لا و ألف لا لبنزين 80

**playeeer_fishooo** · 26-09-2009 09:44 PM

ازيكو يا جماعة انا كنت عاوز اقلكم ع حكايتي النهارده عشان تستفيدوا منها زي ما انا استفدت منكم كتير قوي ف المنتدي الجميل ده للدايو و بالاخص استاذ ممدوح
بسم بالله انا النهارده كنت مسافر ف راس سدر و انا اصلا من السويس يعني المشاور بالضبط 70 كيلو الحمد لله وصلنا بالسلامة و قعدنا يوم و راجعين النهارده المهم طالع الساعه 11 الصبح حاسيت ان العربية سحبها ضعيف و بعد دقيقة واحده لقيت العربية فصلت بنزين و حلفت ماهي دايرة انا حطيت احمالين اما ان يكون فيوز طرمبة البنزين و اما متور الطرمبة
فركنت ع جنب و الطريق اتجاهين يعني مش مزدوج و العربيات و هي بتعدي من جنبي خطر جدا و الترلات احس انها بتهز العربية جامد.. و كان اخي معي و هو برده ع نايل موتوز (kisho5005) ف قسم البيجو و بصراحة اول مرة احس الشجاعة و النخوة فيه و تضاعف حبي له كثيرا فعلا مفيش زي الاخ و لقيته ركب مكيروباص بسرعه و قالي رايح اجيب عربية من السويس ... المهم قلت ادور الكونتاك عشان اسمع صوت الطرمبة مسمعتش هذا الصوت الذي يشبه الزنه ف الاول ففتحت الكبوت عشان اشوف الفيوزات لقيتها سليمة و الحمد لله فعرفت انها الطرمبة نفسها ....
فكيت الكنبة الخلفية و بصراحة لولا الموضوع الذي يخص طرمبة البنزين ف كل مايهمك للانوس مكنتش عرفت افكها
فكيتها و الحمد لله و استنيت اخي حتى رجع ليا و اخدنا الطرمبة و نزلنا البلد بسرعة و المشوار حوالي 20 كيلو
رحت للمكانيكي شاطرجدااااا و معروف بالاسم كشف عليها قالي يا باشا المتورضعف بتاع الطرمبة و بينطر مسافة 5 سم قالي ديه ع الاقل مفروض تنطر البنزين متر ع الاقل و قالي انت اكيد بتحط 80 قالتله فعلا ... قالي بص وراك بصيت لقيت لانسر و ماتريكس و الله و كل واحد مستني و ماسك الطرمبة بتاعته ف ايده...... ساعتها و الله افتكرت لما استاذ ممدوح بيتكب التعليق (don't use 80)
الميكانيكي قالي انا عندي لانوس بقالها 7 سنين بحطلها 90 عمري ما غيرت حاجه فيها غير سيور وفلاتر وبس و ماشية زي الساعه دي غلتطك انت .. فسالته قلتله طب انا عاوز احسن متور ميبوظش من ال 80 قالي و الله لو جبته (دهب) برده هيحصله كده و بعدين لاحظت انه موجود رواسب بنيه سالته قالي ده من ال 80 و ركبت (بوش) الماني ب 150 جوند و 20 مصنعية و رجعت للعربية و ركبتها و مشيت تمام و الحمد لله
معلش طولت عليكم يا رجاله بس كنت عاوز افيدكم بس و انا ان شاء الله هقلب ل92 لا ن الزنقة ع الطريق وحشه قوي قوي و مرة تانية شكرا لكل اللي ف المنتدى الجميل ده

**Drift_Lover** · 26-09-2009 10:04 PM

ماعتقدش ان تلف الطلمبة من البنزين ال 80... في ناس مجرباه لحد 100000 كم بدون مشاكل.

وانا عن نفسي مجربه 15000 كم بدون مشاكل. ولو حتي المشكله حتبقي في الطلمبة 200 جنيه. فانا وفرت 1080 جنيه تقريبآ فراق البنزين ال80 من ال90 في 15000 ...

ولما الفرق ده يتصرف علي كاوتش او فلاتر او سيور. بيتهيأ لي ال 80 برده يكسب اقتصاديآ.

لكن من ناحية تانية الأداء.

90 بيفرق في.
- التجميع والتسارع (لأن حريقه أسرع ).
- صوت الموتور أهدي (نسبة انضغاط الموتور).

ده رأيي الشخصي.

**N.a.j.d** · 26-09-2009 10:09 PM

اكيد 90 احسن

**elansary** · 26-09-2009 10:17 PM

ياسلام هوا 80 بقي وحش دلوقتي ما طول عمرنا بنستخدمة مفيش حاجة باظت ثم كان فين 90 و 92 من عشر سنين مكناش نعرف عنوا حاجة وانا مع الاخ Drift_Lover بالنسبة لموضوع التوفير وعلي فكرة بقي كل صنايعي مش فاهم حاجة يقولك اصل البنزين معرفش اية وفية ناس كتير عملا مئات الكيلوات باللانوس ومفيش مشاكل ربنا يخللنا 80 وياخد الحكومة

**N.a.j.d** · 26-09-2009 10:22 PM

ماشي با باشا بس عربيتك جديده حرام تحطلها 80 لو قديمه عادي لانها واخده ع 80 اكيد عشانه قديم شويه فا انتا لو عايز تحافظ ع عربيتك حط بنزين كويس الا وهوا 90 او 92 وبعدين ال 80 مش وحش بس ريح دماغك وحط 90

**kisho55555** · 26-09-2009 10:27 PM

المشاركة الأصلية كتبت بواسطة drift_lover

ماعتقدش ان تلف الطلمبة من البنزين ال 80... في ناس مجرباه لحد 100000 كم بدون مشاكل.

وانا عن نفسي مجربه 15000 كم بدون مشاكل. ولو حتي المشكله حتبقي في الطلمبة 200 جنيه. فانا وفرت 1080 جنيه تقريبآ فراق البنزين ال80 من ال90 في 15000 ...

ولما الفرق ده يتصرف علي كاوتش او فلاتر او سيور. بيتهيأ لي ال 80 برده يكسب اقتصاديآ.

لكن من ناحية تانية الأداء.

90 بيفرق في.
- التجميع والتسارع (لأن حريقه أسرع ).
- صوت الموتور أهدي (نسبة انضغاط الموتور).

ده رأيي الشخصي.

انا معاك ف كل كلمة بس و الله فرق السعر دفعته تعب و ارهاق انا طالع الساعه 11 و الله لسه داخل البيت من ساعتين يعني الساعه 7 مش حراام

**kisho55555** · 26-09-2009 10:32 PM

المشاركة الأصلية كتبت بواسطة omry40

ياسلام هوا 80 بقي وحش دلوقتي ما طول عمرنا بنستخدمة مفيش حاجة باظت ثم كان فين 90 و 92 من عشر سنين مكناش نعرف عنوا حاجة وانا مع الاخ drift_lover بالنسبة لموضوع التوفير وعلي فكرة بقي كل صنايعي مش فاهم حاجة يقولك اصل البنزين معرفش اية وفية ناس كتير عملا مئات الكيلوات باللانوس ومفيش مشاكل ربنا يخللنا 80 وياخد الحكومة

انت اصلا معاك كورولا94 يا ريس هي انجكشن؟؟
دي مع خالي كربراتير مش انجكشن يعني ميفرقش معاك 80 من 92

**kisho55555** · 26-09-2009 10:53 PM

المشاركة الأصلية كتبت بواسطة astradti

ماشي با باشا بس عربيتك جديده حرام تحطلها 80 لو قديمه عادي لانها واخده ع 80 اكيد عشانه قديم شويه فا انتا لو عايز تحافظ ع عربيتك حط بنزين كويس الا وهوا 90 او 92 وبعدين ال 80 مش وحش بس ريح دماغك وحط 90

هو ده اللى ناوى اعمله واريح دماغى ... حط بنزين 90 او 92 وبلاش بهدلة ...

كان نفسى اصور لكوا العوامة وهى طالعة واوريكوا كمية الكبريت اللى مترسبة عليها من بره .... دى كفاية لو اترسبت على الرشاشات من بره ... كافية انها تبوظ اى حاجة ...

انا من الاول كنت من مشجعى بنزين 80 ... لكن دلوقتى ارشح بنزين 90 او 92 ... الفرق بينهم مش كتير ...

**Akram** · 26-09-2009 11:48 PM

المصنع اللي عامل العربية بيوصي بإستخدام بنزين 90 ,
و كمان لو العربية عطلت في مكان مقطوع و معاك العيلة يبقى لا 1000 و لا 10000 أهم من موقف زي كده ...

**playeeer_fishooo** · 27-09-2009 12:14 AM

المشاركة الأصلية كتبت بواسطة Akram

المصنع اللي عامل العربية بيوصي بإستخدام بنزين 90 ,
و كمان لو العربية عطلت في مكان مقطوع و معاك العيلة يبقى لا 1000 و لا 10000 أهم من موقف زي كده ...

تمام يا استاذنا

الموضوع: لا و ألف لا لبنزين 80

LinkBack

أدوات الموضوع

عرض

-

-

-

-

-

-

-

المواضيع المتشابهه

بالنسبه لبنزين 80

يا ترى حد جرب معدل الاستهلاك لبنزين 95 فى اللوجان

بالنسبة لبنزين 80

بالنسبة لبنزين الانسر

من هم المستحقين الحقيقين لبنزين 80؟

الكلمات الدلالية لهذا الموضوع

المفضلات

المفضلات

ضوابط المشاركة