السلام عليكم ورحمة الله وبركاته
اول ما نزلت السوق وشوفت الناس والعربيات "حاجة مذهلة"
شوفت ناس بتشترى عادى وموش خايفة من اى حاجة
شوفت ناس بتشترى المازدا 323 برغم انها موديل 1982
شوفت سيارات بيجو 504 بحالة ممتازة
وفى الشارع الرئيسى شوفت بيجو 504 حالته عادية جدا
عشان ما اطولش عليكم
انا معاى حوالى 20000 الف ... وطبعا خايف من الـ 128 وقصص الشاسيه والكبالن عشان كده استبعدتها مؤقتا هى والـ 127 من حساباتى
وركزت فى مازدا 323
وكمان الفيات 131
واخيرا استقر الرأى على البيجو 504 ... على اساس انى "استلف واكمل المبلغ عشان يوصل 25000" وابدأ البحث
المخاوف كالتالى خصوصا انى "دخل الاسرة متوسط" ... وحجم المشى بالسيارة لن يزيد يوميا عن 20 كيلوا تقريبا إن لم يكن اقل من كده
اخاف من اسعار قطع الغيار تكون عالية للدرجة انى لا استطيع انى اصرف عليها
عشان كده الاصدقاء اقترحوا البيجو 504 على اساس انها حمالة آسية وقطع غيارها معمرة
خفت من كلام احد الاعضاء لما وصف البيجو 504 بانها راحت عليها وقطع غيارها غير متوفرة "ده بقى لغبت لى دماغى" ...
وبعد ما نزلت السوق وجدت ناس كثيير قوى عندها اقبال على المازدا 323 لان سعرها فى حدود 22000 الف وانت نازل ... فهمت انهم اغلبهم حدودهم المالية زى حالاتى
عابز الرأى الصواب ... هل البيجو مناسبة لشخص متوسط الدخل ...
على اساس ان موش كل الرخيص مناسب لمحدود الدخل
واحد صاحبى على القهوة "قال لى: السيارة ممكن يظهر فيها بعد الشراء حاجات كثيير مثل عايزة بطارية عايزة كاوتش عايزة ... الخ"
قلت له يعنى انا بالذات اول مااشترى كل الحاجات دى هاتظهر لى مرة واحدة
يبقى انا اشتريت "التورماى"
كلمونى وانصحونى
اعتبرنى يا استاذ احمد اخوك او جارك او اى حد يهمك وعايز مشورتك فى الموضوع ده ايه المناسب لشخص "متوسط الدخل" ...
طبعا اللى بيزود الموضوع حيرة ان انا تعبت فى الفلوس دى كذا سنة ... يعنى موش بابا هايشريها لى عشان اروح بها الجامعة زى ما شفت فى سوق السيارات
انا عايز اشترى عشان احتفظ بها ولا افرط فيها الا بعد عمر طويل ان شاء الله
فى انتظار رأيك
مع اطيب التمنيات
اخوكم حسين غزالة
المفضلات