الموضوع: عيب غريب في الفيرنا

الحقيقة يا جماعة أنا معايا فيرنا1600 موديل 2004 فول أوبشن إشترتها مستعملة من حوالي 6 شهور ، وكنت قرأت هنا في المنتدى إن من عيوب الفيرنا إن صوت موتورها عالي شوية ولاحظت فعلا الموضوع دة بنفسي لما أشترتها ، لكن لاحظت عيب غريب في عربيتي بعد ما أشتريتها إن لما بدوس بنزين وأنا ماشي وبعدين بسيب في السرعات المتوسطة يعني 50 أو 60 بسمع صوت تحت التابلوه زن غريب !!!

المهم مطولش عليكم الموضوع قلقني جدا وكمان الصوت كان مزعج خصوصا وأنا قافل الزجاج فشكيت في علبة الشكمان الأمامي ورحت لبتاع شكمانات عشان يكشف عليه يمكن يكون مسدود عشان كدة بيعمل صوت تحت العربية ، فكشف علية وقالي علبة الشكمان سليمة وجرب العربية معايا وسمع الصوت وقالي على فكرة في واحد معاه فيرنا وكان عندة نفس المشكلة وجالي وكان معتقد برضه إنه من علبة الشكمان بس بصراحة معرفش حلها إزاي عشان الزبون بيمشي و معرفش حل المشكلة إزاي بعد كدة ؟؟؟؟

روحت لميكانيكي معرفه وأنا لسه بحكيلوة على الصوت لقيته بيشرحلي بالظبط إزاي الصوت بيحصل ومكانه فإستغربت فضحك وقالي المشكلة دي كان في زبونه جاتلي معاها برضه فيرنا وبعد ما ودت العربية للوكيل ومعرفوش يوصلوا لسبب الصوت جابتلي العربية وفضلت أجرب فيها 3 أيام لغاية ما وصلت لسبب للصوت

المشكلة يا سادة إن في مواسير معدنية رفيعه أوي بتبقى موجودة بين الموتور وبين الحوض من ناحية التابلوة ، المواسير دي مع هزة العربية بتخبط بشكل بسيط في الحوض فبتعمل صوت زن تحت التابلوة !!!

والسبب في التخبيط دة يا سادة إن مفيش عزل للموتور بينه وبين الحوض ، والحقيقة أنا إكتشفت موضوع العزل دة لما بصيت في عربية واحد صاحبي كيا سبيكترا ولقيت إن بيبقى في غضاء من السفنج ولونه أسود بيبقى مغطي الحوض عشان يعزل أي صوت للموتور عن الصالون ، وفي إعتقادي إن عدم وجود العازل دة في الفيرنا هو من أهم أسباب علو صوت موتورها ، وعلى فكره أنا حليت المشكلة دي بأني جبت شوية إسفنج وغطيت بيهم المواسيرا المعدية الرفيعة دي وفعلا الصوت إختفى تماما

ودة للأسف من عيوب التقفيل المصري إن بيبقى في حاجات بسيطة مبيهتموش بيها وبتعمل بعد كدة مشاكل جامدة

يا ريت إللي معاه فيرنا يقولي أخبار النقطة دي معاه إية