كما وعدتكم يا اخواني....تقرير اول 1000 كم بالتيجو
اولا ارجو المعذرة للتأخير فأنا اتممت صيانة الالف اليوم و الحمد لله في ابو غالي المعادي
ثانيا تجربتي بالسيارة كانت لمسافة قيادة حوالي 650-700 كم مقسمة علي 3 مرات عند الاستلام 100 كم ثم سفر 500 كم ثم اليوم حوالي 100 كم اخري و باقي الايام طبعا مع صاحبة السيارة(زوجتي) المجمل 1160 كم الي ان عملت الصيانة اليوم و الحمد لله.
الشكل:
ما شاء الله حدث و لا حرج من شياكة و قوة المنظر و الفخامة الخارجية و الدهان ممتاز و لن تشعر بها الا عند مشاهدتك للسيارة يقودها غيرك امامك
الداخل:
الصالون واسع جدا و الكراسي الخلفية عند ارجاعها للخلف تكون السيارة واسعة بشكل رائع(انا طولي 186 سم ) و اجلس مرتاح اوي بالامام و الخلف
التابلوه مساءا اضائته جميلة فعلا زرقاء مريحة و عصرية
الخامات جيدة و لكن بالمعقول حسب استخدامك,اذا كنت عنيف فاعتقد قد تكسر الحامل الذي بالمسند بجانبك الذي يفتح للوراء....و لكن الاستخدام الطبيعي لن يكون فيه مشاكل
الشيء الوحيد البايخ هو زر التكييف لتغيير اتجاه خروج الهواء فقد كان ناشف و مش مظبوط اوي و كان الهواء يخرج دائما من الفتحات عند القدمين حتي مع خروجه المفروض من اعلي فقط.
تم اصلاح الزر و الهوايات اليوم في 5 دقائق و يعمل بشكل ممتاز
التكييف تلاجة صبح و ظهر ما شاء الله
القعدة مريحة مع السفر و الكراسي الجلد جودة جيدة
الاجمل اني اضع ابني في كرسيه بالخلف و انا واقف من غير قسمة ظهر :-)
المنظر و الفيو من جوة العربية العالية و الشيك طعمه حلو
العفشة:
أجمل ما في السيارة
عالية,مش ناشفة...مريحة و لا يوجد دبة و لا خبطة و لا الفتي ده كله
و الثبات علي الملفات ممتاز (انا سوقتها اليوم بأفتراء شوية)
الموتور:
عند الاستلام طبعا الاول و التاني كانو تقال اوي اوي
بس يوميا كانوا يتحسنوا و العربية بتفوق كتير اوى
اليوم ما شاء الله وحش يكشر عن انياب لسة طالعاله و سحب ممتاز
بس الملاحظ اني مش بقدر اعمل زي عندي في عربيتي و ادوس جامد بنزين اول و تاني.....لازم تعمل تسارع بسرعة بس بالتدريج المعقول السريع تأخد نتيجة رائعة بجد.....برده لسة الحكم بعد ال5000 كم ان شاء الله, العربية لسة كل يوم بتفوق اكتر من الاول(كل يوم ناب جديد) :-)
الموتور عزمه جميل اوي و صوته اجمل, فيه قوة و شباب مع احساس الجيب جميل
الشنطة:
بجد من مميزات العربية.......واسعة اوي لانها عالية و حتي و الكراسي راجعة عليها و الغطي الجلد بتاعها مشدود برده بلاعة و انا بقارنها بكل الشنط للسيارات اللى جبتها قبل كده و كلهم واسعيين بس هي تكسب
البنزين:
اقدر احكم علي السفر فقط حاليا
تقريبا انا سافرت الساحل و لفيت شوية بسيطة و رجعت و قعدت بيها يومين تلاتة بموشوارين بتفويلة واحدة قبل السفر.........يمكن اقول معدل 12 كم لللتر الواحد مش قادر احكم اوي بصراحة
المشاكل و العفاريت و الخيالات:
كان فيه من يوم الاستلام ماء يقطر تحت السيارة بس انا بخبرتي في السيارات مقلقتش لاني كنت شبه متأكد انه من التكييف و فعلا النهاردة اتأكدت انه عادي و طبيعي
الازرار للتكييف و الاتجاه للهواء و تم تظبيتهم في 5 دقائق كما قلت لكم
الصوت للهواء عند الزجاج الامامي عند سرعات فوق ال100 بس بصراحة معرفش حسيته مفهوش مشكلة و اليوم جربناها ملقيناش مشكلة فطلعنا بواحدة شيروكي لقينا صوت الهواء برده يخبط في السيارة مع السرعات...المهم طنشت عشان صوت بسيط و مش عيب بالسيارة
الكاوتش الزينة اللي بين الزجاج و الكبوت مفكوك شوية و اتلزق
الغطاء الخلفي للعجلة من يوم ما فكيته عشان ازود الاستبن هواء مش عارف اثبته زي الاول,هو راكب و ثابت بس في كبسولة مش معشقة كويس
مراتي دخلت في عامود حديد و هي طالعة من يومين!!!! بس الاكصدام(الفيبر) اتقشر حتة بسيطة بالطول و الحمد لله علي قد كده
اليوم لقيت نغزة علي الصاج من عند الرفرف الخلفي يمين(يا تري زوجتي و خافت تقوللي و لا واحد ابن حلال و خلع !!!! ) مش مهم ,الحمد لله.............العربية عليها أقساط يا جدعااااااان :-)
الانطباع:
يا ريت السيارة دي كانت قدامنا من زمان
ما شاء الله ممتعة
أجمل ما فيها انها احساس مختلف فمهما كانت عربيتك السيدان نوعها او بلدها (فئات عالية مثل سيارتي) لن تشعر بأي نقص او افتقاد لشيء لان اي نقص بسيط في التقفيل او الخامات الداخلية سوف يقابله متعة رائعة بموتور و شاسيه و عفشة و ارتفاع كلهم اكثر من رائعيييييين
في النهاية بجد ربنا يبارك في سيارتي و جميع سيارات الاخوة و قولوا دائما ما شاء الله علي اي سيارة و بجد اللى بيفكر في التيجو يتوكل علي الله و كمان ال m11 سمعت كلام حلو اوي عنها اليوم في صيانة ابو غالي
اتمني يكون التقرير معقول و انا والله علي أخري و امتحانات الدكتوراة خلاص و انا مزنووووق بي الوعد الوعد و التقرير بين ايديكم
دعواتكم و ربنا يكرمنا جميعا في ديننا و ايماننا و اهلنا و بيوتنا و سياراتنا و دنيانا و أخرتنا ان شاء الله
اترككم في رعاية الله
أخوكم