-
عملت حادثة :(
الحمد لله انها جت على قد كده ..
من ساعة مسوقت وجبت العربية مخبطش في اي حد و ملمستش حد ولا حد لمسني ( على غير ماكنت متوقعة ) بقالي حوالي 5 شهور ..
واول لما خبطت ..كانت الخبطة القاضية ..
والحمد لله انها مكانتش مع حد ..
كان اول يوم ليا في الشغل الجديد .. ورايحة مكان اول مرة اروحه
وداخلة على طلعة كوبري واخدة دوران بس ال curve بتاعها حاد اوي ..
وداخلة بسرعتي .. اينعم دوست فرامل بس مكنتش كفاية انها تقلل السرعة .. كنت تقريبا 70 -80 كده ..
اول لما خلصت التحويدة ومسكت الطريق الstraight معرفش ايه اللي حصل ..
فقدت السيطرة على العربية وعومت مني شمال ويمين شمال ويمين ..مش فاكرة انا سيبت الدريكسيون ولا حاولت اعدل ولا دوست فرامل ولا عملت ايه .. مش فاكرة فعلا غير انها حدفت شمال ودخلت في سور اسمنت كونكريت بالحضن وبسرعة ..
الاتنين ايرباج اتنفخوا (ومكنتش اعرف ان عربيتي فيها اصلا ايرباج ) والحمد لله انهم كانوا موجودين ..
وللاسف اول مرة في حياتي امشي منغير حزام .. مع اني والله دايما رابطاه .. بس نصيب بقى ..
اتخدفت على الكرسي اليمين والاتنين ايرباج كانوا تقريبا مغطيني .. والعربية دخنت مش عارفة الدخان ده كان جوه العربية ولا بره .. انا غمضت عيني واتشاهدت واستنيت الانفجار ..خصوصا ان العربية كانت على كوبري والسور اللي خبطت فيه ده على حرف الكوبري ..
المهم لقيت العربية وقفت ..ردت من الخبطة اقصى الشمال .. لاقصى اليمين ووقفت .. في جزء من الثانية كنت طفيت العربية ونطيت بره
ازاي معرفش ..
لقيت ايدي الشمال محروقة .. ورجلي اليمين مكسورة وشوية كدمات كتير كده في كل حتة في جسمي ..
طبعا الحمد لله انها جت على قد كده ..
بس انا لحد دلوقتي معرفش ايه اللي حصل ده .. وهل سرعتي في الملف هي اللي عملت كده ؟ ولا العربية كان فيها مشكلة وانا معرفش ..
وكمان الحرق ده معرفش من ايه .. اللي يقولي من الشرارة نتيجة الاحتكاك بين العربية والكونكريت .. مع اني قافلة العربية ومشغلة التكييف والازاز متكسرش ..
وناس تقول ماية الرادياتير وناس تقول ماية بطارية وناس تقول من الايرباج ..
العربية طبعا اتدمرت من قدام .. الفوانيس والاشارات والاكصدام الامامي والرفرف الشمال والكبوت ادمر ..
والرادياتير وحاجة كده تبع الكهرباء مش عارفة ايه هي ..
في الاول والاخر طبعا الحمد لله بجد وستر من ربنا انها جت على قد كده ..
وستر ربنا ان مكانش فيه عربيات ورايا واني موقعتش من على الكوبري ..
بس بجد بجد احترمت العربية جدا بعد اللي حصل .. كفاية ان الازاز متكسرش .. وعلى الرغم من قوة الخبطة اللي تطلع ايرباج بس العربية اللي يشوفها من ورا ومن الجنب ولا يعرف ان فيها حاجة ولا خدشة .. الهيئة الامامية بس .. والحمد لله الموتور شغال ..
بس طبعا مش هينفع اصلحها لانها هتتكلف كتير جدا ..
وداعا جيجي :( :(
-
الحمد الله انها جات ع اد كده وحمد الله ع سلامتك
-
حمدالله على سلامتك
وفداكى ألف عربية
-
لا حول ولا قوه إلا بالله
الحمد لله انك بخير
بس واضح انك فقدتي السيطره علي السياره وده اللي خلاكي تخبطي في السور
عموما ماتزعليش وربنا يعوض عليكي
الانسان هو اللي بيجيب الفلوس لكن الفلوس متقدرش تجيب انسان
وبأذن الله تقدري تصلحيها وترجع جيجي تاني :)
ولو محتاجه اي شيء احنا هنا كلنا تحت امرك
-
اولا حمد الله على سلامتك وان شاء الله كل اثار الحدثه تشفى بازن الله ثانيا لو حضرتك فى مصر انا اعرف سمكرى بياخد العربيات ديه ويوضبهالك هوا كل حاجا سمكره وكهربا ومتور والاهم انك بخير
-
لاحول ولاقوة الا بالله الحمد لله انك كويسه و العربيه تتصلح يعني ان شاء الله
وياتري الكسر خطير ولا ايه
-
حمد لله على السلامة و فى داهية الحديد المهم ان ربنا نجاكى منها .
انتى شارية العربية مستعمل اكيد صح ؟؟
-
قدر الله وما شاء فعل ان شاء الله تتصلح وترجع احسن من الاول المهم الاستفادة من التجربة وبلاش ناخد الملفات بسرعة عالية .............. لانى ليا تجربة مشابهة فى كوبرى محرم بك فى اسكندرية بس الحمد لله ربنا ستر ولحقت نفسى فى اخر ثانية
والف سلامة على حضرتك
-
-
حمد الله على السلامة أهم حاجة
وربنا يكرم جيجي وتقوم بالسلامة
مرة برضو بيجو فى الشارع عندنا مش فاكر 206 ولا 306 بنتين راكبينها وبيجرو وطفل عدي الشارع جري هيا فرملت طبعا والعربية عامت جدا وراحت داخلة فى اكسيل راكنة خبطتها لدرجة ان العجلة اليمين خبطت فى الرصيف اللى واقفة جنبة واتكسرت والبيجو لفت حوالين نفسها و وقفت فى وش الأكسيل معرفش ازاى !! الصراحة من بعد الحادثة دى وانا حاسس انها ثباتها زبالة ، تخبط فى العربية من ورا وبعدين تقوم لافة حواليها وتقف وشها فى وشها !!!
Content Relevant URLs by
vBSEO 3.6.0 PL2