تقييمى الشخصى لرائعة من روائع فيات ( لينيا) تستحق الاحترام..
انا كتبت الموضوع دة علشان الناس انتبهت اكتر للعربية دى بعد العرض الجديد من التوكيل
وعموما التجربة دى حصلت من حوالى 10 ايام ...
(العربية مش بتاعتى بتاعة صاحبى حسام العربية تيربو تى جيت الهاى لاين ربنا يباركلة فيها)
اول حاجة اتصل عليا وقلنا ننزل نتمشى شوية فى الشارع مشيا على الاقدام ...(علشان اخس )
واحنا بنتمشى كنا بنتكلم وقالى انت بتفكر فى اية دلوقتى حالا قلتلة اروح السينما وهو قالى تصدق ان بقالى يومين ونفسى اروح السينما (قلنا نروح سينما دريم لانها قريبة علينا ) ورحنا بالعربية بتاعتة (انى ماطلعتش رخصة لسة فاضل 9 ايام واطلعها ههههه) وعند الحصرى (مسجد مشهور جدا فى 6 اكتوبر ) قالى انا مخنوق تعالا سوق انت (قلتة ياسلام لو تتخنق كدة كل يوم وقعدنا نضحك) المهم
اول ماسوقت قالى احنا لسة بدرى اوى على حفلة 9 والساعة كانت 5 وشوية (مدخلناش حفلة 6 لانها بتكون فاضية ) قالى يلا بينا على سيتى ستارز وابتدا المشوار ووصلنا هناك و قعدنا فى كافية نحتسى القهوة (ههه مثقف) وبعدين قررنا نكمل القعدة فى الكافية وبلاش سينما وقعدنا لغاية الساعة 11 ورجعنا وانا برضة الى كنت سايق ودة تقييمى عن العربية من خلال الرحلة الجميلة دى
اول ماقعد وربط الحزام
اديت الغيار الاول وكان الفيتيس ناعم جدااا ومريح فى النقلات ومسافة النقلة سريعة جدا وبتديلك احساس رياضى جداا
الطلعة بتاعتة العربية هادية جدا وتحس انها بتطفوا على سطح الماء
بعدين شغلت المكييف وكان تكييفها حلو ولهوش صوت عالى وماكانش فية تاثير يذكر على الموتور
وشديت بالعربية والسحب كان جامد جداااا وتسارع رهيب ماشاء الله
والثبات كان خرافى وشديت على العربية و اخدت الملف الى عند ميدان جهينة (بعد الميدان على طول ) اخدتة على 100 وكانت العربية زيها زى سرعة 20 و صوتها رياضى هادى جدا بيحسسك بهدوء ماقبل العاصفة
ونظام التعليق فى العربية كان ممتاز كنت باخد بيها غرز وانا واثق جداااا مع انى ماكنتش متعود على ابعاد العربية بس الثبات والعزم الجامد جدااا دة ادانى الثقة
والرؤية من العربية هاديلة 9.5 من 10 (بس انا طويل 180 سم ) يمكن دة الفرق
واحنا ماشيين على المحور الحتة الى مافيها رادار (هاتلاقى الميكروباصات طايرة فيها) كنت ماشى بسرعة تقريبا 130 و المكان دة من المحور بجد تحدى حقيقى لاى عربية كانت ثابتة جدااا والعزل ممتاز (مع الشد والتكييف) والباور فيها جامد كنت حاسس انى بالعب فى nfs و قبل الرادار بشوية هدينا هنا بجد حسيت بجمال ونعومة الفرامل حسستنى انها مركبة فضائية بتهبط وكملنا المشوار واثناء الرجوع كانت متعة بعد ماتعودت (تقريبا) على ابعاد العربية
وفى الاخر احب اقول ان العربية دى بجد المفروض تنافس عربيات من فئة عالية جدااا زى الباسات والكامرى والاكورد (اة انا باتكلم بجد انا سقت الكامرى فى الكويت وحاسس ان الينيا قيادتها فيها متعة اكتر منها بكتيير )
واخيرا وليس اخرا العربية دى لو فضلت على الاسعار الجديدة وشوية دعاية محترمة هاتبقى السيارة الاولى فى مصر فى فئة السيدان
واوجة كل الشكر لحسام لانة بجد خلانى احترم العربية دى جدااا
واى سؤال انا موجود