسألة محتاجة علمًا وتاريخًا فيلحقك هو بالإجابة:طبعا عشان كانوا بيكتبوا علي الحيطة!
تفهم أنت اللعبة وتدرك أنها فوازير جيل جديد قرر أنه لا شيء يستحق الغموض ولا المسألة محتاجة فزورة ولا مفزراتي، فهمك للعبة لا يمكن أن يجعلك قادرًا علي المشاركة فيها، فمهما كانت قدراتك فالعيال أرخم منك وأكثر عبثية، خذ مثلاً:
ليه القطر بيقف علي المحطة؟.. عشان مش بيعرف يقعد،
أو فزورة الفراعنة كانوا بيقولوا إيه لبعض بعدالصلاة؟.. هَرَمًا،
ثم ليه المترو مهم؟.. عشان تحتيه خطين!
حاول أن تقلدهم واسألهم عن فوازير من نوع:
ليه القطر بيقف قدام الصيدلية؟ سيصرخون في وجهك: عشان يعاكس القطرة،
أو تعمل فيها فهيمًا تسأل: ليه النمر بيجري ورا العربية؟. سيجيبون فورًا: عشان يشوف النمرة.
إنه جيل صايع في العبثية، فقد انتهي عصر فوازير أيامنا وبدأت بقوة منذ فترة هذه الفوازير التي تعبر عن مجتمع يسأل أسئلة عبثية ويجيب عنها بإجابات من المعقوليزم!
لكن عمومًا هذه فرصة لأقول لأبناء أخواتي إنني لا أجيد حل فوازيرهم، فمصر كلها أصبحت فزورة كبيرة، فلا أحد يفهم حلها ولا يعرف رأسها من رجلها فقد صدمتني عدة فوازير أخري طرحها علي مسامعي شخص لطيف قابلني بالصدفة
وقال لي: كيف تفسر أن الحكومة سجنت شيخًا؛ لأنه متهم بالإساءة إلي الصحابة الكرام، بينما منحت جائزة الدولة لكاتب متهم بأنه أساء إلي رب ونبي هؤلاء الصحابة؟
اعتبرت سؤاله لغزًا وفزورة، ثم سارع وأضاف: وكيف يقدم 47 نائبًا وثائق وملفات تتهم وزيرًا سابقًا بالفساد والتربح فإذا بهذا الوزير السابق يتم تعيينه رئيسًا لشركة حكومية يتقاضي راتبًا قدره مليون ومائتا ألف جنيه والفزورة مش هنا يا بيه لكن في إنه مش محتاج فهو مليونير، والفزورة الأنكت مش هنا يا بيه الفزورة الكبيرة إنه اللي عينه ليس مجبرًا علي تعيينه ولن يضيف له شيئًا؟
طبعًا كان يمكن أن أضيف إليه فزورة كيف يصبح رئيس لجنة الأحزاب التي توافق أو ترفض إنشاء الأحزاب هو أمين عام الحزب الحاكم نفسه؟ وكيف يكون رئيس لجنة الخطة والموازنة في البرلمان مليارديرًا لم يدرس الاقتصاد؟! ثم كيف يكون رجال الأعمال محتكرين للسلع ولمقاعد البرلمان وهم الذين يحددون إصدار قانون منع الاحتكار؟ وأنه عندنا هيئة جودة تعليم رغم إن مفيش عندنا تعليم؟ وأن الدولة بتعاير الشعب بأنها أقامت شبكات صرف صحي ثم طلع إنهم بيصرفوا الصرف الصحي في مواسير مياه الشرب غير الصحي؟!
لكنني لم أضف للرجل الذي تركني منصرفًا أيًا من هذه الفوازير، وبسرعة كلمت أقاربي العيال وسألتهم أخبار الفوازير الجديدة إيه؟ جاءت الردود عاجلة وكأنهم ما صدقوا:
ليه ساندوتشات الكفتة والبطاطس بتجري؟.. عشان وجبات سريعة،
ليه النملة مش بترضي تركب الفيل قدامها علي العجلة؟.. عشان بيلعب في الجرس،
طيب ليه القرد سريع؟.. عشان القرد في عين أمه غزال،
ثم خد عندك: أول مخلوق ظهر علي الأرض هو الحمار الوحشي ليه؟.. عشان لونه أبيض وأسود.
في آخر المكالمة سألوني: ألم تتعلم ياخالو أي فزورة جديدة؟
أجبته: يا حبيبي أنا أي فزورة أحفظها في حياتي لها إجابة واحدة.. طبعًا إنتم عارفينها فينطلقون في الضحك: «العفو» يا خالو!!
