قبل ما أقول اللي حصل أحب أقول إني بحترم مهندس نجاد شخصياَ جداَ لما لمسته من حب للنصيحة و إفادة الأخرين من خلال تواجده علي المنتدي بس انا قررت عدم التعامل مرة أخري مع مراكز خدمة بردجستون .
كان عندي مشكلة في 3 كاوتشات في السيارة بينزل ضغطهم بشكل عنيف بدون سبب ملحوظ .. إضافة إلي واحد بينزل لأن فيه مسمار و انا عارف .. المهم قلت يمكن الخوابير نفست ولا حاجة أروح مكان فيه خدمة متميزة و كمان أربط العفشة و أعمل نيتروجين و أَضبط زوايا السيارة .. و علي ذلك توجهت يوم الجمعة الأخيرة في رمضان الساعة 10 من الشيخ زايد إلي مدينة نصر (فقط كل المسافة دي لثقتي في بردجستون) و عندما وصلت لقيت الفرع مقفول الساعة 11 .. رغم معرفتي من خلال سؤالي إن المركز بيفتح الساعة 10 .. المهم قعدت في العربية جوة المحطة لحد ما فتحوا بعد الصلاة لأني معرفش حاجة أوي في مدينة نصر .. و سألوني عايز تعمل إيه .. كذا كذا .. دخلت العربية و سألت علي مهندس نجاد قالولي إن دي الأجازة الأسبوعية.
فكوا العجلة اللي فيها مسمار و المسمار إتشال و بعد ذلك لقيت العامل المختص بيوسع الخرم ببنطة شنيور أكبر من الخرم بكثير و كان فيه مقاومة من الكاوتش لدرجة إنه زق الشنيور بجسمه !! قلتله بتعمل ليه كدة هيوسع ؟! قاللي لأ هو محتاج يتعمل كدة .. فا سكت .. بعد كدة قاللي هو كدة كبير أوي فا هيكلفك 50 جنيه مش 30 !!!!
بعد ما بلعت ذلك .. و أن أصلاَ الحجم الأكبر ثمنه يزيد علي العادي بثلثين الثمن .. قاللي هتعمل نيتروجين بقي .. قلتله مش هتكشف علي الباقي انا كنت عايز أكشف علي كله .. قاللي إحنا شفنا الضغط كان كله 28 مزبوط .. قلتله انا عندي 31 مش 28 و بعدين انا لسة مزوده قريب مفيش يومين .. قاللي ماهو بتختلف من مقياس لمقياس .. قلتله انا مش بزوده غير في محطة فيها عداد ديجيتال و لسة مفيش يومين .. قاللي ماهو كدة معدل كويس حضرتك تزوده كل 3 أيام !!!!!!!! قلتله يا سلام 3 أيام ! قاللي أه 3 أيام أسبوع بالكتير .. قلتله و أبقي إستفدت إيه اما أعمل نيتروجين و ألاقي العجل نزل ؟! قاللي ماهو انا هعملك نيتروجين و لو نزل تعالانا تاني .. قلتله انا جي من الشيخ زايد مينفعش أروح و أجي .. قاللي يعني يا أستاذ هحل 4 عجلات و أقعد أكشف علي كل واحدة !؟ (أكني جيت مركز لخدمة تصفيف الشعر مثلاَ!!) فا المهم فهمت من كل ده إنه مش عايز يحل العجل و انا مبحبش أتناقش هذا النوع من المناقشات قلتله خلاص إعمل اللي إنت شايفه بس انا مش هاجي هنا تاني .. قاللي ليه بس و الكلام ده .. قلتله أصل مينفعش انا أسافر بكذا عجلة مش واثق فيهم إعتماداَ علي كلمة حضرتك إن لو حصل حاجة تعالانا تاني و إنت أصلاَ مبصتش عالعجل حتي ! المهم عمل النيتروجين .. و رحت الجزء التاني من المركز .
عامل ضبط الزوايا كان أخر واحد وصل المركز .. جه متأخر جداَ بعد الصلاة و كان فيه واحد مستني بياريس معايا من قبل الصلاة لبعد الصلاة بنص ساعة تقريباَ .. المهم ربطت العفشة و عند الكشف علي زوايا السيارة كان فيه إنحراف للخارج من العجلتين الأماميتين و طلبت ضبطهم .. و الحقيقة انا مش عارف اللي حصل بس من متابعتي للعمل لقيت إن اللي إتعمل غالباَ ضبط عجلة علي إنحراف الأخري ! لأنه عوج الدركسيون حتي قراءة معينة بعد كدة نزل ربط حاجة في العجلة اليمني فقط و اما خرجت الدركسيون كان معووج و مرجعتش لأن كنت خلاص نفسي قفلت و حسيت إني عملت مشوار كبير بدون أي لازمة و إستفادة .
بعدها بكام يوم ..
- سافرت كذا مرة و كانت قيادة السيارة غير مريحة بالدركسيون معووج
- العجلة اللي إتلحمت اللحام اللي مفيش زيه ب 50 جنيه بتنزل تاني و لقيت ضغطها 15 !
- باقي العجل ما زال بينزل ضغطه 5 و 6 درجات في فترة أيام تعد علي أصابع اليد الواحدة .
و لذلك ...
- توجهت لعامل الكاوتش اللي كنت بروحله لضبط العجل "بلية" لأنه هيرضي يكشفلي عالعجل و يشوف ماله
- سأضبط المقود في التوكيل خلال الصيانة القادمة .
و الأهم من ذلك .. لن أدخل أي مركز يحمل علامة بردجستون مرة أخري بعد ما سقت 100 كيلو رايح جي لأصل له و في النهاية أخسر ثمن اللحام اللي مش عارف ليه سرب و الزوايا اللي عوجت الدركسيون و النيتروجين اللي لم أستفد به .. يعني بصراحة انا جيت بمشاكل قليلة مشيت بمشاكل كثيرة و خيبة أمل بعيداَ عن الفلوس .. و أعذروني في أني لن أغير رأيي لأن اللي لمسته من زيارتي "رأي يحتمل الصواب و الخطأ" أن المركز مثله مثل أماكن كثيرة في مصر، لا يدار بإنضباط كالساعة إلا في وجود رجل يحافظ علي النظام، و إذا غاب هذا الرجل غاب النظام و غابت الجودة .. و للأسف انا حظي السئ جابني يوم أجازة مهندس نجاد.
و يعاب علي مركز كبير مثل بردجستون أن مفيش فاتورة أو ريسييت للخدمات اللي بيعملها الواحد في حالة إن لقيت عيب في جودة خدمة معينة في المستقبل خاصة أن الأسعار مش قليلة و من تجربتي الخدمة تماثل و تقل عن أي بنزينة عادية .
و أسف علي الإطالة .
المفضلات