المشاركة الأصلية كتبت بواسطة superiorboy
الكلام ده مطبق برة علشان فيه نسبة بين الدخل و الزيادة ... لكن احنا عندنا ما شاء الله الدخل ثابت و الحاجة عمالة تزيد و الدخل ثابت و الحاجة تزيد الخ...
كان لتر ال90 بجنيه خلاه ب175 قرش و لما قلنا ايه الاستهبال ده قال ماهي الحكومة لسة بتدعمو بس الدعم نسبته قلت دلوقتي هيشيل الدعم خالص
عارفين معنى ان الدعم يتشال من على البنزين و الكهرباء ايه اللي يحصل؟!
يعني البنزين هيغلى
يعني المواصلات هتغلى يعني بدل مالتذكرة ما كانت بجنيه بقت بجنيه و بريزة بقيت بجنيه و نص يعني هتبقى ب3جنيه؟ّ يعني واحد عنده عيلين و مراته و هو لو حبو بنزلو من بيتهم يدفعو رايح جاي 24 جنيه ده ايه الاستهبال ده؟!
يعني المترو هيغلى بدل ماكان ب.75 قرش بقى بجنيه هيبقى بجنيه و نص ولا 2 جنيه يعني برده هيبقى استهبال
يعني صناعة السيارات هتضرب في البلد لان الناس هتبقى قادرة على الشراء(ده لو هو صحيح هينزل الجمارك) لكن مش هيقدرو يصرفو عليها يعني النتيجة عربيات مرمية في الشوارع مودلات حديثة و قديمة و زحمة زيادة و عربيات مركونة عند التجار بيدفعلها فوايد للبنوك علشان القروض اللي واخدنها و مش عارفين يبيعوها
يعني طوابير زيادة على البنزين ال80
يعني رغيف العيش هيغلى علشان الافران شغالة بسيور على الكهرباء
يعني المدارس الخاصة هتغلى علشان يعوضوا المصروفات بتاعتهم و المدارس الحكومة ما شاء الله زي ال...
يعني نسبة الجوع هتزيد
يعني نسبة الجهل هتزيد
يعني نسبة البطالة هتزيد
يعني نسبة الجريمة هتزيد
يعني المرور مش هيلاقي حاجة يحصل عليها مخالفات و يحط قوانين جديدة
انا والله العظيم مانا عارف اقول ايه
لما انا لسة متخرجتش و شايف الدنيا كدة
ولادي هيعملو ايه؟! طيب هل هقدر اصلا اتجوز علشان اقول ولادي ؟! و فرضا قدرت هل هكون قادر اربيهم زي مانا ماتربيت
دلوقتي فعلا عرفت ابويا و امي تعبو قد ايه في تربيتي انا واخواتي و انا مكنتش حاسس
ربنا يخليهملي يا رب و حسبي الله و نعم الوكيل في اللي مش عاوز الشعب ده يعيش زي باقي الخلق
حسبي الله و نعم الوكيل