-
اختار اية علشان تعبت
ان شاء الله هشتري كمان شهرين وبعد مادوخت فى النت كله ولفيت منتدى نيل موتورز كله برضه وجدت ان فى حدود فلوسي ممكن اجيب
1_سوزوكى ماروتى 38الف(شكل مش حلو اوى وصغيره وتابلوه مقرف و800 سي سي يعنى مش بتاعة سفر اخرها 100 بس عربية بقى ليها وزنها فى السوق المصري وقطع غيار رخيصة واستهلاك بنزين قليل واى ميكانيكي يصلحها)
2_سوزوكى التو45الف(شكل افضل بكتيييير من الماروتى وتابلوة نضيييف وشبابي جدا وقابلة للتظبيط وبيتلعب فيها برضة وزيادة 8 حصان عن الماروتى بس سعرها ازيد 7000 جنيه عن الماروتى وبرضة 800 سي سي يعنى مش بتاعة سفر والفروق بينها وبين الماروتى فى الشكل وان فيه 8 حصان زيادة وانها انجيكشن مش كاربراتير زى الماروتى بس قطع غيارها اغلى من الماروتى ودة عيب فيها يمكن لانها مش منتشرة زى الماروتى ياتري الفروق دى تستاهل 7000 جنيه زيادة ؟)
3_ايديا 40 الف(شبابي جدا شكل جميل وكماليات رائعة زى اى عربية صيني يتمناها اى شاب بس محدش يعرف عنها حاجة ولا حتى انا ودورت عليها هنا فى قسم الصيني ومعرفتش اوصلها هى تبع شركة اية اصلا؟؟ ياريت الناس اللى تعرف عنها حاجة تفيدنى و ياريت بياناتها الفنية لانها لو كويسة هتبقى صفقة رابحه جدا لشاب يهتم بالشكل والكماليات وعايز اعرف نظام قطع الغيار متوفرة ورخيصة ولا اية)
4_لانوس مستعمل 40الف(عربية غنية عن التعريف قطع غيار متواجدة فى كل مكان وبسعر معقول ومتجربة ومفهاش اى مشاكل غير انها استعمال وانا موسوس شوية فى موضوع استعمال دة وكمان فى البيت رافضين الاستعمال خالص لكن انا لسه حاطه فى اختياراتى لو يأست من ال 3 اختيارات اللى فاتوا)
اتمنى تقولولي رأيكوا بالتفصيل مش مجرد (خد اللانوس) مع مراعاة انى شاب 21 سنة اسكندرانى واكيد هظبط فى العربية بعد ماجيبها كاوتش وجنوط وكاسيت سي دي وسماعات وكده وفى الغالب معايا صحابي يعنى مش استعمال عائلي اوى يعنى واحد جنبي واتنين ورا يبقى كويس. ومش هقدر اغيرها بعد فترة قريبة طبعا لانى هبدأ اكون نفسي ومش هفكر اغيرها قبل مدة طويلة وان كان الاقرب بالنسبالى الماروتى والالتو
-
السلام عليكم
انا رأيي تتكل على الله وتجيب الماروتي انا معايه واحده بقالها شهر تقريبا ممتازة سافرت بيها 200 كيلو من غير ما نريح في الطريق ومسخنتش ولا حاجه الحمد لله
كنا 3 راكبين و الكرسي اللى ورايا كنت تانيه وحاطط فوقه شنط وحاجات تقيله (لوح رخام تقيل جدا) انا جبتها موديل 2008 زيرو ب30 الف بس
موديل 2009 بتعمل 35 الف مش 38
على العموم دور لو لقيت فيه موديل 2008 زيرو يبقه انت اولى بالفرق 5 الاف جنيه
الألتو تقريبا هيه هيه بس اوسع سنه بسيطه ماعتقدش ان ده يفرق كتير
كمان مارشحش المستعمل ماتضمنش اللى قبلك عمل فيها ايه
انا مريت بنفس كلامك ده بالظبط لغايه ما ربنا اكرمني ولقيت العربيه دي في معرض كانت ارخص بس لأنها موديل سنه اقدم
ده رأيي الشخصي
وربنا يوفقك
-
انا تقريبا في نفس سنك و موقفك .. و مستني اسمع ردود الناس
بس احب اقوللك ان الماروتي عربية عملية جدا و لية واحد صاحبي جايب واحدة زيرو 2009 بـ 35 الف و هو مبسوط منها .. بس بصراحة الشاب اللي في سننا بيحب يركب عربية من غير ماحد يتريق عليه .. طبعا انت فاهم الماروتي دي كل الناس بتبصلها على اساس انها توك توك محترم شوية و بيستهيفوها اوي على الطريق علشان حجمها الصغير جدا
على العموم متابع موضوعك باهتمام
-
توكل على الله واشترى ماروتى جديدة
وسيبك من اية حاجة مستعملة
-
لو انك فتاة او سيدة كنت نصحتك بالماروتى لانها زيرو وده معناه تقريبا زيرو اعطال وهذا مهم جدا للسيدات اما بما انك شاب فارشح لك اللانوس بشدة بشرط الحالة. الالتو مش بطالة بس من وجهة نظرى حرام الواحد يدفع فوق الاربعين الف فى عربية 800سيسى ولذلك فى فئة ال 800 سىسى هما عربيتين الماروتى والبرودوا.وللعلم الماروتى بتمشى على 120كم/س بدون مشاكل وهيا عربية حمالة اسية وشكلها مش وحش هيا بس صغيرة شويتين ولكنى برده ارشحلك اللانوس
-
بجد مش عارف اشكركوا ازاى على الردود دى
وفعلا كل اللى معاه الماروتى بيشكر فيها جدا وشايف انى ادور على موديل 2008 وفرق ال 5000 دة ممكن اظبط بيه العربية جامد وعلى فكره شفت صورة على النت للماروتى صاحبها عاملها شبة البولو ههههههه
-
لو عايزنى ارفع الصورة قولولي ازاى وانا ارفعهالكوا هى ماروتى لونها ابيض بس شكلها حلو اوى وفيها شبه بسيط للبولو
-
إما الماروتى لو عايز تشترى دماغك، وإما اللانوس لو عايز تركب حاجة كبيرة بس تحمل وجع الدماغ فى متابعة الصيانات الى متتالية اللى بتحتاجها اى عربية قديمة
الألتو غالية بدون داعى والأيديا خرجها من حساباتك
بالمناسبة انا شارى الماروتى موديل 2008 للمدام بقالها معانا سنة و10 آلاف كيلومتر، الحمد الله كل اللى عملناه فيها حتى هذة اللحظة اننا زودنالها مية بطارية ، قزازة ب 2 جنيه ونص، ورحنا بيها اسكندرية وانا رحت بيها مرة كفر الشبخ وشغالة طحن مدينة نصر 6 اكتوبر وبدون اى شكوى
-
تمام كده انا فعلا مش عايز عربية توجع ماغى خصوصا انى مش فاهم حاجه فى الميكانيكا يعنى لو وقفت بيا مرة هحتااااس يبقى باذن الله الماروتى هجبها على شهر 12 يارب تكون موديلات 2010 نزلت واشتري موديل 2009 بقى بسعر اقل وشكرا مرة تانيه على النصايح الغاليه دى
-
الماروتى حلوة
وممكن تعلى شوية وتجيب الالتو
Content Relevant URLs by
vBSEO 3.6.0 PL2