محتاج مساعدتكم كلكم لى

**unroi** · 26-09-2009 09:14 PM

انا هتجن على البرسونا والحكاية كلها انى نفسى فيها لكن بحاول
اجيب حاجة فى حدود 70000 الف والبرسونا زيادة حوالى 10000
الاف ومش عارف اعمل اية اجيب لفيت والأوربى والكورى والألمانى ملقيتش حاجة تعجبنى واالى عجبنى كان مستعمل من فترة وانا بقلق من المستعمل ومش عارف اعمل اية اجيب
مستعمل ولا اعمل اية وملقيتش حاجة فى قوة البرسونا حبيبتى دة انا اللى شجعت ناس كتير تجيبها عندنا فى بلدناوبعدين انا مش من النوع اللى بغير بسرعة ومن كلامكم واللى عرفته فى قوة استحمالهاعنها انها شبه العربيات المانى اللى بحبها جدا لانى بسافر كتير جدا لكن مشكلة ان الماتور جديد دة مقلقنى يعنى لو عطلت بى وانا مسافر مفيش حد هيعرف يشتغل فيه وكمان قطع الغيار غالية شوية واسمع كمان
ان فيه ناس بتدور على قطع غيار فى التوكيل ومش لاقيه ياريت حد من المختصيين يساعدنى

**unroi** · 27-09-2009 12:32 AM

يبدوا انهم حسوا بى فى التوكيل وقرروا ينزلوا برتون ساجا اعتقد المشكلة فى طريقها للإنتهاء

**meramor81** · 27-09-2009 12:54 AM

استاذ
unroi

حضرتتك ممكن تجيب البيرسونا الهاف اوبشنز المانيوال 2009
وسعرها 75 الف جنيه يعنى ازيد 5 الاف جنيه من اللى معاك
هاتها وتوكل على الله الفرق بينها وبين الفول اوبشنز مش باين اوى وممكن قدام شويه تغيرلها الجنوط وربنا يوفقك فى الاختيار

**meramor81** · 27-09-2009 12:59 AM

وبعدين قطع الغيار مش غاليه ولا حاجه ومتوفره جدااا فى شارع دمشق وفيصل وطبعاا فى التوكيل
وبعدين موضوع الموتور ماشاء الله مش هيعطل ولا حاجه دى العربيه لسه جديده مش قبل 10 سنوات او 8 عشان يعطل

**mimo3000** · 27-09-2009 03:20 AM

المشاركة الأصلية كتبت بواسطة meramor81

استاذ
unroi

حضرتتك ممكن تجيب البيرسونا الهاف اوبشنز المانيوال 2009
وسعرها 75 الف جنيه يعنى ازيد 5 الاف جنيه من اللى معاك
هاتها وتوكل على الله الفرق بينها وبين الفول اوبشنز مش باين اوى وممكن قدام شويه تغيرلها الجنوط وربنا يوفقك فى الاختيار

ميه ميه الكلام ده بس انا رايي تجيب 2010 عشان مفيش 2009 خلاص وظبط مع استاذ ايمن هيجيبلك خصم كويس وهتوصل ل 75 انشاء الله او فالرنج ده فانا رايي 5 الاف مش هتفرق وتجيب عربيه كويسه وانتا بتحبها وتستحمل معاك والهاف اوبشن حلوه اوى مش وحشه انا معايا الهاف اوبشن والحمد لله مرتاح بيها وشايف ان انا مش محتاج امكانيات اكتر من كده واللى هحتاجه هبقى اركبه انا مع نفسى وحده وحده انشاء الله

ربنا يوفقك ياباشا ويرزقك بالعربيه اللى فيها خير ليك

**Ayman_52** · 29-09-2009 01:35 AM

بخصوص اللى مقلق حضرتك :-
------------------------

1- غلو اسعار قطع الغيار : مافيش عربيه جديده اسعارها رخيصه حتى الصينى ... كل اسعار التوكيلات غاليه

اما بقى لو اتكلمنا على قطع الغيار خارج التوكيل ... هنلاقيها رخيصه ومتوفره وكل يوم عن يوم بتزيد ... وناس بتبدا تشتغل فيها .

----

2- توافر قطع الغيار فى التوكيل : التوكيل فعلا عنده مشكله فى عدم توافر بعض قطع الغيار ... وان شاء الله فى طريقها للحل ...

وباردوا حتى لو القطعه مش متوفره فى التوكيل ... بيتصرفولك بسرعه باى طريقه (عن عددة تجارب)

----

3- ان مافيش حد بيشتغل فيها : انا اظن ان حضرتك قولت انك من المنصوره ... وفى هناك مركز معتمد اسمه -الغد- ... غير ان بقيت كل شويه اشوف ورش حاطه لوجو بروتون (عندنا فى القاهره) ... وعلى فكره صيانه عربيات بروتون سهله ومش محتاجه اختراع زى العربيات الفرنساوى .

----

لو حابب العربيه فعلا كده ... استخير ربنا وتوكل على الله فى الطريق اللى تلاقيه متسهل ليك

وربنا يوفقك للخير ان شاء الله

تحيـــــــــــــــاتـــــ ـى

**ramyar** · 29-09-2009 03:24 AM

اسمع كلام البرنس ايمن والله هتفضل تشكره اغايه ماتموت اي حاجه بيقولها ايمن خدها وانتا مغمض ده من كوكب تاني غير الارض

**unroi** · 29-09-2009 03:37 AM

يا جماعة اشكركم كلكم واعتقد ان المشكلة اتحلت وانا ناوى ان شاء الله
على البرسونا الكاملة حتى بفكر اجيبها اوتوماتك
بس هو ينفع انى احجزها واجيبها بعد فترة تصل الى سبع شهور؟

**Ayman_52** · 29-09-2009 04:20 AM

المشاركة الأصلية كتبت بواسطة ramyar

اسمع كلام البرنس ايمن والله هتفضل تشكره اغايه ماتموت اي حاجه بيقولها ايمن خدها وانتا مغمض ده من كوكب تاني غير الارض

ياباشا ربنا يكرمك

ايه بس الكلام الكبير اوى دا ...

الف شكر لذوق حضرتك

تحيـــــــــــاتـــــى لحضــــرتـــك

المشاركة الأصلية كتبت بواسطة unroi

يا جماعة اشكركم كلكم واعتقد ان المشكلة اتحلت وانا ناوى ان شاء الله
على البرسونا الكاملة حتى بفكر اجيبها اوتوماتك
بس هو ينفع انى احجزها واجيبها بعد فترة تصل الى سبع شهور؟

الف مبروك على انتهاء المشكله ... وربنا يوفقك ويباركلك ان شاء الله

هو انا اظن انه عادى ... بس باردوا لزوم الاحتياط كلم محسن واساله ...

وربنا يوفقك للخير ان شاء الله

تحيـــــــــــــــــاتـــ ـــــى