تجربه سيئه مع ميكانيكي مش عارف اقول عليه ايه !! " اسمه بعدين " لما اسمع الأراء

السلام عليكم !
اولا كل سنه و انتم طيبين
التجربه كالاتي و يشهد علي كل احداثها تامر !!
انا عربيتي فيكترا 99 1600 مانيوال كنت عايز اعدل في العربيه زي ما تامر عامل لان الفرامل عنده حسيتها كويسه ما شاء الله فجبت طنابير ورا علشان اغير من الابائيب لطنابير و حصل و روحنا عند الميكانيكي و غيرها و كله تمام و كان فاضل رجلشه فرامل اليد فقالي بكره علشان الوقت اتاخر فقلت قشطه !! كام يا عمو الميكانيكي 120 !!!! قلتله ليه دا عمليه بسيطه و مش بتاخد اكتر من نص ساعه و كمان تامر انت كنت عاملهالو ب 50 جنيه المهم من هنا ل هنا دفعت 100 جنيه قلت يلا اللي يجي في الريش بقشيش !!
العربيه تمام و زي الفل بس لاحظت حاجه ان لمبه ال ايه بي اس بتفضل منوره لما اشغل العربيه حتي لو فضلت واقف و مشغل ربع ساعه تفضل منوره و اول لما اتحرك تطفي و مش تنور تاني المهم رحتله تاني يوم علشان ارجلش فرامل اليد و اشوف موضوع ال لمبه دا ايه ؟؟
رحتله الساعه 8 بليل كدا قالي الوقت اتاخر و عايز اقفل قلت قشطه اعدي عليك بعد بكره " علشان بكره دا كان الحد " بس شوفلي موضوع ال لمبه دا ايه قالي مفيش الصره عايزه تتغير قلتله و انت ايه عرفك يعني بتنجم ما تقوم تبص علي العربيه !! و حطها علي الجهاز قالي عايزها تتحط علي الجهاز قلتله اه !! قالي طيب المهم طلعت العربيه مسجله كود قديم و مسحه و تمام العربيه مش هتعمل كدا تاني طيب شكرا يا سيدي هبقي اعدي عليك يوم الاتنين طيب بس في كدا اربعين جنيه !!!!!
بتوع ايه " دا انا بقي " لقيته بيقولي كشف الجهاز !! من شدة الاستغراب بقيت مبرق و مش قادر ارد عليه و فجاه فوقت من الصدمه دي و قلتله جهاز ايه !! قالي جهاز الكمبيوتر قلتله هوا انت جايب الجهاز دا ليا انا بس مثلا مش دا شغلك و انت حصل عيب بعد الشغل اللي انت عملته دا فبتكشف علشان تشوف العيب منين !! بيقولي اصله لسه كان بايظ الكابل بتاعه و اتلسعت فيه 3500 جنيه قلتله بردو مش مشكلتي هوا مش بيشتغل غير علي عربيتي بس مثلا و انت جايبه مخصوص ليا ما يارب يتكلف 100 الف جنيه مش مشكلتي !!
المهم كنت مصدع و مش عايز رغي قلتله لما اجي يوم الاتنين !!!
رحت انا و تامر بقي يوم الاتنين و مش عايز اقولكم علي كميه الرغي و الكلام اللي مالوش لازمه و القرف اللي بجد حسيت بيه و انا بتكلم مش مصدق اني نزلت بمستوايا العقلي و الفكري لمستوي حد بيتكلم بالطريقه دي خصوصا انه بيراجع علي شغله علشان اللمبه بتنور !!


انا قلت كل حاجه و مستني ردودكم اعرف مين اللي غلط انا و الا هواا علشان لو انا اروح اوديله ال 40 جنيه اللي كان عايزهم !!!

اسف للاطاله !! و هبقي اقولكم علي اسم الميكانيكي دا ان شاء الله لما اشوف الاستطلاع !!

انا عرفته
اقول و لا بلاش
هو الكشف فعلاً ب 40 جنيه عشان الأمانه
بس كان دخل دى فى دي و خلاص احسن خصوصاً انه لسعك فى كتير فى موضوع الطنابير ده

لا يا محمد انا اعرف ناس كتير مش بتدفع عندها لا كشف ولا بتاع يمكن انا غلطان بس هوا فعلا واخد حقه و زياده في تغيير الطنابير

المهم انت صوتت و عرفت انه لا :]

يبقي كدا الفكره بتظبط في دماغي حصوصا ان تامر كمان مكانش موافق علي اللي بيحصل

بيتهيالي عارفة
مدينة نصر
طب ممكن سيد و جمعة و طاهر:shyy:

يا محمد الطبيعى انه كله على قفا الزبون حتى الشاى بتاع الصنايعية كان واحد فى دايو او اسبرانزا بيقولك انه دخل التوكيل فى الصيانه المجانية و هو ماشى بعد ما قعد فى كافيتريا التوكيل قالولوه العربية عليها 20 جنيه مهمات مستهلكه كبرت فى دماغة و دخل لغاية رئيس الصيانه قالوه لامؤاخذه دى تمن المشاريب المجانية اللى انت شربتها
قول الحمد لله و مشيها بقى

ده كفاية العطلة و على قولك شغل الهمج اللى كان شغالين فيه فى العربية و البرود القاتل بتاعهم

يابو حميد سيبك من هوا مين المهم رايك في الموضوع انا لازم افضل محيركم شويه في هوا مين !!
هبقي اقولكم لما اشوف التصويت دا هيوصل لفين

يا محمد انا اتصدمت من طريقه المعامله بجد لدرجه اني كنت هخرج عن شعوري لولا تامر كان بيسكتني

اولا ال 40 جنيه دي مش هيا اللي هتفقرني يعني اكيد انت فاهم كدا بس بجد الاسلوب حسيت انه بيتنصب عليا عيني عينك كدا فمكانش ينفع اني اسكت و كنت مستعد اوصل مع الموضوع دا لابعد الحدود يارب الدنيا تولع المهم اللي في دماغي هوا اللي يحصل !! بس كدا

مفيش صنايعى عنده ضمير خصوصاً لو لاقى لنفسه زبون و بعد ما كان على الرصيف بقى اسطى كبير
الفلوس بتغر بردو

هنعمل ايقي بقي يا طناني
تخيل بيقولي ايه !!
بقوله انا اول مره اسمع عن كشف دي خصوصا لما بتكون بتراجع علي شغلك بيرد سعادته و يقولي انا مش ذنبي انك شاري عربيه جديد او اول مره تركب عربيه كنت عايز ........... تقريبا المعني وصلك !! و كنت عايز اقولك انت تعرف عني ايه يا شبيه الادميين انت و الا تعرفني منين علشان تقول اول مره و الا اخر مره !! و يخصك في ايه انت لو واحد مهما كان جاي يعمل حاجه عندك فانت لازم تحترمه علشان دا اللي بيخليك تاكل عيش و تفتح بيتك و بيت اللي شغالين معاك في المكان بجد منتهي قله الذوق !!!