اقتباس:
المشاركة الأصلية كتبت بواسطة Ahmed20_08nubira
الواحد اكيد مش بيشترى علامه فقط...ويعنى ايه ياباشا مش مهم متصنعه فين (ارجو توضيح النقطه دى)
الافيو عليها علامه شيفورليه... معنى كلامك ان الافيو جباره انا عن نفسى مش بتعجبنى كموتور وثبات
السياره الكروز كورى....هى اكيد عربيه فوق الممتازه
ولكن لو ركبت مثلا الشيفورليه الكابرس كلاسيك موديل التسعينات مثلا وركبت الكروز هتحس بفرق رهيب لصالح الامريكانى
أحمد باشا (على فكرة أنا أسمي كمان أحمد يعني بصرة) ...... شوف تعالى نمسك الموضوع واحدة واحدة والكلام اللي هقوله أعتقد ينطبق على أي عربية
- موضوع مكان تصنيع العربية (في المصنع الأم و لا في مصنع تاني ملك للشركة المصنعه)
من وجهة نظري مش فارقة أوي (فيه فرق طبعاً هقوله لحضرتك بعدين) و ده لأن العربية في المصنع الأم وفي المصنع التاني تبقى هيا هيا تماماً من ناحية أساسيات العربية زي (الشاسية و الموتور ونظم التعليق و التكنولوجيا المستخدمه في العربية و الجسم الخارجي و .....)
الفرق بيكون في حاجات تانية ثانويه زي (البطارية والكراسي و الفرش و الكاوتش و .....) ودي برضه بتكون خاضعة لنفس المواصفات و مراقبة الجودة الموجودة في المصنع الأم ..... الخامات أكيد بتتخلف شوية عن المصنع الأم لأسباب أقتصادية أو اسباب تتعلق بعدم توافرها في بلد المصنع التاني .
الأحساس بالفرق بيجي أساساً من حاجتين
- اختلاف درجة مهارة اليد العامله في بلد المصنع الأم و بلد المصنع التاني زي كدة الفرق بين مهارة العامل الألماني و الأمريكي و الكوري و ده اللي احنا هنا بنسميه عيوب التقفيل و اللي هيا مش بتبقى عيوب جوهرية من وجهة نظري (ممكن ناس تانيه تشوفها كواراث لاتحتمل ... العملية نسبيه من واحد للتاني)
- جودة الحاجات الثانوية (اللي برضة بتحقق مواصفات المصنع الأم) ...... علي سبيل المثال عربية نازلة بكاوتش بريدجستون و التانيه نازله بكومهو.
و الكلام ده ممكن التغلب عليه و التعايش معاه بالأخذ في الاعتبار فرق السعر بين العربية من المصنع الأم و العربية من المصنع التاني
أمثلة على الموضوع ده الكابريس اللي حضرتك اشرت ليها و كذلك اللومينا موجوده في الخليج استرالي مش أمريكي كمان التويوتا الكامري فيه منها استرالي و طبعاً العربيات دي كلها اكيد سوقها ماشي في الخليج ومنقدرش نقول عليهم انهم عربيات استرالي مثلاً.
تخيل كده لو مصر يتنزل فيه العربيات دي (ربنا يوعدنا ان شاء الله :ask: ) وعرفت ان فيه واحد صاحبك اتعرض عليه لومينا أو كابريس و هو رفضها علشان هيا استرالي ممكن تعمل فيه اية ؟؟؟ :U_thin1[1]:
أنا شايف ان الموضوع فالأول و الأخر موضوع أقتصادي بحت و العربية في الاخر بتحمل جنسية علامتها و يتم الاشارة لبلد المنشأ كمعلومه ضروريه للشفافيه و تفضيليه احياناً في حالة بعض الناس (دي وجهة نظري و ممكن يختلف معايا ناس كتير).
الصراحه انا مثلاً لو الفلوس مش فارقة معايا هأجيب العربية من بلدها لأن الواحد بيحب يقرب من الكمال (الكمال لله وحده) ..... أما لو كانت الفلوس فارقة معايا هأجيب العربية من أى مصنع و الموضوع ده مش هيبقى فارق معايا خالص
- موضوع ان الأفيو شيفرولية و انها عربية وحشة
أنا معنديش فكرة كاملة عن الموضوع دة و حتي لو كانت الأفيو زي ما أنت بتقول .... دة ميعبش الشيفرولية كماركة في حاجة لأن ده شئ وارد مع كل مصنعيين العربيات ..... عندك مثلاً تويوتا لسة ساحبة حوالي 3.8 مليون عربية من السوق في امريكا و معدتقش ان حد يقدر يقول حاجة علي عربيات تويوتا.
يا رب اكون عرفت أوصل وجهة نظري المتواضعه دي .... و برضه الأختلاف في الرأى لا يفسد للود قضية