كلاكس اللانوش قطع

**mohsen** · 26-09-2009 08:43 PM

لو سمحتوا

النهاردة الكلاكس صوته ضعف جدا ولما بطلت العربية لمدة ساعة ودورتها تانى قطع خالص
هل فيه اجراء سريع الواحد يعمله قبل مايروح لكهربائى

ولكم جزيل الشكر

**samirayad** · 26-09-2009 09:45 PM

فيه طبعا

أطمن على أن كتاوت الكلاكس راكب تمام على قاعدته فى علبة الفيوزات
أحتمال تكون مشكله بسيطه والكتاوت عاوز يتثبت كويس
ونفس الوضع بالنسبه لفيوز الكلاكس

**Akram** · 26-09-2009 11:54 PM

و لو مركب كتاوت خاجي اطمئن على الوصلات الخاصة بيه , كمان أكد على الوصلات الداخلة للكلاكس نفسه

**Strong** · 27-09-2009 03:49 AM

لو كان صوته بيخرف يعني شوية يضعف وشوية يكون قوي هيكون احتمال تلف الرق الداخلي اللي بيسموه الطبلة ودي بيغيرها في حدود 5 جنيه + المصنعية 3 جنيه للكلاكس الواحد وعمرها الإفتراضي كويس

ولو بدأ يضعف الصوت بشكل تدريجي ممكن يكون محتاج رجلاش لمسمار الصوت بتاعه لو معاك مفك قصير جدا في طوله ممكن تعمله بنفسك

**mohsen** · 27-09-2009 10:18 AM

المشاركة الأصلية كتبت بواسطة samirayad

فيه طبعا

أطمن على أن كتاوت الكلاكس راكب تمام على قاعدته فى علبة الفيوزات
أحتمال تكون مشكله بسيطه والكتاوت عاوز يتثبت كويس
ونفس الوضع بالنسبه لفيوز الكلاكس

انا خلعت الكتاوت وشكله كان سليم وركبته تانى وجيت اجرب سمعت صوت تكة لما بدوس على الكلاكس مع ان الاول مكنش فيه اى صوت
كذلك لما خلعت الفيوس لقيته سليم جربت ادوس والفيوز مخلوع ملقتش التكة ركبت الفيوز سمعت صوت التكة مع الضغط على الكلكس

هل صوت التكة ده معناه ان كل من الجزء اللى تحت الطارة سليم وبيوصل الكهربا وبرده الكتاوت والفيوز تمام وان المفروض ابص على القرص بتاع الكلكس(اللى راكب ادام سربنتينة التكييف) نفسه اذا كان الرق بتاعه باظ مثلا

**samirayad** · 27-09-2009 04:25 PM

انا خلعت الكتاوت وشكله كان سليم وركبته تانى وجيت اجرب سمعت صوت تكة لما بدوس على الكلاكس مع ان الاول مكنش فيه اى صوت

بالطريقه دى
فهناك أحتمال عيب بقاعدة الكتاوت ( الكتاوت مبوش فى مكانه )
وعاوز يتحكم كويس لتحسين جودة الأتصال

ممكن تشوف كهربائى يعملك كوبرى تجربه
على أساس تلغى الكتاوت مؤقتا للتأكد من أن العيب من قاعدة الكتاوت بالعلبه أولا

وممكن تجرب تجربة كتاوت تانى بنفس المواصفات لأن شكل الكتاوت مش مقياس لصلاحيته

**mohsen** · 28-09-2009 10:27 AM

المشاركة الأصلية كتبت بواسطة strong

لو كان صوته بيخرف يعني شوية يضعف وشوية يكون قوي هيكون احتمال تلف الرق الداخلي اللي بيسموه الطبلة ودي بيغيرها في حدود 5 جنيه + المصنعية 3 جنيه للكلاكس الواحد وعمرها الإفتراضي كويس

ولو بدأ يضعف الصوت بشكل تدريجي ممكن يكون محتاج رجلاش لمسمار الصوت بتاعه لو معاك مفك قصير جدا في طوله ممكن تعمله بنفسك

فعلا انا هويت المسمار الصغير الى فى ضهر الكلكس لقيته نطق ورجع زى الاول مشيت مشوار لقيته بدأ يضعف لحد ما قطع خالص .فطبقا لكلام حضرتك كده يبقى الرق باظ وانا قررت اشترى كلكس جديد بس يا ترى فى حاجة اسمها كلكس لانوس ولا الكلكسات كلها استاندارد واى حاجة تمش مع اللانوس. وفى حدود كام ؟

ومتشكر لحضرتك ولجميع الاخوة اللى اتكرموا و شاركو فى الموضوع

**Strong** · 28-09-2009 05:07 PM

المشاركة الأصلية كتبت بواسطة mohsen

فعلا انا هويت المسمار الصغير الى فى ضهر الكلكس لقيته نطق ورجع زى الاول مشيت مشوار لقيته بدأ يضعف لحد ما قطع خالص .فطبقا لكلام حضرتك كده يبقى الرق باظ وانا قررت اشترى كلكس جديد بس يا ترى فى حاجة اسمها كلكس لانوس ولا الكلكسات كلها استاندارد واى حاجة تمش مع اللانوس. وفى حدود كام ؟

ومتشكر لحضرتك ولجميع الاخوة اللى اتكرموا و شاركو فى الموضوع

أي نوع كلاكس هيركب عادي بس هتحتاج كهربائي علشان التوصيلات ممكن تختلف

في أنواع كتير وأسعار تبدأ من 33 جنيه للاتنين إلى 350 جنيه أو أكتر حسب علو الصوت والكفائة لكن كل الأنواع ليهم عمر افتراضي متقارب ، روح عند حد كماليات سيارات وخليه يسمعك صوت الكلاكسات لغاية لما يعجبك نوع معين

بس حاول تصلح الرق ده بيتغير بواحد زي الجديد وهيعيش كتير معاك وهيكون أوفر 8 جنيه تقريبا بالمصنعية بس خلي بالك من المياه علشان هي سبب تلفه الأساسي

**mohsen** · 29-09-2009 05:08 PM

المشاركة الأصلية كتبت بواسطة strong

أي نوع كلاكس هيركب عادي بس هتحتاج كهربائي علشان التوصيلات ممكن تختلف

في أنواع كتير وأسعار تبدأ من 33 جنيه للاتنين إلى 350 جنيه أو أكتر حسب علو الصوت والكفائة لكن كل الأنواع ليهم عمر افتراضي متقارب ، روح عند حد كماليات سيارات وخليه يسمعك صوت الكلاكسات لغاية لما يعجبك نوع معين

بس حاول تصلح الرق ده بيتغير بواحد زي الجديد وهيعيش كتير معاك وهيكون أوفر 8 جنيه تقريبا بالمصنعية بس خلي بالك من المياه علشان هي سبب تلفه الأساسي

ممكن لو سمحت توصفلى الكهربائى اللى حضرتك اتعاملت معاه فى موضوع استبدال الرق بتاع الكلكس ولا انا هشترى الرق ومنين