النهاردة بتمشى في مول مشهور واشتريت ايس كريم من جلاتريا روما
مكان معروف وموثوق في إن حاجته كويسة
أخوكم طلب بولة زبادي بالتوت وبدأت الاكل

يا سلام لذيذ وكل حاجة تمام المهم دخلت محل أجيب حاجة واديت الايس كريم لواحده كانت معاية على ما أجيب الحاجة

طبعاً عنيها زاغت على الزبادي بالتوت مع إن كان معها واحد و راحت دايسة فيه

رجعت لقيتها مدمراه وسيبالي فتات وطبعاً كان ساح

المفاجأة بقى بعد ما الايس كريم ساح لقيت حاجة سودة بتعوم في القاع مكانتش باينة وهو متجمد


لقيت إيه يا ايفو ......



لقيت صرصار
أيوا والله صرصار

وعينك متشوف إلا النور

أنا الحاجة إلي ريحتني نفسياً إن الصرصار دة جابلي حقي من صاحبتي المفجوعة دي

رجع يا معلم للصبح ههههه

رجعت بالجثة للمحل تاني ووريتوه ليهم
طبعاً حلفنات وايمانات بنظافه المحل والرقابة والكلام إلي ميجبش ولا يودي ده
وبعد كمية اعتذارات مهولة لميت الموضوع ومشيت

بس بردو ابعدوا عن المحل ده أو على الاقل خدو بالكو أحسن يكون في سحالي كمان هههههه