الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

معلش يا استاذ حسين اتأخرت عليك في الرد علشان كنت مشغول (حضرتك عارف اول يوم دراسه )

- السيارة قديمة وراحت عليها
حضرتك ده ينطبق علي الامكانيات الماديه يعني لو انا معايا 100 الف جنيه ايه اللي هيخليني اشتري عربيه 504 ب 25000 جنيه ده طبعا طبقا لظروفي وطبعا التقسيط فيه شبهات كتير حوله ويمكن انا امكانياتي ماتسمحش اني ادفع ال 25000 مقدم واقعد 7 سنين ادفع اقساط ولا ايه وبعدين فيه ناس بتدور علي الشكل الحديث والكماليات العاليه (الباور-التكييف -....الخ )
وعلي العموم اللي يفرق معايا الحاله مش العمر حضرتك ممكن تجيب 504 موديل 79 انضف من دايو لانوس موديل 2003 ولولا اختلاف الازواق لبارت السلع

2- قطع غياره غير موجودة تماما
كلام غير صحيح بالمره قطع الغيار موجوده ومتوفره جديده ومستعمله ولكن هي ابتدي يقل المستعمل (الاستيراد )منها لانها ما بقتش موجوده بره طبعا الكلام ده لان فيه ناس بتحب تجيب الحاجه مستعمله مش جديده طبعا فيه حاجات زي الرفايع صعب تلاقيها وده الطبيعي لاي عربيه بعد موديل سنه 95 انك هتتعب عقبال ما تلاقي الرفايع ودي حاجات ممكن تستغني عنها يعني مثلا صعب تلاقي باكيتات الابواب الداخليه او ماشابه وطبعا اذا كان الكلام ده موجود في ال 504 اللي شغاله تاكسي وعربيات علي الطريق اجره يبقي ايه الحال بالنسبه للمازدا الاقل انتشارا بكثير منها هي وال 132 وال 127

3- باع سيارته لانه موش لاقى "وش سلندر" طبعا انا موش فاهم هو بيكلم على ايه
كلام غير صحيح اطلاقا موجود ومتوافر بكثره وعلي فكره القطعه دي ممكن تقعد طول عمرك ما تغيرهاش ما بتتغيرش غير لو اتكسرت او لو فيها شرخ او لو في حاله الحوادث لا قدر الله يعني مش كل يوم بتتغير
4- والعناية بها اصبح مشكلة والافضل شراء سيارة حديثة
نفس الرد علي السؤال واحد
واتذكر مقوله لاخونا الباش مهندس سبعاوي لما حد سأله عن ان قطع غيار ال 504 قليله قاله (طول عمري با اسمع ان قطع غيار ال 504 موجوده عند البقالين والعطارين وبتوع كروت الموبايل وممكن حضرتك لكي تطمئن تاخد لفه زي بتاعت السوق تسأل فيها الميكانيكيه عن توافر قطع غيار ال 504 والمازدا ايهما اكتر وتسأل بتوع قطع الغيار نفسهم برضه

اخاف من اسعار قطع الغيار تكون عالية للدرجة انى لا استطيع انى اصرف عليها
لا يا استاذ حسين قطع الغيار مش غاليه ابدا ومتقاربه جدا من قطع غيار ال 128 والشاهين وانا كتبت لحضرتك اسعار بعضها ممكن تقارنها باسعار مثيلاتها من قطع غيار الشاهين وخلافه وحضرتك لو العربيه حالتها حلوه مش هتحتاج غير انك تغيرها سير ب15 جنيه كل 20000 كم وزيت ب150 (لاي عربيه كل 5000 كم ) وفلاتر ب20 جنيه كل غيار زيت وطقم كهرباء وبوجيهات ب40 جنيه كل 10000 كم او سنه فقط طبعا ومش كل لما تعطل العربيه مش هتمشي يعني لو عندك مثلا العربيه محتاجه شغل في العفشه طبعا عادي جدا انك تمشي بيها لغايه ماتجهز تمنها
عشان كده الاصدقاء اقترحوا البيجو 504 على اساس انها حمالة آسية وقطع غيارها معمرة
فعلا كلام صحيح
خفت من كلام احد الاعضاء لما وصف البيجو 504 بانها راحت عليها وقطع غيارها غير متوفرة "ده بقى لغبت لى دماغى" ...
تم الاجابه سابقا
وبعد ما نزلت السوق وجدت ناس كثيير قوى عندها اقبال على المازدا 323 لان سعرها فى حدود 22000 الف وانت نازل ... فهمت انهم اغلبهم حدودهم المالية زى حالاتى

عابز الرأى الصواب ... هل البيجو مناسبة لشخص متوسط الدخل ...
على اساس ان موش كل الرخيص مناسب لمحدود الدخل
اذا كانتال128 وال 127 مناسبتان لمتوسط الدخل فبالطبع البيجو متناسبه معه بغض النظر عن استهلاك البنزين بتاع البيجو وطبعا فرق السعر
(ملحوظه انا عندي ال 504 وال 128 والحاجه اللي بغيرها في ال504 مره بغيرها في ال 128 في مرتين او تلاته في نفس المده مع ملاحظه ان السيارتين في نفس الحاله تقريبا
واحد صاحبى على القهوة "قال لى: السيارة ممكن يظهر فيها بعد الشراء حاجات كثيير مثل عايزة بطارية عايزة كاوتش عايزة ... الخ"
اي عربيه بعد الشراء بتكون محتاجه لصيانه دوريه (زيوت وسيور وفلاتر )ودي تخش في حسبه 400 جنيها بالنسبه للبيجو وبالنسبه للبطاريه والكاوتش فحالتهم بتبان وقت فحص العربيه وبيتخصم تمنهم من ثمن الشراء ومش كل الحاجات دي بتظهر مره واحده
قلت له يعنى انا بالذات اول مااشترى كل الحاجات دى هاتظهر لى مرة واحدة
يبقى انا اشتريت "التورماى"

كلمونى وانصحونى

اعتبرنى يا استاذ احمد اخوك او جارك او اى حد يهمك وعايز مشورتك فى الموضوع ده ايه المناسب لشخص "متوسط الدخل" ...

طبعا اللى بيزود الموضوع حيرة ان انا تعبت فى الفلوس دى كذا سنة ... يعنى موش بابا هايشريها لى عشان اروح بها الجامعة زى ما شفت فى سوق السيارات
ربنا يباركلك في فلوسك يا استاذ حسين ويوفقك في عربيه نضيفه
انا عايز اشترى عشان احتفظ بها ولا افرط فيها الا بعد عمر طويل ان شاء الله
ربنا يديك طولت العمر وتعيش وتغير بدل العربيه 10

المشاركة الأصلية كتبت بواسطة husseinoo

اللهم صل على محمد وعلى آله وصحبه أجمعين

الله يكرمك يا اسلام ويبارك فيك انت واحمد وكل اصدقاء البيجو

بصراحة كل كلمة بتقولوها طالعة بحساب ... مع احترامى لكل الاصدقاء فى المنتدى ... لكن انتم تميزتم بالأمانة .. والصدق .. ودقة المعلومة ... واستعمال المنطق والعقل والخبرة الواضحة فى كلامكم

موش لاقى كلام اقوله غير
اسئل الله العظيم ان يمنحكم
من النعمة تمامها
من الرحمة شمولها
من العافية دوامها
من العيش ارغده
من العمر اسعده
من الاحسان اتمه
من الانعام اتمه
من العمل اصلحه
من العلم انفعه
من الرزق اوسعه
امممممممممممن يا رب العالمين
أمـــــــــــــــــــــــ ـــــــــــيـــــــــــــ ـــــــــــــــن يـــــــارب العــــــــــــالـــــمــ ـــــــيــــــــــن
ربنا ييسر الاحوال وابدأ موضوع التعليم ... والرخصة الأول

شاكر افضالكم
بجد معرفة الرجال كنز .... ومن النهارده انا عرفت راجل اسمه اسلام وكمان احمد ... ربنا يبارك فيكم ويبارك فى اصدقاء البيجو الرجالة
واحنا كمان اتشرفنا بمعرفه حضرتك
وإن شاء الله ما زال الحوار مفتوح ... لان الكلام معاكم متعة .. وحاسس كده ان ماينفعش ان يمر يوم من غير حتى ما امسى عليكم
واحنا منتظرين نسمع كلامك واخبارك ونطمن عليك

فى رعاية الله
مع اطيب التمنيات
اخوكم حسين غزالة