قصة رحلتى مع بروتون و تقييم الـ 30 ألف 1-2
بسم الله الرحمن الرحيم
اسمحوا لى أن استهل الموضوع بجمله حقيقة ً نابضة عن قلبى و هى
(إخوانى البروتانيين الأعزاء)
السلام عليكم و رحمة الله و بركاته
كل سنه و انتم طيبين و يارب تعود عليكوا الايام بخير يا رب
مش عارف ابتدى منين بس يمكن الموضوع يكون طويل شوية لانى هاحكى فيه قصة حياتى مع عربيتى البروتون البيرسونا من ساعة لما فكرت فيها كـ (Brand Name) حتى الآن مع اعتبار ان ده تقييم لشخص استخدم العربية لمسافة 29 ألف كيلومتر.
و لتقليل حدة الملل قررت انى أقسم الموضوع لجزأين , الجزء الاول ماقبل شراء البيرسونا.
و بعتذر لجميع الأعضاء على قلة مشاركاتى مع اعتبار انى كثير الدخول إلى المنتدى الحبيب و لكن لاكتساب الخبرات و حان الوقت لإضافة موضوع أتمنى ان يصقل خبرات من كانوا أو لايزالوا فى وضعى.
هابدأ الحكاية و ارجع سنة كامله للخلف فى وقت زي اللى احنا فيه ده كنت بفكر اشترى عربية – كان معايا شاهين 2001 و كانت 1400 CC –
كنت عايز اشترى عربية و كان معايا حوالى 30 ألف جنيه عايز احطهم فى مقدم و استثمر فيهم نفسى و راحتى فى عربية مريحة و جميلة و تلبى احتياجاتى – الصراحة كباقى الاعضاء , فى الاول كنت محتار مابين أنواع كتير , هيونداي النترا, نيو أكسنت (مع أخو المدام) , ميتسوبيشى لانسر, صنى – الصراحة كانت انواع كتير جدا بفكر فيها و كنت محتار مش قادر اخد قرار .
فى الوقت ده أو قبله بشويه كنت بشوف عربية بتإثرنى و بتشدنى إليها دايما و ماكنتش عارف ايه نوع العربية دى و لا أعرف انتاج مين من الدول.
العربية دى كانت الجين2 و سألت عليها لمجرد العلم بالشئ و تلبية لفضولى عرفت انها ماليزى و الموتور بتاعها انتاج شركة انجليزى’ الصراحة انا كنت مش حاط فى دماغى انى عمرى ماهشترى من بروتون ابدا و ده لانها بالنسبه لى مش منتشرة و مش مع ناس كتير و فى نفس الوقت انا ماسمعتش عن ان ماليزيا ليها سمعة فى انتاج السيارات مش زي اليابان و كوريا و اعتبرتها زي العربيات الصينى اللى مالية البلد.
بس الصراحة شئ غامض كان بيخلينى اتشد ليها , و احاول ادور على مواصفاتها و ابتدى البحث عن امكانيات الجين2 , دخلت على الموقع الخاص ببروتون و اظن انه كان تابع للمملكة المتحدة و ابتديت اشوف مواصفاتها.
الصراحة ابتديت انبهر من الامكانيات بس طبعا ماعرفش السعر ماهو انا لو قريت مواصفات المرسيدس او البى ام اكيد هاتوهم و أكيد برضه هاتوهم من السعر , المهم قعدت اتطقس لحد ماعرفت انها تابعة للوكيل عز العرب, عز العرب !! مش ده بتاع الشيروكى و الدودج و السيتروين , الخ.. !! غريبه طب هل هو هايجازف بإسمه لعربية ماليزى غير منتشرة , طب انا بشوف اعلاناته مش بتقول بروتون خالص , اشوف الشيروكى أشوف السيتروين لكن اعلان لبروتون – مافيش.
المهم قررت انى اسأل عليها و اعرف اسعارها و اعرف امكانياتها – ابتديت اشتغل على جانبين, الاول انى اشتغل على الجين تو فى اتجاه و اتجاه تانى انى اروح المعارض و اشوف العربيات كلها و افاضل.
شوفت اللانسر و شوفت الالنترا – ماتفرجتش على النيو اكسنت لانى قبلها بحوالى 5 شهور كنت شاريها مع اخو المدام و عارف امكانياتها و عارف سواقتها – المهم لقيت نفسى مش مقتنع بأي عربية (تلاكيك) طبعا انا كنت بدور على الفئة اللى من 90 ألف و ماتزيدش عن 100 ألف و طبعا كنت سألت على سعر الجين و عرفت انها كانت كذا باكيدج اللى منها سبور و اللى منها فول اوبشنز و اللى منها فول اوبشنز اوتو و كانت فى حدود الباكيدج دى.
المهم مش هاطول عليكوا فى الجزء ده اكتر من كده علشان انا عارف ان فى ناس هاتمل من الموضوع.
صليت استخارة و لقيت قلبى بيروح للجين 2 أكتر و أكتر و لقيت نفسى بتعلق بيها.
آه نسيت اقولكوا ان فى الوقت ده تقريبا دخلت مره على جوجل و كتبت كلمة جين 2 بالعربى و افتكر ان طلعلى موقع نايل موتورز يمكن اول او تانى نتيجة للبحث – دخلت على الموقع و هالنى ما رأيت.
ناس بتتكلم عن البروتون و خاصة الجين تو – قعدت أقرأ و أقرأ – تقريبا دخلت قريت 80% من المواضيع اللى فى قسم بروتون.
و طبعا فى الفترة دى كنت خلاص ركنت كل العربيات من دماغى و مابقتش ابص غير للجينا.
كنت اما اشوف عربية جين 2 اجرى وراها و افضل اقول فى عقلى يارب يسبقنى – و يقرص عليا علشان احس ان فعلا اختيارى صح و كلام اعضاء المنتدى عليها صح – و كنت لما اكون ماشى على الدائرى (طريقى اليومى للشغل - مدينة نصر - المريوطية) و ألاقى جين تو جاي طلقة ( بمعنى كلمة طلقة) جاي من ورايا و شايفة فى المرايا أوسعله وقتى علشان اتفرج عليها و هى بتعمل (زو) من جانبى و كنت ببقى فرحان جدا (انا عارف انكوا هاتقولوا عليا عيل اهبل) المهم استخرت ربنا مره و اتنين و تلاته و كان كل مره قلبى يميل على الجين 2 – بس كل ده و انا ماشوفتش العربية من جوه – الناس بتقول ان التقفيل مش قد كده و انا الصراحه عديت على عربيات كتير تقفيلها من جوه كويس طب اعمل ايه.
و المعارض زي المصرية و سمير ريان و الطارق و الناس دى مش بلاقى عندهم العربية دى – المهم قعدت ادعبس لحد ماعرفت انها موجوده عند معرض جانبى فى شارع عز الدين عمر فى الهرم (المقابل لشارع العريش) – و اسمه فارايتى , المهم رحت هابئ عليه – دخلتله و سألته عليها و قعد يشكرلى فيها للصبح – طبعا انا قلت كلام بياعين و هايعملى من الفسيخ شربات جاريـِه يا واد و قوله عايز اشوفها من جوه دخلت العربية ( كانت جين تو نحاسى مو 2008) و كانت اخر عربية عنده – على حسب كلامه يعنى , المهم دخلت و طلبت منه المفتاح علشان اشغل الكونتاكت و اشوف التابلوه و كده و الصراحة اضايقت شويه من التقفيل و قلة جودة خامات المقصورة لحد ما, بس الصراحة انبهرت من التصميم و الامكانيات اللى جوه – زجاج كهرباء ’ سنتر ’ مرايات كهرباء فى الجانبين ’ مثبت سرعه ، مالتى فانكشنز , الخ مش هاسردلكوا باقى الامكانيات اللى انتوا حافظنها عن ظهر قلب زيي كده – و شكرت أ/ أيمن مدير المعرض و استفسرت منه على السعر و قررت انى اصلى استخارة تانى.
صليت استخارة و بعدين قعدت شوية لقيتها مش عايزة تغيب ابدا عن بالى و قاعد اتخيلها معايا و انا سايقها – تخيلت الصراحة و كأنى راكب و سايق المرسيدس .
أنا عارف ان فى ناس هاتقول انى بـأهول الموضوع – لكن اقسم بالله ان ده فعلا اللى حصل و اتخذت قرار انى خلاص هاتوكل على الله و هاشترى الجين تو.
و ده كان الجزء الأول من رحلتى مع البروتون و ياريت بس اعرف من الردود هل الموضوع ممل ولا ايه علشان لو فعلا الناس حاسه انه ممل فى طريقة سردى ليه, اختصر فى الجزء التانى من الرحلة....
و إلى لقاء باذن الله مع الجزء الثانى و أهم نقاطه هى :-
1. قرار شراء البروتون
2. عقبات التمويل التى قابلتها
3. كيف تحولت للبيرسونا بدلا من الجين تو
4. مغامراتى مع البيرسونا
5. تقييمى لآداء السيارة و الوكيل