الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

السلام عليكم ورحمة الله وبركاته

اعتقد انك جبت الخلاصة يا Hero
انا شخصيا حبيت المازدا 323 وسعرها كان فعلا بيبدأ من 18000 وده كان سعر سيارة معروضة خارج السوق فى الشارع الرئيسي "لكن صاحبها ماكنش مهتم بالسيارة" ... شكلها عادى حتى انه ماغسلش العربية بشوية مياه قبل ما يعرضها

داخل السوق كان فيه سيارة حكاية الابواب تقفلها بصباعك ... ونظيفة جدا من الخارج ومن الداخل طبعا ما عرفش حالة الموتور ولا الشاسيه ايه ... ده اللى انا شفته لكن صاحبها تقريبا "تاجر" كان اول كلامه 24000 ... وكل اللى يسمع الكلام ده يمشى على طول

فيه سيارات مازدا تانية كان اول الكلام 22000 وكانت برده شكلها جميل جدا ونظيفة من الخارج قوى

والمازدا الهاتشباك 323 لم اشاهد سيارة واحدة منها ... إلا فى النت .. وكان صاحبها طلب منى 16000 وكمان بيقول انها محتاجة شوية نظافة وكاوتش فى حوالى 1700 جنيه

طبعا فيه ناس بترشح الـ 131 بكثرة لكن انا مشفتش منها كثيير فى السوق حالات نادرة وشكلها كان عادى

وبصراحة ما اعرفش مين الافضل الـ 131 ولا المازدا 323

انا احب المازدا اكثر

والأثنين تقريبا نفس السعر

لكن ما هو الفرق الحيققى بينهم ... ولصالح اى سيارة فيهم

مع اطيب التمنيات
اخوكم حسين غزالة

السلام عليكم ورحمة الله وبركاته

على فكرة النهاردة لاحظت حاجة "بتركيز شوية" وفكرت فيها جامد

لاقيت الشوارع فى معظم بلدنا الحبيبة مصر موش بحالة جيدة ... وجدت مطبات على كل شكل ولون حتى على الطرق السريعة ...

وشوفت سيارات "بيطلع عينها" فى المطبات
معظم السيارات بلا استثناء

الشهادة الحق بتقول ان السيارة الوحيدة "حمالة الآسية" فى موضوع المطبات ده هى البيجو 504

موش معقول سيارة تشيل ركاب وتشيل شنط وتشيل فوق الشبكة حاجات كثيير ورغم ذلك تعدى على المطبات عادى جدا بدون اى مشاكل

قلت لنفسى طيب انت لو بتتعلم وعربية وراك "غلست عليك" .. وانت لو راكب سيارة من السيارات الحديثة اللى بتعجب الشباب مثل "كيا برايد العصفورة ... او السوزوكى ماروتى ... او حتى المازدا 323 ... وما بالك بالـ 127 والـ 128

لو غصب عنى عديت على مطب "صح" او تعدى حتى "قضيب المترو" بتحس ان العربية "بتتفرتك" وانت راكبها

أو فوجئت مثلا بسيارة نقل بجوارك او خلفك

او اوتوبيس "كبس عليك"

او سائق ميكروباس "غلس" عليك واضريت انك تجرى غصب عنك فى شارع كله مطبات .. او فيه مطبات

هاتعمل ايه لو كانت السيارة ضعيفة ... وايه اللى هايحصل للسيارة

طبعا بعد السؤال ده ... لا يوجد له غير اجابة واحدة بدون تردد
الحل فى كل "البلاوى" دى هو البيجو 504

ولا إيه



لكن ما زالت مشكلة "البنزين" خصوصا بعد توقعات ان البنزين 80 "يختفى من السوق" .... مشكلة استهلاك البنزين فى البيجو بايخة شوية خصوصا داخل القاهرة استهلاكها حوالى 12 او 13لتر لكل 100 كيلوا

امس ركبت تاكسى "كيا برايد"
وقلت للسائق الشاب "هى دى العصفورة"
ضحك وقال لى "ايو هى دى العصفورة"
قلت له: عربية حلوة يعنى بتستحمل
قال: قصائد شعر فيها

لكن الحقيقة انا كنت حاسس انى راكب "سيارة لعبة"

معقولة عربية زى دى هاتشيل ناس وشنط وتستحمل المطبات فى مصر او تقدر تسافر مشوار محترم وترجع فى نفس اليوم
وان ثمنها فى حدود البيجو 504 حوالى 25 الف جنيه

متهيألى ان كل العربيات الصغير الجديدة دى الـ 1000 سى سى لا تصلح الا للبنات الطلبة او واحد "بطوله" ومشواير خفيفة داخل مصر موش اكثر والله اعلم



فى انتظار التواصل معاكم

مع اطيب التمنيات
اخوكم حسين غزالة

السلام عليكم ورحمة الله وبركاته

شكرا ليك يا اسلام على تواصلك معايا

امبارح رحت مدرسة قيادة تابعة لحى مصر الجديدة موجودة فى المحكمة ... لكن للاسف تم نقلها الى مساكن شيراتون
قلت لنفسى ايه الحظ ده
رحت النهاردة مساكن شيراتون .. وبعد السؤال والمشى عرفت مكان المكتب التابع للحى وكان المطلوب منى التالى:

1- شهادة باطنى
2- شهادة نظر
3- اربع صور
5- موافقة جهة العمل
6- صورة البطاقة
7- صورة المؤهل الدراسى

الموظف قال لى ما دام حضرتك موظف والوظيفة مكتوبة فى البطاقة "خلاص كفاية صورة البطاقة" وبلاش المؤهل وموافقة جهة العمل

وعرفت منهم انه ليس مجرد تدريب ولكنهم هايكملوا لحد ما اطلع الرخصة
والاختبار المفروض يكون فى مرور السلام
والرخصة ممكن استلمها "موش فاكر من مرور السلام ولا من عندهم ولا من مرور مصر الجديدة"

المهم المبلغ المطلوب كان 255 جنيه

ده طبع غير المواصلات لان الوصول اليهم بصراحة صعب لو ركبت "مترو" يبقى تعتبر نفسك فى رحلة ده لو جه المترو

المهم برده حسبت ان اكيد لازم "اكرم" المدرب اللى هايعلمنى عشان يراعينى شوية
ده طبعا غير تكاليف المواصلات عشان اروح لهم

الميزه عندهم انهم قريبين جدا "ده لو رحت لهم راكب تاكسى" 3 دقايق اكون هناك

وانا راجع سواق التاكسى قال لى: الناس دى مية مية وهاتاخد حقك وهايعلموك صح وانه ارسل لهم 2 اصدقائه قبل كده

قلت له المهم انهم يراعونا فى الاختبار

قال لى : ما هو انت موش واخد بالك ... اللى هايدربك ... هو اللى ممكن يمتحنك فى المرور ... "هما تبع بعض"

قلت له : كده يبقى مية مية
يعنى لو فتحت دماغى ممكن الامور تمشى كويس "ده لو كان فيها تفتيح"

بس انا طبعا يهمنى التدريب قبل اى حاجة

التدريب هايبدأ يوم 12-11-2009 ولو اتأخرت فى التقديم يبقى على وعلى شهر 12

على فكرة سواق التاكسى من غير ما اقوله حاجة ... رشح لى المازدا 323 او البيجو 504

قلت له: انا خايف من موضوع البنزين فى البيجو ...
قال لى: خايف ايه يا عم هو انت هاتمشى زى التاكسى ... ده انت يا دوب على اد المشوار .. يعنى موش هتلف كتيير زيينا ... ده احنا احيانا نمشى 600 كيلوا كل يوم

معقولة الكلام ده

قلت له: طيب مبلغ 25000 ممكن يجيب عربية حالتها كويسة
قال: ويمكن اقل من كده كمان ... بس 25000 يجيبوا عربية نظيفة ... لان العربيات مريحة شوية خصوصا البيجو

شوفو الاسد الفرنساوى "الصالون واسع وجميل ازاى" ... مافيش عربية واسعة ومريحة بالشكل ده"



لو فيه اى نصائح آخد بالى منها
يا ريت اسمعها منكم

مع اطيب التمنيات
اخوكم حسين غزالة

السلام عليكم ورحمة الله وبركاته

ازيك يا اسلام وسلام لكل اصدقاء البيجو

امس قدمت اوراقى "لمدرسة القيادة" ... وابنى الصغير ضحكنى ... وانا فى الطريق كان بيقول لى مدرسة ايه يا بابا اللى انت هاتروحها هى فيها اولاد صغيرين هههههههههه

النهاردة رحت سوق السيارات اتفرج "الظاهر ده هايبقى ادمان ولا ايه"

لكن كالعادة الاسعار عالية قوى اكثر مما اتصور خصوصا فى البيجو 504
شوف مثلا الصورة دى


وشوف نظافة الموتور "جاى بترابه وزيته" يعنى ما هنش عليه يغسله بشوية ميه ... موش عارف حاسس انه قذر جدا ... يمكن اكون انا اللى موش فاهم
بس شكله يخوف حاسس كده انه "هلاكان" ... برده يمكن اكون انا اللى موش فاهم او اكون بقارن الموتور ده بعربية صاحبى ... بصراحة ربنا يبارك له فيها ماشاء الله ولا حول ولا قوة الا بالله "ذرة تراب ما تشوفهاش فى الموتور" مابالك بالسيارة نفسها



عارفين طالب كام "اول كلامه بيكلم تقريبا فى 36000 الف جنيه" والعربية تقريبا موديل 1978 واعتقد انها ماكنتش GL ... موش فاكر

لكن الشهادة مافيش عربية بيجو 504 شفتها فى السوق "الا وكان شكلها من الخارج رائع وجميل جدا"

وشوفت سيارة 504 كان فيها لحام فى حوض السيارة "اول مرة اشوف الحكاية دى" وتقريبا كان عايز فيها 19000 الف وكان الناس بتكلمه على 16000 جنيه ... العربية شكلها من الخارج ممتاز وكل حاجة فيها جميله الا اللحام الموجود فىالحوض "لحام فى الصاج بجوار البطارية من فوق"



ودى سيارة فيات 131 كانت فى الشارع الرئيسى ... هى بصراحة كان شكلها حلو ومن جوة برده شكلها جميل قوى لكن صاحبها من زهقه تركها مفتوحة وجلس على الرصيف بجوار العمارة اللى امام السيارة عارفين كان طالب كام ....
كان بيكلم فى 28000 الف جنيه .... والله زى ما بقولكم كده ... عايز فيها 28000 الف جنيه
شوفوا صورة الموتور عاملة ازاى


طبعا كان فيه مازدا رائعة جدا وصاحبها كان بيكلم فى 28000 برده وكان فيها تكييف وحالتها ممتازة لكن اكتشفت انها 623 موش 323 وسألت احد المشتريين تساوى كام دى
قال لى : كثيره 22000 عشان دى قطع غيارها قليلة شوية بخلاف السيارة 323

لفت نظرى برده سيارة جميلة جدا من بره ومن جوه حكاية وفيها تكييف ونظيفة جدا صاحبها كان عايز 28000 الف جنيه ده اول كلامه ... موش عارف ايه حكاية رقم 28000 الف ده ... المهم السيارة كانت تيوتا كرولا ... بس الناس ما كانتش مهتميه قوى موش عارف ليه ... دى صورة العربية


آخر حاجة شوفتها بعد مشى كثيير قوى
سيارة ماروتى موديل اعتقد انه كان بيتكلم فى 1994 تقريبا موش فاكر
اللى انا فاكره انه كان عايز كام ... عايز 22000 ويقول ان الموتور اللى فيها الماتور الكبير موش الصغير بتاع اليومين دول 900 سى سى موش 800 سى سى
وان السيارة فيها تكييف وجنوط تيوبليس
عايزين الحقيقة كانت نظيفة جدا ما فيهاش الهوى ... بس الله اعلم بحالتها وحالة الموتور


اخيرا وانا ماشى شوفت سيارة "كيا برايد" ... كانت جميلة قوى ونظيفة ... كان صاحبها موش فاكر كان طالب تقريبا 32000 اعتقد كده او 28000 موش فاكر والناس كانت مهتمية بالعربية وبيكلموا مع الراجل بشكل جدى



طبعا بعد "حمام الشمس" الرائع اللى انا اخدته ... حمدت ربنا ان ابنى الصغير ماكانش معايا ... وكالعادة روحت على البيت ودماغى بتلف من الشمس والاسعار ... قلت لنفسى شوف الحل تاخد "دش مياه ساقعة وتغيير هدومك" وبعد كده تصلى العصر وتقوم تنام وربنا ييسر الاحوال

على فكرة حتى صاحب محل "اللبن" قال لى انا كان معايا بيجو 504 واحسن لك تشترى سيارة فى حدود 25000 ... قلت له ده الاسعار عالية جدا اللى انا شفتها معقولة سوف اجد سيارة بالسعر ده حالتها كويسة ... ياريت

فى انتظار سماع آرائكم القيمة

مع اطيب التمنيات
اخوكم حسين غزالة