طيب وايه اخبار البيتل هناك يااستاذ حسين
طيب وايه اخبار البيتل هناك يااستاذ حسين
متابع بإهتمام
اللهم صل على محمد وعلى آله وصحبه أجمعين
حبيب قلبى هاشم
البيتل ... والله وانا بتفرج عليها كنت فى بالى انت واحمد حسن واحمد سالم
وجدت التالى
وجدت بيتل اصحابها "رشينها" من الخارج ولكن من الداخل موش تمام
وجدت سيارتين بيتل
الاولى سوداء موديل قديم اعتقد اوائل الستينات ... لان فانوسها الخلفى صغير قوى ... وكانت واخدة وش "دهان" اسود بس حكاية ... وكل الناس كانوا بيتفرجوا عليها باعجاب .. وكان بجوارها بيتل حمراء احدث شوية ... ولما بصيت على الموتور بتركيز ... وجدت آثار زيت "تعريق زيت" ... قلت لنفسى الله اعلم ده طبيعى فى العربيات القديمة ولا الموتور حالته موش تمام
الغريبة ان اللى كان بيركن العربية السوداء كان شكله "تاجر" وان العربيتين كانوا تبعه
لكنى لم اجد سيارة بيتل واحدة حديثة مثلا موديل 78 وانت طالع "او برازيلى" ... ووجدت ان اغلب السيارات البيتل معمول لها تعديل الكاوتش العريض
لكن مافيش واحد فيهم كان روش وعامل حاجة شاذه فى السيارة او اقصى حاجة شفتها ... شوية بونية معقولين من الخارج وكاوتش عريض ... خلاف كده مفيش
بس كان فيه بيتل الى حد ما حوالى 5 او 6 عربيات على الاقل فى "البارك" اللى بيدفعوا فيه فلوس موش فى الشارع الرئيسى من الخارج
انا شفت سيارتك ... "ما شاء الله ولا حول ولا قوة الا بالله" ... ربنا يبارك لك فيها "جميلة" وبالمقارنه باللى انا شفته .. بصراحة "لأ" تعتبر حالتها ونظافتها كويسة جدا
كمان ماتنساش انى نازل السوق اتفرج على حاجة معينة "131 ـ شاهين ـ مازدا 323 ـ سويفت ـ بيجو " عشان كده كنت اتفرج على البيتل من بعيد فقط
وشوفت سيارات "لقطة" ... مثل الداتسون القديم ... اول ما نزلت فاكرها ... والله كانت جميلة جدا ... لكن عايزه واحد فاهم فى العربيات وعارف هايعمل معاها ايه خصوصا لو احتاجت اى قطع غيار ... هى حجمها كان صغير لأن "اليابانين صغيرين" اساسا ههههههه لكن عربية رائعة
رأى انك لا تستعجل ... لان السوق مولع والناس لا يوجد عندها رحمة .. والافضل الشراء من المعارف لو فيه حاجة لقطة ... خلاف كده الانتظار افضل ... والله اعلم
مع اطيب التمنيات
اخوك حسين غزالة
الف شكر يااستاذ حسين على التعليق والوصف التفصيلى
بصراحه سردك للاحداث فى غايه الدقه
جزاك الله كل خير
السلام عليكم ورحمة الله وبركاته
أخى الكريم حسين
صدقنى أنا كنت زيك فى نفس الحيرة قبل شراء البيتل اللى إشترتها غاليه جداً جداً فى الوقت اللى كانت ال 128 بتتباع ب 25 ألف و لا 131 النضيفة من 32 ألف و الريجاتا النضيفة من 30 ألف و إنت طالع و الماذدا من 25 ألف و هكذا.
اللى كان يهمنى هى الحالة النضيفة و الإعتمادية و تكون قطع الغيار معمرة و متوفرة لغاية لما رسيت على البيتل بتاعتى لأن أسرتى مش كبيرة و بسافر كتير بالعربية فعاوز عربية أدور و أمشى على طول و ثابته و كمان شكلها روش و ظريف.
- الماذدا عربية ممتازة بس من النادر تلاقى عربية نضيفة و مش ملعوب فيها و من الصعب تلاقى عربية نضيفة إلا بسعر عالى
- 131 عربية قوية لكن للأسف الغالبية العظمى كانت تاكسى و متهانة و من الصعب بردو تلاقى عربية نضيفة إلا بسعر عالى
- الريجاتا ممتازة و تعديل 131 و قريبة و أفضل من الشاهين فى رأى لأنها أوسع و جر أمامى لكن نادر لما تلاقى عربية نضيفة بعيدة عن البارومة أو تابلوها حالته كويسه لأنه ضعيف جداً.
- اللادا ممتازة و مناسبة جداً ليك و خاصة إن منها موديلات فوق التسعينات و سعرها معقول بس المهم الحالة النضيفة طبعاً
- البيتل طبعاً ممتازة جداً جداً فى كل شىء لكن يعيبها إنها بابين فقط لو أسرتك كبيرة و موديلات قديمة لكن طبعاً لو مش بتفكر فى الموديل و 4 باب يبقى طبعاً البيتل النضيفة خير إختيار.
و ده من وجهه نظرى الخاصة و ليس تعميم
و ربنا يوفقك لما فيه الخير و الصالح إن شاء الله
بعد اذنك يابو عمر ليا تعقيب بسيط
الشاهين هى التعديل لل131 بكل فنياتها
اخر موديل ل131 كان 1984 صنع تركى
واول موديل للشاهين كان الدوجان1990 صنع تركى برضه
واعتمدو فيه على موتور ال131 وتكبير البودى وتعديل بسيط فى العفشه
مع زيادة الكماليات زى الباور والتكييف والزجاج كهرباء
وبعد كده جمعتها النصر للسيارات برضه بمواتير ال131 حتى سنة 1997
استعانو بمواتير التمبرا انجيكشن
لكن الريجاتا هى التعديل ل128 بس موتور 1500 لكن نفس عفشة ال128
مع زيادة الكماليات برضه
السلام عليكم ورحمة الله وبركاته
تصدق بالله يا هاشم
والله انا ادخل منتدى الفولكس عشان اسأل على سيارات ليست تخصص فولكس ده عشان بس وفاء الاعضاء زيك وزى الاستاذ احمد حسن والاستاذ احمد سالم وكل الاخوة الافاضل فى المنتدى
بالأمس كنت مع واحد صاحبى راكب معاه سيارته "باجيرو" ... حسيت انى فوق وكل السيارات تحت حاجة تخوف بصراحة
المهم الراجل عنده سيارة بيجو 504 "سياحة" .... قلت له كل اللى حصل وشفته فى السوق بتاع السيارات
قال لى حاجة غريبة قوى
قالى هاقولك على حاجة مهمة ده لو كنت عايز نصيحتى
الاول: تروح تتعلم السواقة فى مدرسة قيادة ... وبعد ما تخلص التدريب تشوف نفسك انت متقبل موضوع السواقة ده ... انت ماشى كويس فيه ... ولا خايف والموضوع ده عمل لك قلق ... خصوصا ان الشوارع زحمة ومقرفة ... لو قررت انك كويس ومصمم تكمل فى موضوع السيارة ... يبقى تعيد التعليم مرة ثانية لكن فى مدرسة قيادة اخرى ... ورشح لى مدرسة قيادة تابعة لحى مصر الجديدة بجوار المحكمة ... وقال لى اسعارهم "حنينة" ...
لان حرام انك تشترى وتتعلم وتخبط فى عربيتك وتكلف نفسك 2000 او 3000 جنيه سمكرة وصيانة وانت لسه بتقول يا هادى
ثانيا: اذا رحت تتعلم ما تركبش العربيات الجديدة ... اتعلم على عربية "نص نقل" انا عايزك تشقى وتركب عربية صعبة شوية .... عشان تتعلم حقيقى وكمان عشان اللى بيعلمك ما "يدققش معاك فى الوقت"
ثالثا: سيبك من الفيات كله ... مع احترامى لحبيب قلبى هاشم وكل الاصدقاء الاعزاء .... قال سيبك من الفيات كله ولو كنت مصمم نشوف لك عربية بيجو حالة كويسة
قلت له يعنى تعمل كام ... قال الحالة الكويسة دى هاتكون فى حدود 25000 الف جنيه ... ممكن تلاقى بـ 22000 لكن النظيف لن يقل عن 25 الف
وكمان ذكر لى انه شاف سيارة موديل 1971 "بس حكاية" فابريكة وصاحبها موش عايز يتنازل عن 35000 الف جنيه ... وانها سيارة تهبل بجد
هو على فكرة معاه تاكسى "سياحة" بيجو 504 استيشن
وقال لى انت عارف موضوع الاحلال ده انا عملت فيه ايه
قلت له : ايه
قال لى : انا رفضت بيع او تسليم عربيتى .... انا اخدت النمر وحطيتها على عربية ... موش فاكر نوعها لكن انا فاكر انه كان معاه عربية ملاكى "بشوكها"
وباع الملاكى بنمر الاجرة ... واحتفظ بالبيجو
لكن بصراحة ماشاء الله ولا حول ولا قوة الا بالله ... السيارة اللى معاه ما شاء الله "رائعة" ربنا يبارك له فيها ويسترها معاه
وقال لى كمان: انا فردة كاوتش فى البيجو "برقبة اى عربية فيات"
قلت له طيب وايه رايك فى "المازدا 323"
قال لى: هى عربية حلوة لكن البيجو افضل ليه ؟
1- لو لا قدر الله البيجو عطلت منك ... اركنها فى اى حتة ... ويقدر اى ميكانيكى يمشيها لك لحد ما تعرف تعالج سبب المشكلة
2- مافيش ميكانيكى فيكى يا مصر الا وبيفهم فى البيجو
3- ده طبعا بخلاف اليابانى
4- اليابانى ممتاز ... ولكن اللى بيعطل يتغير ما ينفعش فيه تصليح
وضرب مثال "بطرمبة المياه" عنده ...
5- انا مرة رحت شرم الشيخ ورجعت فى نفس اليوم "صد رد" عمرها ما خذلتنى اكثر من 1400 كيلوا
6- كفاية ان اى مسمار هاتحطه فيها "هايعمر فيها" ... موش اكنك بترمى فلوس فى الشارع
7- وكمان السيارة بيجو 505 ممكن تاخد منها حاجات كثيير وتركب برده فى البيجو 504
ٌٌقال: طرمبة المياه الوحيدة اللى ممكن يتعمل لها حشو بـ 30 او 40 جنيه وتمشى حالك ... والحشو ده ممكن يتعملها مرة او مرتين ... وبعد كده ممكن تغير الطرمبة
حتى لو غيرتها انزل السوق قطع الغيار فى كل حتة ... هاتلاقى الفرنساوى الاصلى بحوالى 600 جنيه ... موش عاجبك اشترى الايطالى ... او اشترى التايوانى بحوالى 150 جنيه
لو ركبت الفرنساوى انسى الموضوع ده هاتفضل معاك اكثر من 20 سنة لو ركبت التايوانى 4 او 5 سنين على ما تغيرها
قلت له طيب عمرة الماتور اخبارها ايه
قال: البيجو السيارة الوحيدة اللى تشترى موش فاكر "تقريبا البساتم مع حاجة تانية" مجموعة كاملة تروح للخراط يضبطها وتركب وتمشى "مافيش حاجة اسمها تلين العربية والحوارات دى" ... اركب وامشى
قلت له : يعنى العمرة تمشيك 6 او 7 سنين ....
قال لى : سبع سنين ايه ده انا عاملها من اكثر من 12 سنة يمكن عملت حاجة بسيطة فى الماتور لكن عمرى ماقربت منه
قلت تكلف كام
قال : لو هاتركب كل حاجة زى الكتاب ما بيقول "فرنساوى اصلى" تقريبا تخش فى حوالى 5000 جنيه
قلت له طيب ضريبة العربية
قال: حوالى 500 جنيه اكثر شوية من العربيات الثانية
قلت له: طيب استهلاك البنزين
قال: حوالى 170 كيلو فى الصفيحة
وتوقف الحوار عند 170 كيلوا فى الصفيحة ده فى المشى الداخلى لكن فى الطريق السريع تعمل حوالى 200 او اكثر
وكل شىء انا الى حد ما مقتنع بيه ولكن موضوع استهلاك البنزين ده عايز رايكم فيه ... طبعا كلكم عارفين انها 2000 سى سى .... اغلب الموجود فى مصر ... تقريبا ده الموضوع الوحيد اللى خوفنى بجد وعمال افكر فيه
ودى صورة على السريع للاسد الفرنساوى
http://img42.imageshack.us/img42/823...cabf422aeb.jpg
ودى صورة طبعا انتم يوميا بتشوفوها ... للاسد وهو حمال اسية فى مصر
http://img188.imageshack.us/img188/3...9a288b71ao.jpg
فى انتظار تفاعلاتكم وخبرتكم
شكرا مرة ثانية لكم
مع اطيب التمنيات
اخوكم حسين غزالة
[caution]
اللون الأحمر مخصص للمشاركات الإدارية فقط ( تنبيه 2 )
http://www.nilemotors.net/Nile/78489-a.html
مشرف الأوروبى 2[/caution]
السلام عليكم ورحمة الله وبركاته
اولا كلام صاحبك كله سليم
يكفى ان السياره ال504 كانت أفضل سياره فى مصر
بس كانت لكن دلوقتى شبح الموديل القديم اثر عليها بشكل ملحوظ
ومش معنى انى رشحتلك ال131 او حتى رشحت لنفسى شراء
شاهين ده حبا فى الفيات او اعتراف بكفائتها
انما للاسف وعن تجربه كبيره
السبب الرئيسى هو انتشارها اللى بياثر بالايجابيه
على كثرة قطع الغيار ورخص ثمنها ووفرة الميكانيكيه
ده غير سهولة اعادة البيع
انا عن نفسى مقتنع تماما ان ال504 افضل ميت مره من اى
عربيه فيات
لكن لما نحسبها بشكل عملى لو معايا 27000 جنيه مثلا
وقدامى شاهين مو1995 وعربيه 504 مو1971
والاثنين نفس السعر
شوف انت بقى واحكم
والمشكله الكبيره النهارده وفى بلدنا بالتحديد ومع فئات الشعب الكادح
لازم تحسبها صح قبل المجازفه بشراء العربيه
ايه اللى هيحصل بعد كده وايه ابعاد مابعد شراء العربيه دى
اعطال وقطع غيار وميكانيكيه
لو فكرت ولو سألت مش هتلاقى غير الرد القاطع
انك تفضل الفيات تمشيا مع ظروف السوق المصرى
انا جربت البيتل المانى
قطع غيار مش غاليه قوى لكن اغلى من الفيات ومعمره
عربيه جباره لابعد الحدود
وكمان هى افضل عندى من 131 بس على اساس استعمال فردى
مش اسرى يعنى
لكن نظرة الواقع ان معظم الناس تفضل شراء ال128 علشان اسريه
وسهله فى اعادة البيع وقطع غيار عند البقال واى مكوجى يصلحها
مع العلم انها فى الوقع عربيه ورق وكل يوم فى مشاكل
انا عارف ان الموضوع محير جدا جدا وانا مقدر اللى انت بتفكر فيه
والحيره فى اختيار النوع الامثل
على العموم انا هقولك على فكره جميله جدا
انزل عند اى محل قطع غيار بيجو وخد فكره سليمه عن الاسعار
بس حاول تاخد بيان باكثر عدد ممكن من قطع الغيار
وفى نفس الوقت انزل على محلات قطع غيار الفيات
واسال عن قطع غيار ال131 نفس الحاجات تقريبا
واعمل مقارنه مع نفسك واحسبها مع فرق استهلاك البنزين
وشوف ايه اللى يناسبك
ده غير انك ممكن تستعين فى المقارنه دى بأقسام المنتدى المختلفه
مابين العربيتين دول واكيد ان شاء الله هتطلع بنتيجه كويسه
واخيرا ربنا يوفقنا جميعا
راييى المتواضع هو 131 الانسب لك