الموضوع: حوارعن النوادى الرياضيه الجديدة

المشاركة الأصلية كتبت بواسطة a_taamer

والله انا متشكر جدا لكل من تجاوب فى الموضوع
انا بسال عشان خارج مصر وقررت ان استقر ان شاء الله عن قريب عشان كده بعمل مقارنات بين الانديه خصوصا ان الاسعار بقت نار

سوالى هو فى فرق بين نادى اكتوبر ونادى دريم لاند ولا هما حاجه واحدة

آه يا فندم

نادي دريم لاند دة داخل مدينة دريم لاند في طريق 6 أكتوبر ، غير نادي 6 أكتوبر

وحسب كلام د. أحمد سمير زميلنا في المنتدى
نادي دريم لاند .. كانت أسعاره السنة اللي فاتت حوالي 37.500 جنيه مصري وبالتقسيط على خمس سنوات بدون فوائد والمقدم كان 5000 لكن السنة دي مش عارف كام الصراحة ..

المشاركة الأصلية كتبت بواسطة a_taamer

سالت عن نادى دريم لاند
ووجدت ان الاسعار 55 الف
انا ميال الى دريم لاند لان بحس ان احمد بهجت راجل محترم

حد عنده خبره تعامل مع نادى دريم لاند

انا دخلته اكتر من مرة مع اصحابي المشتركين وهو فعلا نادي محترم جدا وراقي جدا ومن حيث الانشاءات النادي به اكتر من حمام سباحة ومنهم واحد اوليمبي وبه الكثير من الملاعب ونادي اجتماعي فاخر جدا وما زالت الاعداد المشتركة به مش كتير

يا طارق باشا واحشنا جداً جداً
فينك من زمان سنين محدش بيشوفك

ده ما يخص نادي وادي دجلة بالتفصيل وكنت كتبته في موضوع سابق
نادي وادي دجلة : الاشتراك على حسب عدد أفراد الأسرة الطبيعي بيكون حوالي 58 ألف كاش
أو 76 ألف قسط
المقدم 10 آلاف جنيه والقسط حوالي 1100 جنيه شهري لمدة خمس سنوات ..
الميزة إن نادي وادي دجلة ليه عدة فروع ممكن تشترك فيها جميعاً برسم عضوية سنوية مضاعف حوالي 800 جنيه مصري
أو تدخل أي فرع تاني غير بتاعك بنصف تذكرة فقط مع الحق في استعمال جميع مرافق النادي كعضو عامل .
إضافة إلى أن فيه اشتراك للأب والأم ووالد ووالدة الزوج أو الزوجة والمربية لو فيه مربية .
وكل واحد بسعر ..
يعني المربية ب600 جنيه سنوي
الأب أو الأم بحوالي 1600 جنيه + قيمة فرد تابع في تجديد الاشتراك 125 جنيه سنوي
الأبوين معاً واحد 1600 والتاني 6000 جنيه
حماك وحماتك الواحد ب 8000 جنيه
فروع النادي هي فرع المعادي وفرع النخيل بالتجمع الأول وفرع 6 أكتوبر
غير فروع السخنة وشرم ومارينا وبلجيكا .. ودي ليها إجراءات تانية
إضافة لمشاريع النادي العقارية في السخنة وسيدي عبد الرحمن ..
وعلى صعيد النشاط الرياضي النادي متقدم جداً ومتخصص في رياضات معينة هي :
كرة القدم بالاشتراك مع أكاديمية أرسنال
التنس بالاشتراك مع أكاديمية فيريرو الأسبانية
الاسكواش تحت القيادة المباشرة لعمر البرلسي
السباحة كانت تحتإشراف رانيا علواني دلوقتي مش عارف مين .

مشكلة النادي ده مشكلتين :
الأولى : إنه نادي خاص يعني لا جمعية عمومية ولا مجلس إدارة وبالتالي قدرتك على تحريك أي حاجة غلط بتكون صعبة جداً ..
الثاني : إنه نادي مادي جداً .. كل حاجة واي حاجة بفلوس مش قليلة بالنسبة للنوادي الحكومية كنوادي الصيد والزهور وهليوبوليس . لكن في العموم يظل كفسحة أرخص من بره .. لكن تشيل من دماغك الفلوس اللي انت دافعها علشان تستريح ..
ده غير إنه بقى النادي الأول في مصر لاستقطاب الأجانب لأن ليهم عضوية سنوية رخيصة وبالتالي هتلاقي الأخلاقيات العامة في كثير من مظاهرها مش مريحة
وربنا يوفقك