غيرت رشاشات وغيرت بوجيهات وسلوك بوجيهات وبرضة لسة بتأخر في الدوارة؟؟؟؟

أخواني
مش عارف أعمل إيه؟
سألت ف المنتدى عن سبب تأخير الدوارة الصبح قالوا ممكن تكون بوجيهات أو سلوك بوجيهات والاحتمال الأكبر إنها رشاشات.
وسمعت بالنصيحة ورحت غيرت وجبت رشاشات استيراد هيونداي، وكمان غيرت البوجيهات وعليهم بالمرة سلوك البوجيهات
وحتى الآن العربية بتأخر في الدوارة خصوصاً لما تكون مركونة من فترة كبيرة، يعني من المغربية مثلاً لتاني يوم الصبح .
يا ترى إيه سبب المشكلة؟ مع العلم إني بعمل الصيانة الدورية بتاعة العربية، ولسة مغير سير الكاتينة، وحطيتها ع الجهاز مفيش أي أعطال ظاهرة، أرجو الإفادة

ممكن البطاريه ضعفت...

البطارية لسة جديدة!!!!!!!!!!!!

طيب بعد ماغيرت البوجيهات وسلوك البوجيهات... اختبرت شرارة الموبينه ؟

حنزل دلوقتي اختبرها وأقولك

معلش يعنى ايه رشاشات
لسه جديد فى العربيات انا اسف

الموبينة شرارتها كويسة

اقتباس:

---

معلش يعنى ايه رشاشات
لسه جديد فى العربيات انا اسف

---

دي المسؤلة عن ضخ البنزين لغرف الحريق في الموتور ودي موجوده في العربيات الانجكشن (الحديثه)... يناظرها الكربراتير في العربيات القديمة.

اقتباس:

---

الموبينة شرارتها كويسة

---

انا باحاول اجتهد معاك مش أكثر... وكلنا بنتعلم...

طيب انت لما غيرت البوجيهات ظبطت الخلوص بتاعها ( المسافه بين الموجب واليالب بتاع البوجيه ) ؟؟؟

ومن ناحية تانيه.
بعد الدوراة هل استجابة العربيه في السحب والتجميع طبيعيه ؟
وهل لاحظت تغير في استهلاك البنزين بعد ظهور مشكلة غياب الدوارة ؟

نفس المشكلة عندى انا عندى لانوس 99 عاملة 109 الف كم

انا كان عندى نفس المشكله وطلعت من طرمبه البنزين

اقتباس:

---

انا كان عندى نفس المشكله وطلعت من طرمبه البنزين

---

ماهو ده اللي انا شاكك فيه... ان موتور الطلمبة ضعيف او الفلتر مكتوم...
بس في الحالة دي لازم يكون في تأثير علي تجميع وسحب العربيه... (العربيه تبقي مخنوقه)

اقتباس:

---

بعد الدوراة هل استجابة العربيه في السحب والتجميع طبيعيه ؟

---

بعد الدوراة هل استجابة العربيه في السحب والتجميع طبيعيه ؟
والله يا أبو يوسف الاستجابة ذي الفل والتجميع طبيعي خالص ومفيش أي مشكلة، وعلى فكرة حكاية تأخير الدوارة ده مش دايماً، يعني في اوقات من أول تكة وأوقات مرة واتنين وتلاتة

طيب نتابع مع حد أكثر خبره في دورة البنزين والكهرباء. يكون عنده اقتراحات لحل المشكلة...
.
.
انا حاولت اساعد لكن لحد كده ماعنديش اقتراحات.
متابع.

اقتباس:

---

وعلى فكرة حكاية تأخير الدوارة ده مش دايماً، يعني في اوقات من أول تكة وأوقات مرة واتنين وتلاتة

---

والحكايه دى بتحصل سواء والعربيه بارده أو ساخنه
ولا وهى بارده فقط

وهل حصل مرا ت عديده وكنت بتنسى وتدور كونتاكت والمكنه دايره

سمير باشا، الحكاية دي بتحصل لما بتكون باردة.
حكاية اني انشى واشغل العربية وهي شغالة حصلت 3 مرات

ياسر بيه (صباح الفل عليك )

يبقى كده أحتمال عيب من المارش بعيد شويه
سواء ضعف فى المارش أو وجود تشوه فى أسنان ترس البندكس

والمفروض تراجع على كتاوتات الأشعال الموجوده فى علبة الفيوزات

أحتمال تكون محتاجه شوية نظافه بمنظف ألكترونيات بين أرجل الكتاوت
وقاعدته فى علبة الفيوزات

وبرضه عاوز أقولك أن لزوجة الزيت وهو بارد بيبقى عليها عامل برضه فى تأخير الدواره

أنا أما كنت لسه شارى العربيه وهى لسه زيرو
وكنت بأستعمل زيت موبيل xhp المعدنى كانت بدور بعد مرتين تقريبا

لما غيرت لموبيل 1 التخليقى بدور على طول من أول مره

وبرضه كنصيحه عامه

جرب تدور كده ...وأنت جايب الدبرياج على الأرضيه
لتخفيف حمل الدواره على المارش .....يمكن ربنا يسهل وتتلاشى الملحوظه دى

ربنا يا خليك يا بشمهندس سمير، ومتشكر خالص على سرعة الاستجابة، وعلى فكرة أنا أول مرة أعرف إن التدوير وأنا دايس على الدبرياج مفيد، أصلها عادة فيا في أي عربية أركبها أدوس دبرياج وأنا بدور تحسبنا لتكون واخدة غيار، كعادة المصريين. ألف شكر يا باشا.
لكن كان لي سؤال تاني زي بعضه الشيء بالشيء يذكر.
هو أكيد طبعاً غلط إن الإنسان يخطيء ويدور العربية وهي شغالة، يا ترى ده ممكن يأثر على إيه؟ فيه حاجة ممكن تبوظ لإني عملتها زي ما قولت لحضرتك 3 مرات في أوقات مختلفة، وكنت لما أعملها أسمع صوت صريخ من موتور العربية عالي خالص، فده أكيد بيأثر على شيء في العربية يا ريت توضحلنا الحكاية دي يا باشا

اقتباس:

---

المشاركة الأصلية كتبت بواسطة battikh

ربنا يا خليك يا بشمهندس سمير، ومتشكر خالص على سرعة الاستجابة، وعلى فكرة أنا أول مرة أعرف إن التدوير وأنا دايس على الدبرياج مفيد، أصلها عادة فيا في أي عربية أركبها أدوس دبرياج وأنا بدور تحسبنا لتكون واخدة غيار، كعادة المصريين. ألف شكر يا باشا.
لكن كان لي سؤال تاني زي بعضه الشيء بالشيء يذكر.
هو أكيد طبعاً غلط إن الإنسان يخطيء ويدور العربية وهي شغالة، يا ترى ده ممكن يأثر على إيه؟ فيه حاجة ممكن تبوظ لإني عملتها زي ما قولت لحضرتك 3 مرات في أوقات مختلفة، وكنت لما أعملها أسمع صوت صريخ من موتور العربية عالي خالص، فده أكيد بيأثر على شيء في العربية يا ريت توضحلنا الحكاية دي يا باشا

---

ياباشا دا هو ده الصح أنك تدوس دبرياج وأنت بدور

شوف الكتالوج بيقول أيه

http://www.nilemotors.net/Nile/52305-a.html

وأدى مشاكل نسيان فتح الكونتاكت والمكنه دايره

http://www.nilemotors.net/Nile/62472-contact.html

شكراً يا باشا لسرعة الرد، ودي عادة سعادتك، سباق إلى الخير دايماً

الله يخليك يادكتور

وتحت أمرك يا أخى

اشك انها طرمبه بنزين

شوف الرداخ بتاع البنزين يا باشا

ممكن الكهربا تكون ضعيفه فى بداية الأشعال