الموضوع: مقارنه الجين تو بباقى الموديلات الفخمه

السلام عليكم ورحمه الله وبركاته
من خلال قرئتى ومتبعتى لشكاوى الجين وتو اوالبروتون عموما وانا واحده من الناس قابلتنى بعض المشاكل البسيطه فى الجين تو بس لحظت حاجه ان النا بتتصيد عيوب الجين تو توقف عندها وتقول دى عربيه سيئه كانهم داخلين ياخدوا الكلمه الوحشه بس ويقفوا عندها وده طبعاا غلط
الكل فاكر انه لما هيشترى عربيه زيرو مش هيقبلوا اى مشاكل فيها وديما يقولك شوف اليابانى
او االالمانى او او او وهو ماركبش ولا واحده فيهم ولا ركب الماليزى كمان بس هو بيتكلم بدون اى خبره هو ده الشعب المصرى بنجرى ولا الكلام وبس .
من خلال تصفحى لباقى اركان المنتدى وجدت موضوع عجبنى جدااا وقولت انقل اليكم جزء منه
علشان اوريكم شكاوى الناس من كل الموديلات وبالتالى لاتظلموا نوع على حدا
كل عربيه وليها عيوبها وليها مميزتها بعض النظر عن الفئه السعريه
اشكر صاحب الموضوع لمجهوده واستسمحه انى انقل جزء من موضوعه لكى تتضح للناس الامور
ومنهم الناس المقدمه على شراء الماليزى الجين او البيرسونا او الواجا

اولا : مرسيدس

ماركة غنية عن التعريف من اعرق الماركات .... تعالوا نشوف المشاركات دى :

1- العضو KHALED كانت مشكلته
(المشكله ان عربيتى c180K 2009 وعامل بيها دلوقتى 3500 كم لاحظت فى كام سفريه انى لما اسافر و اركن العربيه ساعه او اتنين و اجى امشى بيها تانى ان اسمع التيل بيصفر لمده 3 او 5 دقايق على السرعات البطيئه و بعدين يختفى. و الصوت بسمعه من العجل الأمامى. لكن المره الأخيره سمعت صوت صفير جامد كانه حديد فى حديد من العجله اليمين ورا و الصوت اختفى كانه لم يكن بعد مطبين تلاته يعنى اقل من دقيقه. مع ملاحظه مافيش اى سخونه فى الطنابير او العجل او حتى العربيه مش مكلبشه. وكل ده بيحصل بدون ما ادوس فرامل خالص. و اسوق على طريق السفر كان الموضوع لم يكن.
و بقعد بالأسبوع والتنين جوه البلد لمسافات قليله مأسمعش حاجه.
الموضوع ده قالقنى مع العلم ان ليا واحد صاحبى معاه c200 بيسمع صفير فى العجله اليمين ورا برده بس لما يرجع بالعربيه لورا بس و اتنين من اصحابى معاهم c180 ماشتكوش من الموضوع ده خالص.)

وده اللينك عشان الى مش مصدق

(حد عنده المشكله دى فى c class w204)http://www.nilemotors.net/Nile/94448-c-class-w204.html


وطبعا لو الصفارة كانت ظهرت فى الصينى ياداهية دقى .... لكن فى المرسيدس هنسمع ( عادى وماله هتظبط اصبر) ومش معنى كده برضه ان الصينى احسن من المرسيدس انا مش مجنون



ثانيا : التويوتا

العضو mohamedhelal
(انا العربية معايا بقالى تقريبا شهرين وعملة حوالى 4000 كيلو استعمالى للفرامل كان انى بدوس دوسة تتريجية ولكن احتجت من كام يوم انى ادوس فرامل بصورة مفاجأة احسست ان الدواسة اتحجرت تحت رجلى وزحفت العربية بى ولكن لمسافة قصيرة )


وده اللينك

(افيدونى هل هذا عيب تويوتا 2009 توكيل)http://www.nilemotors.net/Nile/94732-2009.html


ثالثا : النيسان


كان موجود موضوع مجمع عنها الصنى واللينك بتاعه تحت كل الاعضاء بيشتكوا من ان العفشة ناشفة والمقاعد الخلفية غير مريحة والاكصدام مثبت بمسامير ضعيفه جدا وممنك يقع من تريحه بسيطة واستهلاك البنزين عالى
وفى النهايه العضو fady قال ( ياجماعه مفيش عربية مفيهاش عيوب)


رابعا : هيونداى


ودى من الماركات المنتشرة جدا جدا فى السوق المصرى وتكاد تكون رقم واحد
تعالوا نشوف شكوى الملاك منها
1- الزميل marwanelbendary
قال فى موضوعه :
( مشاكل النيو أكسنت:
1- صوت المحرك مرتفع وخشن بعد 3200 rpm
2- الفرامل جامدة أوي لدرجة ان العربية بتزحف من أقل فرملة وخاصة لو في شوية رملة يبقى قول على وش العربية يا رحمن يا رحيم.
3- السيارة بتتنطط كتير من الخلف مما يؤدي الى احساسك بقلة الوزن و فقدان السيطرة.
4- العفشة الأمامية بتخبط.

أي واحد عنده نيو أكسنت فهو على الأقل متضايق من أحد هذه العيوب القابلة للتعدبل.

ويجب أيضا أن نعلم أنه كلما زاد ثمن السيارة (من نفس الفئة, قلت عيوبها و لكنها لا تنعدم)
علشان كدة لو حد مثلا بيشتكي من الثبات و بيقارنها بالسكودا مثلا ده كلام فاضي

كل شىء له الشىء بتاعه, يعني ما ينفاعش نحط حاجة بتتركب في ال bmw في هيونداي و العكس ص صحيح
احنا هانعدل بس بالحجات بتاعة النيو أكسنت بس و ما ينفعش تتركب على عربية تانية و العكس صحيح.)

ياسلام على الرضا والقناعه مع العلم ان غبور بيبع للناس الاساسيات على انها كماليات زى السنترلوك والزجاج الكهرباء
وده اللينك ( ولاحظوا ردود الاعضاء )

(عيوب الNew Accent وتفاديها بتعديلات هندسية)http://www.nilemotors.net/Nile/91336-new-accent.html


2- العضو HamadaMOMO
قال : (انا معايا النترا 2007 هاى لين غبور مشكلتى فى الطنابير الامامية العربية بتغربل ودى تانى مرة تعملها بعد ما غيرتهم اول مرة)

وده اللينك :
(أعطــــــــــال النيو النترا من مالكى السيارة)http://www.nilemotors.net/Nile/73621-a.html

ده غير مقلب الفيرنا والفيفا والجيتز الى مش لاقيلها لزمه


خامسا : السيراتو

وهتكلم خصوصا عن النيو سيراتو الى قالبه الدنيا شوفوا المشاركة دى
1- العضو awadalla
( انا شوفتها كذا مره و ركبنها و سوقتها بس لفه صغيره العربيه كانت سحبها كويس و قاعدتها حلوه بس كان ليا شخصيا بعض الملاحظات:
1- الصالون ماكنش قوى فى اول فئه اوتوماتيك و الابواب من جوه كانت خامتها مش قوى و حسيت ان الصالون مش حيعيش كتير مع انى اعزب و ماعنديش اولاد يبهدلوا العربيه و من النوع اللى بيحافظ على الحاجه قوى
2 - صاحب العربيه كان بيشتكى ان العفشه ناشفه و انه متضايق منها مع ان العربيه ماكانتش مجنطه اصلا
3- انا حسيت ان الصاج خفيف و مش حيستحمل
4- الاكره بتاعت الباب من بره كانت خشنه اوى فى الفتح مقارنه بالانسر معرفش ده بسبب ان العربيه جديده ولا هيا كده اصلا مع ان العربيه عامله 6000 كيلو

ولاحظوا ردود الاعضاء برضه وده اللينك

(عيوب النيو سيراتو ( لمالكى السيراتو فقط))http://www.nilemotors.net/Nile/94552-a.html





سادسا : الاوبل


1- العضو mifs
اشتكى وقال : (بعد صلاة التراويح امبارح بشغل التكييف سمعت صوت كأن الكباس مفيهوش فريون كفاية ولقيت الهواء اللي طالع مش بارد علما بأني كنت مشغله اول امبارح الظهر وكان كويس والغريبة اني مغيرلها كباس السنة اللي فاتت في اخر الصيف ( بسبب الشفت سيل بتاع القديم مع ان حالة القديم كانت تمام وغيرتله شفت سيل مرتين وضرب برضه وهوا دلوقتي عطلان على شفت سيل يكون كويس ) ومشتغلش كتير من ساعتها وكنت جايب الكباس من المصرية اللي في ميدان لبنان كوري ب 1450 تقريبا وركبته عند رامي اللي في احمد عرابي المهندسين

يا ترى المشكلة المرادي ممكن تكون كباس برضه ولا ايه ؟؟ وايه رأيكم في الكباس اللي انا اشتريته ده ؟؟ وهل حد جربه ولا لا ؟؟
افيدوني يا اهل الخبرة ( فيكترا a )

وده اللينك :
(التكييف مبيسقعش فجأة امبارح بالليل ( فيكترا a ))http://www.nilemotors.net/Nile/94261-a.html

2- العضو amirrk
قال : (العربيه انا لسه شاريها من كام شهر هي استرا 1600 2003 برازيلي
دلوقتي ظهر فيها عيب انو لما تيجي تشغلها متدروش من اول مره يعني تقعدلك 2-3 كده عشان تقوم و لازم تزود بنزين
و برده لما تيجي تفرمل و بعد ما العربيه تقف تبقي عايزه تبطل و لازم يزود بنزين عشان متفقش
رحت للميكانيكي قالي غير بوجيهات و هات البوش و غيرته مع اني لسه مغيره من شهر بس كنت جايب نوع تاني فرنساوي و شكلي اتخميت فيه
المهم غيرنا البوجيهات السحب زاد و مبقتش عايزه تبطل زي الازول لكن برده ساعات بتبقي عايزه تبطل و برده مبتقومش من اول مره
كشف علي البوبينه و لقاها سليمه راح قالي يبقي كده عايزه جوان وش سلندر حيتكلف حوالي 1000 جنيه
انا مش متاكد بصراحه من كلامه لان سحب العربيه اكتر من ممتاز و بتجيب سرعات عاليه و صوت الموتور مش بيعلي
انا بصراحه معنديش خبره في الميكانيكا و ياريت يا جماعه تفيدوني عشان انا عارف ان هنا في خبراء في الاوبل)
وده اللينك
(مشكله كبيره و محتاج رأئ الخبراء في الاوبل)http://www.nilemotors.net/Nile/94403-a.html

وكل ده طبعا غير عيوب الاسترا الى اتجمعت فى مصر وكلنا عارفنها
وطبعا دى لو فى الصينى احنا عارفين الردود ايه
لكن شوفوا ردود مالكى الاوبل هتلاقيها هاديه جدا


سابعا : المازدا
1- العضو محمد عز
كان عامل تقييم اللمازدا Z3 وذاكر المميزات والعيوب بعد 10 الاف كم
تعالوا نشوف العيوب ( لاننا كلناعارفين المميزات)
العيوب:
1- صوت ماكينات رفع الزجاج عالى وخشن يعنى مافيش سلاسة
2- الازاز اللى جنب السائق هو الوحيد الاتو اللى يترفع مرة واحدة اما الباقى لازم تفضل دايس على الزار لحد ما يترفع
3- مافيش شاشة عرض بيانات السيارة زى استهلاك البنزين والرسايل المختلفه زى الميجان
4- استهلاك البنزين عالى نوعا ما مقارنتا بالميجان
5- الباور استيرنج هيدروليك وطبعا بيبقى اتقل من الكهربا وان كان ميعتبرش عيب لان العربيه تعتبر رياضية ولكن كنت افضل انه يكون كهربا
6- مافيش مرايات ضم

وطبعا ده من وجهه نظره وفى ناس تقول وهى دى عيوب وانا اقولهم بالنسبة لفرق السعر ده كله عيوب طبعا والا كان يوفر الكام الف الى دفعهم دول
وده اللينك بتاعه :
(تقييم المازدا 3 بعد 10,000 كم)http://www.nilemotors.net/Nile/53091-3-10-000-a.html

ولكن انا بنفسى شفت الصاج بتاعها زى الورقة بجد بدون مبالغة
قدامى حصلت خبطة بسيطه فى الجنب لقيت الصاج اتطبق زى الكرتون



ثامنا : الاسكودا

1- العضو mhfmhf
قال : (انا عندى مشكله كبيره جدا وارجو الرد فيها او حد يفيدنى فيها فى الاول لمبه الزيت نورت فى التابلوه مع انى لسه مغير زيت فى شهر سته روحت جبت زيت وفضيته كله ومشيت بيها شويه ولقيت لمبه الزيت راحت نورت تانى اطفى العربيه وادور اللمبه مطفيه شويه والالقيها نورت تانى روت جايب زيت تانى وحطيته العربيه خدت 2 جركن زيت يعنى العربيه فيها 8 كيلو زيت وبعد كدا مشيت بيها شويه اللمبه لسه منوره مشيت بيها لقيتها قلت فى السحب بتاعها وبعد كدا الموتور عمل صوت اكنه صوت عربيه نص نقل ولقيت دخان طالع من من الشكمان وفيه زيت وبس مش عارف اعمل ايه انا وقفت العربيه وجريتها بعربيه تانيه ومش عارف ايه فى الموضوع ده ياريت حد يفيدنى ويقولى ايه حل المشكله ديه وتكلفتها تكون فى حدود كام معلش طولت عليكوا )
وده اللينك :
(اى حد عندى استفسار عن skoda انا موجود !)http://www.nilemotors.net/Nile/88383-skoda.html


2- العضو hossamdoaaa
قال ( واحد صاحبى عنده a5 راح يعمل صيانة 150 الف فى التوكيل قالوله فى صيانة ال 150 لازم يتغير حاجة اسمها بلو بلف فى العربية وثمنها 14000 جنيه هل ده صحيح ؟ وايه وظيفة القطعة دى؟؟؟؟ )

وده اللينك
(بلو بلف فى اوكتافيا a5 بـ 14000 جنيه فى التوكيل!!!!!!!!!)http://www.nilemotors.net/Nile/89307-a5-14000-a.html

وطبعا لو السعر ده فى الصينى كانت قامت مظاهرة قفلوا المصنع
وده غير مقلب الفابيا ومالى ذلك


تاسعا : الفولكس فاجن

1- العضو maamska
شايف ان دى عيوب الجيتا :
صوت الموتور عالي جدا حتى بعد صيانة الالف
السحب تقيل شويه (انا واخد على المانيوال)
العربيه واطيه و بتحك لما تكون محمله
العفشه ناشفه جدا و دي اكثر حاجه مدايقاني لاني باحس باي شيء في الاسفلت كأني ماشي حافي !!
صوت الحساسات الخلفيه واطي جدا
التكييف مش ساقع زي الياباني
الفرامل بتدي صوت هواء في اول الدوسه لكنها قويه و الصيانه قالوا لي ده عادي
وده اللينك :
(الجيتا 2009 خليجي بعد تجربة 1800 كم)http://www.nilemotors.net/Nile/94559-2009-1800-a.html

والى يسمع الكلام ده ميقولش انى دى جيتا خالص

ده غير عيوب البولو العيون والبوينتر والباراتى الى كل الناس عارفاها


عاشرا : الميتسوبيشى
ودى عن تجربة شخصية تكييفها ضعيف جدا , العفشة ضعيفه برضه , الـ 1300 مقلب كبير بجد والى مش مصدق يدور فى مشاركات الانسر