الموضوع: عايز اشترى سيارة فى حدود لا تزيد عن 25000 ... مبتدأ جدا وعايز رأيكم

مساء الفل
ازيك يا اسلام انت وهيرو وكل اصدقاء البيجو

هو فعلا الملاحظ ان كل سوق السيارات90% منه اصحابها تجار
لدرجة ان السيارات اللى فى خارج السوق فى الشارع الرئيسى اصبحت اشك ان اغلبيتها اصحابها تجار
وفعلا هو ليه واحد سيارته كويسة يروح يعرضها فى السوق "إلا اذا كان مستعجل"

لكن فى الحقيقة ان لى اثنين من اصدقائى اشتروا من هناك ... واللى فاكره ان واحد منهم كان اشترى "لانوس" ... وبصراحة كانت جميلة قوى "ربنا يبارك له فيها ما شاء الله ولا حول ولا قوة إلا بالله"
وهو برده اللى اقترح السيارة مازدا 323

لكن انا بصراحة اتصدمت من اسعار البيجو 504 ... خصوصا بعد انى تأكدت انه من الصعب انك تلاقى سيارة فى حدود 25000 حالتها كويسة

موش عارف تقدر تقول "حلم وراح"

ناس تقول ممكن تلاقى

وناس اكثر واقعية تقول لأ صعب انك تلاقى بالمبلغ ده والسيارة هاتتعبك وتقرفك وانت لسه جديد

امبارح وانا راجع مع تاكسى ... السواق كان بيحكى لى موضوع كوميدى قوى

بيقول لى : انه كان راكب سيارة مازدا 929 تقريبا ... وبعدين سقط لها موتور من بورسعيد ... وبعدين فضل ماشى بالعربية لمدة 8 شهور لحد ما سمع تقريبا مشكلة فى الكاتينة بتاعة السيارة وحاجات اتكسرت فى الموتور
وبعدها قرر انه يلم العربية ويصلحها ويبيعها

لكنه من خلال كلامه كان بيقول انه كان بيمشى بيها حوالى 3000 كيلوا فى الشهر

انا عن نفسى مع انى لا افهم شىء فيما يقوله
لكن الذى لاحظته حاجة واحدة فقط ... انه كان نازل من فوق كوبرى وهو نازل على حلمية الزيتون بسرعة رهيبة ... ووقف بسرعة جدا ورجع لى بمجرد ما شاورت له

قلت لنفسى : لو سواقتك للمازدا بالمنظر ده يبقى كويس ان العربية فضلت معاك 8 شهور والله اعلم هههههههههههههههه

وبيقول : عمرك ما هتلاقى عربية شاهين كويسة اقل من 35000 جنيه

قلت له : انا عايز الم العملية اساسا ... انا كنت اكثر حاجة افكر فيها الـ 127
ربنا كرمنى والحمد لله ولما فكرت استلف واجيب حاجة احسن شوية ... اكتشفت ان البلد دى موش بلدنا ... والله اعلم

طيب ممكن خدمة منك يا هيرو انت واسلام الله يكرمكم
عايز اعرف منكم او من اى حد انت تثقوا فى كلامه
هل السيارة مازدا 323 حاجتها موجود ورايكم ايه فى السيارة دى

لانى لو سألت اى تاجر قطع غيار اكيد هايقول قصايد فى السيارة وان قطع غيراها متوفره جدا والله اعلم

مع اطيب التمنيات
اخوكم حسين غزالة

السلام عليكم ورحمة الله وبركاته

رجاء انتظار التحميل لما يكمل عشان فيه صور كثيير


فى سوق السيارات النهارده الجمعة بتاريخ 23-10-2009 وجدت مفارقات غريبة قوى:

مثلا: السيارة التالية بيجو 79

عارفين طالب كام ... مطلوب فيها 40000 ... طيب والنبى معقول الكلام ده حتى الآن http://img200.imageshack.us/img200/1839/20091023m.jpg


سوزوزكى ماروتى 1994 ... مطلوب فيها كام 19500
معقولة الكلام ده سيارة صغيرة مرة عليها اكثر من 15 سنة ومطلوب فيها الكلام ده
هى بصراحة شكلها نظيف جدا ... لكن موش عارف المبلغ كبير قوى

هو فيه ناس كثيير بصراحة بشكروا فى الماروتى خصوصا لما تكون زيرو وبيقولوا انها فضلت معاهم 7 سنين شغالة مية مية .. وكمان الانسب للسيارة دى "السيدات" .. او "موظف بطوله" ... عشان صغيرة ولا تصلح لعائلة


ودى فيات 1978 مطلوب فيها 21000 الف جنيه
هى شكلها حلو
لكن رخصتها تنتهى بعد شهر
وفيه ناس قالو انها فيها فى الحوض بارومة .. انا ماشفتش بارومة ... الله اعلم يمكن هما فاهمين عنى اكثر ... او عايزين ينزلوا فى سعرها


http://img11.imageshack.us/img11/2517/20091023005.jpg

دى حالة الموتور ... اعتقد الموتور شكله نظيف قوى




وكان فيه فيات 131 موديل 1983 مطلوب فيها 26000 الف جنيه طبعا رقم جامد قوى قوى ... والناس بدأت تتكلم مع الراجل من 21000 .... بصراحة انا اخاف اتكلم كده احسن اضرب هههههههههههه
وطبعا قعدوا يقولوا دى فى سمكرة موش مضبوطة ... وكلام كده الله اعلم ...يعنى معقولة يكون فيها الشغل ده وبداية كلامه 26000
ورخصتها تنتهى بعد شهر
بس موش فاكر اى عربية من دول اللى كان الكلام عليها خصوصا ان الاثنين شكلهم حلو




اما المازدا دى حكاية .. صاحبها بيقول ان مسقط موتور جديد مكلفه 4000 جنيه والميكانيكى واخد منه 500 جنيه
بعد الكلام ده كله عارفيه طالب كام
عايز 25000 الف جنيه
الناس كانت بتقول ده كثيره 19000 جنيه عشان العربية فيها بارومة عند رقم الكارتيره ... او بالكثير قوى 20000 لكن الشهادة الموتور كان نظيف قوى وصوته زى الساعة وعزمه شديد



اما المازدا دى بصراحة جامدة قوى وصاحبها شكله "واد روش" ... ده اذا لم يكن تاجر وده لبس الشغل
المهم العربية كانت جميلة جدا .. وفتح لى الشنطة ورانى "طقم سماعات خطير" .. يعنى لوحده ثمنه معرفش يوصل لكام كان طالب فيها 25000 ... ده غير الشغل جوه العربية كان رائع حكاية ... وكاوتش جديد ... وموتور شكله نظيف زى صاحبها



نرجع ثانى للبيجو
بيجو 205 موديل 1993 ومطلوب فيها 22000 ... فيه ناس كثيره كانت بتتفرج عليها وعجباهم
هى بصراحة جميلة قوى .. ونظيفة جدا من الداخل ومن الخارج ومن اى حتة ههههههههه
لكن معرفش قطع غيارها اخباره ايه .. ماعنديش فكرة


اخيرا وجدت بيجو 504 صاحبها طالب فيها 25000 جنيه ... عارفين ليه لأنها موديل 1975 وبيقول انه بيبعها عشان عايز يركب زيرو


لكن الصراحة فرشها من جوه والطابلوه شكله جميل قوى والجنوط والكاوتش مية مية


وده شكل وحالة الموتور


لكن عندى سؤال مهم ... ليه اغلب السيارات البيجو مواتيرها كلها زيت والتراب مغرقها
ولما سألت صاحبها : قال لى ما فيش حد بيغسلها فى البنزينة وكمان الفايز بتاع الموتور معرق زيت وبيخرج على الموتور من جوه ... ما عرفش صحة الكلام ده ايه

تفتكروا ان كل المواتير فى البيجو ده شكلها الطبيعى


دى سيارة لذيذة قوى اسمها فيات اوتوبيانكا ... طبعا عمرى ما سمعت عنها
ومطلوب فيها 23000 جنيه
يعنى اللى عايز يتشهر بسرعة يركب العربية دى بدون تردد



البيجو دى المفاجأة انه طالب 21500 جنيه
والناس كانت بتتكلم فى 20000 الف جنيه
طبعا سألت قالوا العربية دى مخبوطة ومرشوشة ...
ورغم كده كانت عينينهم هاتاكل العربية وعايزينها بأى شكل


ولما سألت صاحبها قال لى: دى رشة نظافة
طبعا كل واحد بتكلم على مزاجه والله اعلم


آخر سيارة لفتت نظرى دايهاتسو شاريد
صاحبها راجل بيه "على المعاش وكيل وزارة" قاعد خلف السيارة ولم يفتح فمه بكلمه واحدة
لكن فيه واحد شغال فى السوق هو اللى عمال يكلم ومشغل الكاسيت على طول
وعمال يمدح فى العربية وتوفيرها فى البنزين وانها تروح اسكندرية وترجع بصفيحة بنزين وتمشى حوالى 500 كيلوا فى الصحفيحة وانك تشترى وتمشى على طول وان السيارة عمرها ما اترشت بويه من الداخل او الخارج "وده حقيقى"
الغريبة انه كان طالب 23000 جنيه ... وخلال خمس دقائق مفاوضات مع الزبون قال له انا ممكن اكلم الراجل يوصل السعر الى 19000 جنيه ... شوف التناقض الرهيب ... اربع الاف جنيه فى خمس دقائق


اخيرا قررت اروح البيت
لاقيت واحد بينادى على
انا اصلا موش شايف مين ده
اخيرا عرفت انه واحد جارى ... شغال على اده فى موضوع العربيات وكانت المفاجأة انه كان بيبيع عربية بيجو 305
الموتور بتاعها "حالة صعبة قوى" ... هو يقول لك ده عايز طقم شنبر وفيه "بوجى" بينطر شوية زيت
قلت فى سرى "ما تكملش دى كفاية انها 305 هو فيه حد معقول يشتريها
المهم الراجل توضأ بزجاجة المياه المعدنية بتاعتى "انكسفت بصراحة اقول له لآ
وقال لى نص ساعة ونروح مع بعض
قبل الغروب ظهر الزبون وسبحان الله عجبته
واركب يا عم وعلى الشهر العقارى وجدناه قافل
راح معانا على البيت عشان يكتب العقد ويقبض الفلوس ... قلت له عيش انت القصة .. وانا هاروح اشترى "لبن عشان العيال" هههههههههههه
على فكرة هو كان طالب 12500 وآخر كلام كان 11500
الغريبة يا اخى برغم ان العربية دى كانت بتدخن وما فيش فيها باب بيتفتح لكن الدوكو من الخارج سليم وكويس ومافيهاش بارومة
وكانت بتجرى بنت الايه ... جرى فظيع ولا اكن الموتور "خفيف" ... حاجة غريبة والزبون كان مبسوط قوى بيها

على فكرة جارنا كان بيرشح لى اشترى :
128
127
131
عشان سرعة البيع ومطلوبة وانى ابعد عن المازدا مع ان الطلب عليها موش بطال
قلت له طيب رايك ايه فى الكيا برايد
قال لى عربية حلوة ومطلوبة


فى انتظار تواصلكم وآرائكم البناءة

مع اطيب التمنيات
اخوكم حسين غزالة

اللهم صل على محمد وعلى آله وصحبه أجمعين

استاذ احمد شكرا على مداخلتك
اليوم وبعد تفكير طويل عايز حضرتك انت واسلام وكل الاخوة الافاضل فى المنتدى يشاركونى الرأى عشان اعرف انا بفكر صح ولا خطأ:

من خلال الزيارات المحدودة لسوق السيارات حوالى 3 زيارات متتالية ومن خلال الحوار مع حضراتكم اتعلمت اشياء كثيرة :
اتعلمت ان السيارة حالة بغض النظر عن الموديل ... يعنى ممكن تكون السيارة حالة نادرة وممتازة برغم انها سيارة موديل قديم مثلا "ثمانينات" .. وقد يكون السبب ان صاحبها راجل محترم ولا يبخل عليها "بمليم" ... او ان السيارة مرفوعة لمدة طويلة ... او ان استخدام السيارة كان خفيف جدا لاى سبب إن كان

وانه ممكن ان تجد سيارة حديثة جدا ولكن بالعامية يقولوا عليها "متهانة" وبحالة سيئة جدا وتحتاج الكثير من المصاريف لكى تعود الى حالتها الجيدة

وان اهم حاجة فى السيارة اساسياتها ... اليوم فى الحوار مع احد الاصدقاء قال لى "انا انظر الى السيارة اعرف اذا كانت السيارة "واقفة على حيلها" ولا سيارة تعبانة ... يقصد انه ممكن تشوف سيارة من الخارج تحتاج بعض السمكرة والدوكو ... لكن اساسيات السيارة سليمة من قوائم وحوض وشنطة وبارومة وشاسيه ...

وان آخر حاجة تفكر فيها هو "الموتور" ... لان ببساطة ممكن تسقط موتور استيراد وده فى اسوأ الظروف ... لكن اهم حاجة فى السيارة اساسيتها

واتعلمت ان احسن حاجة انك تشترى "احسن حالة فى حدود فلوسك" ... وبناء عليه افكركم مرة ثانية انى ممكن اوصل المبلغ الى 25000 او حتى 26000 ...

وفى هذه الحالة احسن حاجة ممكن اجدها كالتالى:
الفيات 127 ... وبرغم انى لم اكن متشجع ليها قوى ... ولكنها فى الفترة الاخيرة اصبحت احدى الخيارات لماذا
ممكن احسن حالة فيها على المفتاح وموديل لا يقل عن 1986 مثل السوبر فيورا ... لن يزيد ثمنها عن 15500 او بالكثير قوى 16000 ... ولكن المفروض فى هذه الحالة ان السيارة هاتكون غير متهانة .. وفى حالة جيدة جدا ... ولن احتاج انى الف على اى ميكانيكية ... ولن اصرف قرش واحد بعد الشراء ... وهاريح نفسى من موضوع العناية والسمكرة وخلافه ده لو اشتريت احسن حالة فيها فى السوق وهاتمشى معاية مدة كويسة ممكن تصل الى 3 سنوات او اكثر حسب استخدامى ... وهابدأ فيها التعلم ايضا كبداية ... سيارة صغيرة وخفيفة وقطع غيارها متوفرة ... وسهولة بيعها فى اى وقت موجودة لانها مطلوبة ... ده احتمال

الاحتمال الثانى : انى اعلى شوية واشترى سيارة نظيفة "فاميلى" عائلية وكبيرة شوية مثل الفيات 131 ... والمفروض ان احسن حالة فيها ونظيفة جدا وموديل 1982 او 1984 يكون سعرها لا يتعدى 24000 بأى حالة من الأحوال ... موش هاقول 16000 جنيه ... او 18000 الف جنيه او الحوارات دى ... انا بقول سيارة ممتازة وصاحبها مهتم بها جدا وهاشتريها حتى ولو غالية ووصل ثمنها الى 24000 الف جنيه موش مهام مقابل انها مية مية على الركوب وموش هاتعب فى اى شىء بعد الشراء وسيارة سهل اعادة بيعها جدا ومطلوبة قوى وموفرة للبنزين وقطع غيار متوفره وسحب خلفى بدون كبالن وواسعة طبعا عن الـ 127

السيارة الثالثة: هى المازدا 323 وطبعا دى يابانى مية مية ... وسعرها لن يزيد بأى حالة من الاحوال للحالات الممتازة عن سعر الفيات 131 يعنى المفروض انه لا تزيد عن 24000 دى لو كانت سيارة عشرة على عشرة .... حالة ممتاز وعلى المفتاح ... ولكن محتاج اسأل واتأكد منها الأول ومن موضوع توافر قطع الغيار وهل هى افضل ام الـ 131

اما لو حبيت انى اعلى فى الموديل شوية واخرج من حقبة الثمانينات

المتاح او اللى هافكر فيه بشكل جدى هو
السوزوكى سويف: ودى لو وجدت سيارة بحالة جيدة فى حدود 26000 او حتى 27000 ممكن اقرص على نفسى ولا اتردد فى شراءها مقابل انها سيارة يابانى وحديثة 1994 مثلا وبحالة جيدة ولكن موش جيدة جدا مثل الـ 131 او الـ 127 او 323 ... فى مقابل ان الواحد ممكن يمشى بيها فترة موش بطالة 2 او 3 سنين قبل انه يفكر يعمل فيها حاجة و يمكن اكثر حسب حالتها والاستخدام

واخيرا السيارة
كيا برايد ... هى بصراحة سيارة جميلة ومطلوبة وموفرة جدا فى البنزين وجميلة قوى وينطبق عليها نفس الكلام بتاع السوزوكى سويفت ... باستثناء انها اعتقد اصغر شوية ولكن احدث فى الموديل ... وطبعا اعادة بيعها سريع .. وممتازة ... ولكنها صغيرة بعض الشىء

او سكودا فلاشيا ... لو وجدت سيارة فى الحدود دى 26000 او حتى 27000 ممكن اشتريها .. برغم ان بعض الناس يقللوا من شأنها ... ولكن انا شايف ان الطلب عليها فى سوق السيارات عالى واعادة بيعها سهل لانها مطلوبة وموديل حديث وشكلها حلو ... لكن معرفش ممكن الاقى منها حاجة بالمبلغ ده موش عارف


اما السيارات التى لا افكر فيها فهى:
الفيات 128
البولونيز
اللادا ... برغم قوتها ولكنى اخاف من خشونتها وعدم ثباتها وضعف العفشة و"البيض" وهروب العجلة .. وخشانة الدركسيون ... يعنى تقدر تقول محتاج العب حديد قبل انى اشتريها مستعملة لو زيرو يبقى ممكن خلاف كده صعب قوى

اما حبيبة قلبى والتى لا اقارنها باى سيارة مهما كانت "البيجو 504" ... اللى انا حسيته وشفته وعرفته منكم ومن سوق السيارات ... انه صعب قوى ان الواحد يلاقى عربية بيجو 504 بحوالى 25000 او 26000 وتكون بحالة جيدة ... اعتقد ان الصح بتاعها لازم يكون فى حدود 32000 الف ده اقل رقم عشان تلاقى عربية نظيفة على الركوب بدون مشاكل .. الا اذا وجدت عربية لقطة وصاحبها عايز يجاملنى ههههههههههه

خصوصا انى بالأمس كنت راكب مع صديقى سيارته البيجو 504 فى انتظار احد الاجانب فى المطار واثناء العودة الساعة 3 مساء
انسى يا بيه "السرعة 120 كيلوا " فى ثوانى
وثبات ايه حكاية
والعربية ماشاء الله ولا حول ولا قوة الا بالله عايزة كمان
لولا انى حجرت رجلى فى الدواسة وقلت للراجل "احنى موش مستعجلين"
براحة يا عم شوية
قال لى : انا عايز اوريك ان الموديل موش مهم ... المهم ان صاحب السيارة يكون بيصرف عليها وموش متهانة
قلت له : الحالات النادرة اللى زى سيارتك ... المفروض انها لا تدخل فى التفكير او الحسابات لان ثمنها هايكون غالى جدا ... وصاحبها لا يمكن يفكر انه يبيعها ابدا

تخيلوا كل الكلام ده دار فى دماغى زى شريط السينما ... لدرجة الشيطان الله يخرب بيته .. يطاردنى حتى فى الصلاة وانا افكر فى الموضوع ده

معلهش انا معذور ... وموش كل يوم بشترى عربية ... وموش كل يوم ابيع عربية ... ومعنديش ميول لموضوع البيع والشراء ده ... عايز اشترى عربية واحتفظ بيها .. خصوصا انه ده تعبى ورزق الاولاد

اكيد انا تعبت لكم دماغكم قوى

فى انتظار اسمع ارائكم
موش شايف حد بيرد غير هيرو و اسلام ... وبعض الاصدقاء ...

فين اصدقاء البيجو الخبرة

مع اطيب التمنيات
اخوكم حسين غزالة