الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

والله العظيم يا احمد ... انت استاذ
وحاسس كده اكنك بتقرأ اللى فى دماغى
وحاسس بى وبالحيرة اللى انا فيها

وبرغم انك صديق للبيجو ... لكن الآمانة عندك عالية جدا
ونادر لما تلاقى حد يرشح لك سيارة خارج القسم اللى هو بيحبه

بالنسبة للبيجو ... صديق لى عنده بيجو 504 "شغال فى السياحة" ... هو اللى اقترح البيجو ...وقال لى لو هاتقدر ترفع المبلغ فعلا الى 25000 الف ممكن نشوف لك بيجو 504 واقفة على حيلها
وقال احنا موش هانعمل حاجة ... احنا هانتصل بالميكانيكى بتاعى "راجل امين" .. وهو هايشوف لنا حاجة نظيفة ... واحنا نروح ناخدها على طول ... وطبعا هانبص عليها

كنت من شوية اتابع مشاركات الاصدقاء بخصوص الـ 131 ... وجدت ان نسبة كبيرة منهم يتكلموا عن استهلاك البنزين عندهم والمفاجأة ان استهلاكهم عالى خصوصا داخل المدينة حوالى 170 كيلوا فى الـ 20 لتر بنزين .... يعنى اعتقد انه موش متميز قوى عن البيجو يمكن الاثنين واحد والله اعلم

اما عن قطع الغيار ... كلهم بيشتكوا من عدم توافر قطع الغيار الاصلية ... وكل الموجود مضروب ورخيص

لكن طبعا تعتبر افضل سيارة فى حدود السعر 20000 زى ما حضرتك وضحت لى ... وحاجتها موجودة فى كل حتة

هو فعلا العملية ابتدأت توضح شوية
والمقارنة اكيد فى صالح البيجو 504 من حيث الكفاءة والقوة

ممكن ال131 تكون ارخص وحاجتها متوفرة لكن موش معمرة

العملية هاتتوقف على حالة السيارة وقت الشراء

لو كانت البيجو 504 حالتها كويسة زى ما حضرتك وضحت لى
يبقى خلاص لن تظهر اشياء مفاجأة .. واغلب المصاريف "تقليدية" وعشان تحسن الآداء او تحافظ عليها والله اعلم

لو كانت الـ 131 نظيفة .. نفس الكلام لكن مع الفرق
انها دائما تحتاج الى صيانة لان قطع الغيار غير معمرة ...

يعنى تقدر تقول ان اللى هاوفره فى الـ 131 هادفعه قطع غيار "لان قطع الغيار مضروبة"

لكن لو كان استخدامى لها معقول وبسيط .. يبقى ممكن الـ 131 تمشى الحال وتكون كويسة

والله اعلم
اقول لنفسى اشترى الـ 131 فى حدود 20000 عشان لو ظهر شىء يبقى معاك فلوس والعربية تمشى معاك كويس بدون مشاكل لحد ما تتعلم وتبقى تمام

او اتكل على الله واشترى البيجو 504 ... واقول لنفسى البيجو مهما كانت بيجو ... وثمنها عمره ما هينزل زى الفيات ... ومهما كانت حالتها هاتكون اقوى من الـ 131


سؤال: يعنى ايه يا اسلام ... السيارة رشة نظافة ... وكمان ما معنى فابريكة دواخل ... هو فى حاجة ممكن اوافق عليها لكن لا تؤثر على كفاءة العربية فى مقابل ان سعرها يكون كويس ... موضوع الرش ده موش فاهمه ممكن توضح لى الله يكرمك

فى انتظار التواصل والتعلم من خبرتكم
كل كلمة اقرأها منكم لا تتصورو انا استفيد منها ازاى

الله يكرمكم ويسعدكم دنيا وآخرة

مع اطيب التمنيات
اخوكم حسين غزالة

الله يكرمك يا اسلام ويبارك فيك وفى اولادك وفى صحتك وفى اسرتك
ويسعدك دنيا وآخر

اشكرك جدا

واكثر حاجة حستها انك زى اخويا واكثر
ربنا يخليك ويبارك فيك

كده الصورة تقريبا وضحت بالنسبة للبيجو 504

الجميل النهاردة كنت راكب سيارة صاحبى "رينو" بصراحة حاسس انه خايف يلمس المطب احسن السيارة تحك فى الارض
قلت والله "القديم مهما كان اصيل"

على فكرة انا حسبت استهلاك البنزين داخل المدينة وجدت تقريبا ان الفرق بين السيارات الموفرة للبنزين وبين البيجو حوالى 3 او 4 لتر

على اساس ان السيارات الموفرة بتعمل فى 20 لتر بنزين حوالى 200 كيلوا
اما البيجو 504 ممكن تعمل حوالى 24 او 23 لتر بنزين كل 200 كيلوا

وقلت لنفسى "لو كنت هامشى كل شهر حوالى 400 كيلوا"
يبقى استهلاك السيارة هايكون حوالى 46 لتر

يعنى زيادة حوالى 6 او 8 لتر كل شهر
يعنى حوالى 16 او عشرين جنيه

بالحسبة دى يبقى اعتقد ان موضوع فرق استهلاك البنزين موش مشكلة كبيرة تجعل الواحد يصرف نظر عن البيجو 504 والله اعلم
وايه رأى حضرتك

اما لو حالتها جيدة وفى حدود 25000 الف وانا اساسا المشى بتاعى موش كثيير ... يبقى خلاص اتوكل على الله واشوف حاجة كويسة
على الاقل هارتاح من افلام الفيات المتكررة ... وموش هاحس انى برمى فلوسى فى سيارة مثل الـ 127 او فى سيارة شاسيه ضعيف وكبالن مثل الـ 128 ... او فى سيارة خشنة مثل اللادا

اعتقد ان البيجو 504 هى افضل اختيار ... لا منها ثمنها عالى قوى ... ولا عربية واقعة قوى ومقرفة ....
مهما كان البيجو "اسد فرنساوى" حقيقى

بس ربنا يسهل والاقى حاجة كويسة "خصوصا انى راجل غلبان وموش اد افلام العربيات"

وهابدأ اتعلم القيادة الاول قبل قرار الشراء ... وربنا يسهل

اشكرك مرة ثانية
ولو فى اى استفسار موش هلاقى احسن منكم كلكم

ولو فيه اى ملعومة ممكن اعرفها انا متواصل معاكم ان شاء الله

مع اطيب التمنيات
اخوكم حسين غزالة

اللهم صل على محمد وعلى آله وصحبه أجمعين

اليوم ذهبت الى سوق السيارات ... الظاهر الموضوع ده هيبقىادمان

وجدت التالى يوجد سيارات بيجو 504 حكاية مثل الصورة التالية


لكن السعر كان عالى جدا "الراجل كان بيكلم فى حوالى 38000" ... طبعا كل اللى بيسمع السعر ده بيمشى على طول من غير ما يتفرج ... عشان كده تلاقى السيارة واقفة وحيدة موش لاقية حد يقرب منها

ده طبعا ممكن يكون اول كلامه ... وممكن يكون عايز مثلا 35000 والله اعلم

طبعا انا عشان ما اعرفش حاجة دى صورة الموتور من باب العلم بالشىء


وجدت ايضا ان الناس اللى معاها بتفكر فى عربية فى حدود الـ 20000 الف على متجمعين حوالين المازدا 323 موديل تقريبا 1982 وشاهدت سيارات المرة دى نظيفة جدا ... وكانت انظف سيارة كان مطلوب فيها 24000 طبعا فيها اربع عجلات جداد ... والفرش متنجد جديد "وسايب الكراسى عليها بلاستيك بتاع التنجيد" عشان تعرف انه لسه منجد ... والابواب كانت بتفتح وتقفل زى الكتاب ما بيقول

لكن اغلب المعروض من المازدا 323 كان مطلوب فيه 22000 وانت نازل مثل السيارة التالية


شوف السيارة دى مثلا الكراسى من الداخل عاملة ازاى وحالتها من الخارج ايضا كانت نظيفة والمطلوب كان فى حدود 22000 وانت نازل



دى كانت اسعار السيارات داخل السوق
لكن فى خارج السوق كان في سيارات اصحابها هم اللى بيعروضوها وكانت حالتها عادية واصحابها كان بيكلموا فى حوالى 18000 الف

ممكن يكون التجار داخل السوق عاملين حركات فى السيارة الله اعلم

المهم بعد قراءة كل مشاركاتكم فى هذا الموضوع باهتمام بالغ لدرجة انى شبه حافظ كل كلمة تم كتابتها

فى احد المشاركات فوجئت بأحد الاعضاء "لخبط لى دماغى"
وكان كل حواره بيدور على :
1- السيارة قديمة وراحت عليها
2- قطع غياره غير موجودة تماما
3- باع سيارته لانه موش لاقى "وش سلندر" طبعا انا موش فاهم هو بيكلم على ايه
4- والعناية بها اصبح مشكلة والافضل شراء سيارة حديثة
يعنى المهم اعد يكسر فى مآديف العربية ...


قلت لنفسى اذا كانت السيارة بيجو 504 راحت عليها وقطع غيارها موش موجود ... طيب معقول الكلام ده ... ده انا طول ما انا ماشى شايف العربية فى كل حتة

طيب المازدا ما هى برده نفس العملية موديل 1982 يعنى ما فرقتش عن البيجو فى 3 سنين .... طيب ليه الناس بتشتريها ...
وما بيخافوش من موضوع قطع الغيار ده

وبرغم ان السيارتين موديل منذ اكثر من 30 سنة لكنهم مطلوبين

والغريبة انا كنت فاهم ان السيارة شاهين "مطلوبة بشكل شديد" اكتشفت ان اقل سيارة مطلوبة فى السوق هى الشاهين ... ونادر لما اجد حد بيتفاوض على سعرها

واغلب الناس تقول لو هادفع اكثر من 27000 الف فى سيارة شاهين يبقى الافضل انى اشترى مثلا "سكودا فلاشيا"

حوارات كثيرة
لا يفصل فيها الا الناس اللى فاهمة زيكم

فى انتظار التواصل

مع اطيب التمنيات
اخوكم حسين غزالة