الموضوع: انا و السايس !!

السايس .. حاولت اعرف معنى الكلمة. دورت كتير و سألت كتير عن المعنى ولم اجد الجواب. وانا على حد معلوماتى ان السايس بيكون فى الاسطبل مع الحصان وهو الى بيسايس الحصان و عشان كده اطلق عليه اسم السايس بس ازاى خرج من الاسطبل وبقى موجود مع العربيات ؟ يمكن عشان هو ده التطور الطبيعى ؟ ولا يمكن يكون هو الشخص الى بيوسوس جنبك وانت بتركن عربيتك الى ان تخبط العربية الى وراك أو تحك فى الرصيف؟
انا بشوف ان السايس ده نوع من انواع التسول .عشان ايه تطلع فوس من جيبك وتديها للسايس؟ هو عملك حاجة ؟ ركنلك العربية؟ ولاكل الى هوه عمله انه تعب نفسه وفضل يقولك تعالا تعالا ! هل انت فعلا كنت محتاج حد يغنى جنبك ويسمعك صوته الجميل ويديك صفارة عشان تركن !؟
الموضوع بقى اليومين دول كبير جدا واصبحوا ذى العصابات وكل عصابة واخدة منطقة وفى كمان ورديات وكله شغال تهليب . من فترة قررت انى مش ناوى اطلع ولا مليم لأى سايس وفعلا ده الى انا بعمله وبعد فترة اكتشفت ان كل سكان المعادى وانا واحد منهم مش بيطلعوا ولا مليم لأى سايس فى المعادى عشان عاوزين يقضوا عليهم فى المعادى كلها

هقولكم على حكاية. انا بروح اشترى طلبات البيت كل شهر او كل نص شهر من سوبر ماركت كبير وطبعا فى قدامه سايس وبقالى اكتر من سنتين بروح بشكل منتظم ومش بديله حاجة وبرده مش بيحرم كل مرة يجى جنبى ويصفر بالصفارة بتاعته ويقولى ازيك يا باشا وبرده مش بديله لغاية لما زهقت وقولتله انت كل ده لسة معرفتنيش؟ قال لأ عارفك بس يمكن ربنا يحنن قلبك علينا! قولتله هو انت بتشحت ؟ قالى لأ انا بتشتغل وبتعب. سيبته و مشيت. الكوميدى بقه ان الراجل ده جايب ولاده كمان معاه وعاملين ان هو ده شغل العيلة والبيزنيس بتاعهم وفعلا لما تيجى تحسبها كده تلاقيهم بيطلعوا مبلغ محترم لما كل عربية تيجى ياخدوا منها جنيه مثلا تلاقى اّخر الشهر معاه مبلغ وقدره.
وربنا يرحمنا من السايس و الى زيه