أخر تقييم للأسبرانزا a516

**elshreef_hemo** · 27-09-2009 08:50 AM

[OVERLINE][/OVERLINE]النهاردة جاتلى فرصة أجرب الاسبرانزا ال A516 فقولت لازم أحكيلكم عالتجربة ، والعربية اللى جربتها موديل 2008،وكنت مأجرها علشان أروح بيها فرح واحد صاحبى ، المهم رحت أستلم العربية من صاحبها وأشيك عليها فتحلى الشنطة علشان يورينى الكوريك والاستبن وبيقفلها حلفت براس أبوها ما تنقفل ، قعد يخبط ويرزع فيها برضه مش عايزة تتقفل راح جاب واحد صلح قفل الشنطة وركبت العربية وأتكلت على الله
-الشكل الداخلى للعربية يوحى بالفخامة لكن أول حاجة هتلاحظها سوء جودة الخامات الداخلية زى الزراير وأكر الابواب( أتنين منهم كانو مكسورين )
دورت وطلعت ، اول حاجة لاحظتها أن صوت العربية عالى وخصوصا على الغيار الاول والتانى بعد كدة الصوت بيهدى شوية لكن بيفضل موجود حتى وانا قافل الازاز ( كأنك مركب شكمان تربو) ، بعد نص ساعة حصلت معايا حاجة غريبة اوى ، بدوس بنزين لقيت الدواسة بتنزل عالفاضى ومش بتزود خالص والعربية وقفت،طبعا انا قولت الليلة باظت ، طفيت العربية ودورتها تانى لقيت العربية تمام والدواسة بتزود رحت مكبر دماغى وقولت يارب عدي الليلة على خير
نتكلم بقى عن الاداء، موتور الاسبرانزا تجميعه بطئ، يعنى لما تكبس بنزين العربية مش هتجرى ، هتاخد سرعتها واحدة واحدة، لكن فى نفس الوقت هتحس بقوة الموتور ، يعنى انا كنت بشد مع لانسر الغيار الاول جاب معايا 50 والتانى 90 ، يعنى لما تحرق فى الغيارات هتحس ان السحب جامد، ولما تشغل التكييف السحب مش بيتأثر أوى
تكييف الاسبرانزا تقدر تقول أنه ممتاز فعلا ، بمجرد ماتشغله بيسقع العربية على طول بس عيبه أن صوته عالى شوية ( زى الفرق بين الاسبليت والشباك كدة )
أكتر حاجة بقى مستغربلها أن الناس بتقول على عفشة الاسبرانزا ناشفة ، لان الاسبرانزا أنعم عالمطبات من عربيات كتير(زى اللانوس والنوبيرا والاوبترا واللانسر ) ولو مطب صغير مش هتحس بيه ، بالرغم من كدة ثبات العربية كويس أوى
الخلاصة علشان مطولش عليكم العربية دى ينقصها جودة التصنيع وهتبقى رقم 1 فى مصر لان حاجات كتير زى ما حكيتلكم مكملتش سنة وباظت زى القفل والأكر والكاسيت والكلكس والله أعلم بالباقى

**ahmeaad** · 27-09-2009 11:36 AM

السلام عليكم ورحمه الله وبركاته انتي قلت انك روحت اجرت السيارة من مكتب تاجير سيارات صح الاكيد ان فيه مائه يد ويد استعملت السيارة وكل استعمال غير التاني لان احنا هنا في مصر بصراحه مادام الشي لاتملكه خرب فيه وبيتقال وقتها انت ماجر ودافع دم قلبك دوس وبوظ ولايهمك وشكرا علي التقيم

**h_shahin** · 27-09-2009 03:36 PM

بالنسبة لموضوع دواسة البنزين ده
للعلم دواسة البنزين بتفصل لو دوست على الفرامل أو لو دواسة الفرامل معلقة

**elshreef_hemo** · 27-09-2009 06:50 PM

عايز أوضح حاجة أن العربية دى واخدها من صاحبها مش من مكتب ، وهوة اللى بيطلع بيها غالبا بس ده أستثناء ، لكن طبعا الاستخدام بيفرق مقولناش حاجة ، بس لو قارنت جودة الاسبرانزا بعربيات تانى زى الافيو مثلا أو حتى الدايو هتلاقى فى فرق
ومتهيألى ان العربية دى لو فى مكتب أيجار وبيتعمل فيها زى مانتا بتقول مش هتكمل أكتر من سنتين وتنتهى ، لكن لو الاستخدام نضيف وهادى أعتقد أنها هتعيش

**ash257** · 27-09-2009 06:54 PM

يا رااااااااااجل
طب قول حاجه غير الافيو دي عربيه ............ ولا بلاش
أنا طبعا مابدافعش عن الاسبرانزا خالص لأني مش خبير فيها

**Hacker5** · 28-09-2009 01:21 AM

هى الافيو دى عربية ؟؟؟؟؟

**elshreef_hemo** · 28-09-2009 06:20 AM

يا جماعة انا بقارن من ناحية واحدة بس وهية جودة الخامات
مليش دعوة بقى بالاداء والكلام ده

**ahmeaad** · 28-09-2009 02:13 PM

علي كل سواء من مكتب تاجير او خاصه بي واحد صحبك المهم فعلا الاستخدام وعلي فكره اعظم الماركات العالميه لو نصيبك طلع فيها يعني مش ولابد لازم هتلاقي فيها عيوب المهم النصيب والاستخدام

**EslaM_NagY** · 28-09-2009 02:35 PM

ماشية كام الف ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟

**elshreef_hemo** · 28-09-2009 06:02 PM

يوووووووه ، نسيت أقولكم على أكبر عيب شفته فى العربية دى
الفتيس يا جماعة اكبر غلطة فى الاسبرانزا ، اولا الفتيس بطئ جدا فى النقل وغبى أوى فى حركته يعنى لازم تمشيه المسار بتاعه بالظبط علشان ياخد الغيار،بس يمكن العيب ده أنا حسيت بيه أوى علشان الزفة كانت عبارة عن سباق وكله عايز يشد، ثانيا موضوع العضة فى المارشدير وكمان فى الغيار التالت مع انى بجيب اخر الدبرياج