الموضوع: الكارثة اللي إسمها المقطورة

السلام عليكم و رحمة الله و بركاته,

إخواني الأعزاء أعضاء نايل موتوز, تحية طيبة وبعد,

أنا عايز أعرض عليكم مشكلة كبيرة جدا, و حل مؤقت لها (من وجه نظري),

أكييد طبعا كلنا تابعنا و بنتابع حوادث أقصد (كوارث) المقطورات علي الطرق السريعة و اللي للأسف كلها ناتجة عن تهور و روعنة و جنون سائقيها...!!!

اللي كلهم بيبقوا حافظين أماكن الرادار علي الطرق و بذلك بينجوا من المخالفات,

و اللي للأسف ياريت لو هو لوحده سائق المقطورة اللي بيروح فيها, لكن المشكلة إنه بياخد في وشه 20-30 ضحية مالهومش أي ذنب ....!!! من سيارات ملاكي و أجرة و اللازي منه,
و أكيد كلنا تابعنا و بالصور الكارثة اللي كانت علي دائري المعادي من سنة أو سنة و شوية وراح ضحيتها عدد كبير جدا,

المهم أنا و كعلاج مؤقت و من مبدأ (من رأي منكم منكرا فاليغيره), فا أنا قولت أنا مش هاسكت,

و قررت أنني منين ما أكون علي أي طريق سريع ليلا أو نهارا و أشوف عربية مقطورة بتجري بجنون أو متعدية السرعات بكتيير, أني أخد رقم العربية و أحفظ شكلها و بعدين أسبقه لأقرب كمين علي الطريق و أنزل بنفسي و أبلغ عن رقم العربية و مواصفتها لضابط الكمين,

و بالفعل عملت الموضوع ده أكتر من مرة و الحمد لله كانت إستجابة ضباط و أمناء الشرطة أكثر من رائعة, حيث أنهم كانوا يقابلوا الموضوع بكل جدية و حزم, وكنت دائما أقف لأرقب ماذا سيحدث, و لكن و الحمد لله كان الموضوع يأخذ بجدية و بالفعل كانوا يتحركوا لإيقاف السائقين و إتخاذ الإجراء المناسب,
و بعدها كنت بحس بجد براحة نفسية كبيرة, أني قدرت أساعد في تغير منكر,
فا أنا من منطلق حرصي و خوفي علي أرواح المئات ممن تضيع أرواحم و تسفك دمائهم علي الأسفلت بسبب هذا الكابوس اللي أسمه المقطورة,

أقترح علي كل من يقرأ هذا الموضوع أن يبادر بنشره أولا و من ثم العمل به و لو علي سبيل التجربة, و صدقوني يا جماعة انتوا كده بتعملوا خير هاتثابوا عليه.

و ربنا يستر طريقنا كلنا يارب.
و السلام عليكم و رحمة الله و بركاته.