الموضوع: حادثه علي زراعي سوهاج (محتاج خبرة خبراء الدايو)

الاول الحمد لله علي كل شيء وقدر الله وما شاء فعل

امبارح يا جماعه واحد صاحبي عمل حادثه بعربيته علي زراعي سوهاج نتيجة اهمال سواقين النقل

تفاصيل الحادثه

كان صاحبي ده ماشي علي 70 تقريبا لاقي في المقابل عربيتين نقل

-الي علي الشمال(من جوه في طريقها) عربيه تقل كبيره بمقطوره

-الي علي اليمين (الي بيتجاوز) عربيه ربع نقل (الدبابه)

بتاع الدبابه لما لاقي نفسه خلاص قرب من الدايو حاول يلم نفسه ناحية المقطوره بس حمل جامد علي المقطوره راح لابس في العجل بتاعها

راحت العربيه معومه منه ولبس وش في وش في الدايو وكانت المقطوره لسا جمبه فاخدت ضهر الدبابه معاها ولفت بيه لبسته في ضهر الدايو تاني

المهم ستر ربنا انا مفيش عربيات كانت قريبه منهم كانت بالسلامه معاهم

دلوقت ادي صور العربيه



























طبعا انهارده الصبح روحنا اخدنا العربيه من مكان الحادثه

وبدا موال التصليح

كان معانا الونش ده ولفينا شويه بالعربيه علي كام سمكري

وقدامنا دلوقت امر من تلاته

1 - سمكري هياخد العربيه من الالف للياء وملناش دعوه بشراء اي شيء وده عايز 10 تلاف جنيه واستلام العربيه علي المفتاح بعد شهر

2- بيع العربيه علي حالتها كده وده سمعنا فيه ارقاام غريبه وفلكيه وقمة الاستغلال والقذاره الي جابها ربنا

تخيلو سمعنا فيها 10 تلاف جنيه؟؟؟ ايوه والله 10 تلاف جنيه

المهم

سمعنا من الـ 10 تلاف لغاية 22 الف بس صاحبي ده كان طالب نهائي نهائي 25 ومش عايز اقل من الـ25 الف جنيه واحد

3- سمكري ابن حلال عرفته لما كلمت ناس معارفي وطلبت مساعدتهم

ده راح متصل بواحد مشهور بتاع استيراد هنا في اسيوط متخصص دايو وجه وعاين العربيه وشافها محتاجه ايه وكانت طلباته كالتالي

1- رفرف شمال تايواني 275

2- كبوت تايواني 650

3- اكصدام كامل (تلات قطع) تايواني 500

4- صدر امامي (الي قبل السربنتينه) استيراد 275

5- قطعية فخدة كرتيره (من ورا الفانوس لغاية بطيخة الكرتيره) استيراد 500

6- ريداتير استيراد 300

7- سربنتينه استيراد 300

8- 2مروحه استيراد 250

9- قربة مساحات استيراد 80

10- علبة زيت باور 80

11- مقص شمال 130

12- كشاف امامي شمال صيني 90

13- فانوس خلفي شمال 35

17- كوبلن شمال 250

الحساب توتال علي بعضيه 3715 بعد الخصم بقي 3550

وفي احتمال غطا الشنطه يتغير بـ 350

وكمان قشرة تابلوه ادي كمان 300

يعني تقريبا قفلنا الاربعه وشويه

ده بقي خلي صاحب العربيه يفكر يجيب قطعيه كامله استيراد بالتابلوه بالمكنه بكله كامله علي بعضها

نزلنا لفينا شويه بس كنا بندور علي نفس لون العربيه (الشامبين) وده نادر جدا جدا جدا

الاسعار ما بين 6500 لـ 9000 جنيه

ابو 9000 ده نفس لون العربيه بس بتاع لانوس 2 موديل 2005 ومكنه وفتيس هيدروماتيك

وده بقي الخيار التالت ليه علشان يلم العربيه صح

السمكري رسينا معاه علي 1000 جنيه مقفوله مصنعيه وتقريبا 500 ميكانيكي وكهربائي و1200 دوكو

دلوقت انا عايز خبراء الدايو الي بينزلو الحرفيين كتير عايز اعرف منهم ايه اخبار الاسعار في بحري

لاني عايز اشوف راينج الاسعار بتاعة القطعيه الكامله لحد التابلوه عمل كام ولو دخلت في 5 او 6 مفيش مشاكل فللي خالص

احسن ما اجيب شوية رفايع بـ 4 وشويه

دلوقت قدامكم كل شيء عايز مشورتكم ضروري

اختار انهي حل في دول؟؟؟

1-اسلمها للسمكري واستلمها علي المفتاح؟؟

2- ابيع العربيه علي 22

3- اوافق بموضوع السمكري وكده الموضوع هيقفل 8 تلاف وشويه فكه

4- اجيب قطعيه كامله واخد منها الي انا عايزه مع العلم بحري بالنسبالي مشوار وفي مصاريف نقل ولو المكنه او الفتيس فيهم حاجه محتاجين يرجعو؟؟

فكرو كده معايا وعايز اسمع رأيكم وكمان ايه رايكم في الاسعار بتاعة الحاجات الي فوق دي؟؟؟

A.Yakout