الموضوع: كيفيه تغيير اويل سيل الاسبراتير لفيكترا bبالصور

السلام عليكم ورحمه الله ..حبيت اعمل الموضوع ده للافاده العامه . يارب يعجبكم وسامحوني لاني كنت باشتغل بالليل والاضاءه ضعيفه
الاسبراتير:::
مكانه اعلي الموتورعلي بيت الكامه من ناحيه اليمين . ووظيفته توزيع الكهرباء القادمه من الموبينه (12000فولت)علي كابلات البوجيهات عن طريق شاكوش الاسبراتير اللي بياخد حركته من عمود الكامات




اعراض تلف الاولسيه:::
ملاحظه وجود زيت موتور اسفل الاسبراتير ومسيل علي الموتور من الجنب
الادوات المطلوبه:::
-مفتاح لقمه مقاس 6 مللي اوبنسه كلابه
-طقم الانكيه هنحتاج منه مقاس صغير مش فاكر كام
-مفك عاده
-بنزين وبطانه للنظافه
-شويه شجاعه
اولا افصل الكابل اللي جاي من الموبينه وداخل علي الاسبراتير
ثانيا هتفك مسامير وش الاسبراتير وعددهم 3 مسامير وماتخافش المسامير مش هتقع لانهم متثبتين من الطرف في الوش

-بعد ما تفك المسامير خرجه لبره بالراحه ولاحظ ان فيه غطاء بلاستيك كده شبه الترس راكب علي الوش من جوه زي ماهو باين في الصوره

-ظهر قدامك الشاكوش وحواليه هتلاحظ وجود الاولسيه اللي هنغيره

-فك المسمارين اللي ماسكين الشاكوش بالانكيه الصغير واحفظ اتجاه راس الشاكوش علشان لما تركبه تاني

-بعد ما تفك الشاكوش وتخرجه لبره هتلاقيه كان راكب علي قاعده اسطوانيه نحاس .شدها لبره بالراحه ودلوقتي ظهر قدامك الاولسيه القديم .خرجه لبره ببوز المفك

-نظف المكان بالبنزين والفوطه اللي معاك وركب الاولسيه الجديد ولاحظ ان الاولسيه اما انك تشتريه من متخصص قطع غيار اوبل (خاص بالموديل) او من عند متخصص اولسيهات(خد القديم وقيسه بالبوكليز)

-ركب الاولسيه وبيته في مكانه مضبوط وبعدين ركب الاجزاء اللي فكناها قبل كده من ورا لقدام ابتداء من قاعده الشاكوش ثم الشاكوش واربط مساميره وبعدين الغطا البلاستيك واخيرا وش الاسبراتير وماتنساش تشبك كابل البوبينه اللي فصلته في الاول
-ممكن قبل ما نقفل شغلنا نسنفر راس الشاكوش ولوامس الكابلات النحاس اللي جوه الوش بسنفره ناعمه علشان نشيل الاكسده لتحسين عمليه الدواره

........* يارب الموضوع يكون عجبكم ومستني رايكم ........*