الموضوع: عشقى لبرسونتى لا يكفى له مئات الصفحات - الجزء الثانى من قصة رحلتى مع بروتون 2-2

بسم الله الرحمن الرحيم
رابط الجزء الأول

العشق يأتى دوما بين رجلا ً و امرأة و لكنه اليوم يأتى بين رجلا ً و سيارته.
حبيت ابدأ بس الجزء الثانى من الموضوع بالعبارة دى علشان بس اقول للناس اللى مترددة تجيب الجين تو أو البيرسونا – لا تقلق , أقدم , لن تندم, لا – ستندم نعم ستندم ولكن على الايام التى قصيتها بدون تلك السيارة.
لا أعلم هل هذا رضا من النفس وهبه الله عز و جل لى أم أنها حقيقة لن يشعر بها إلا من هو فى نفس موقفى – فى كلتا الحالتين أصرح بأننى سعيد , سعيد باقتناء تلك السيارة بكل عيوبها و مميزاتها – كل ما أرجوه من الله عز و جل أن يديم علي هذا الشعور.
كنا وقفنا فى الجزء الأول من الحدوته بإنى خلاص اتخذت قرار شراء الجين تو.
توكلت على الله و عزمت و رميت باقى الماركات و الموديلات مع كل احترامى وراء ظهرى.
الصراحة انا مارتحتش لأي عربية تانية غيرها – بكل العيوب اللى قريتها عنها – لكن مش عارف حسيت ان مش فارق معايا كل ده انا حاسس انى و انا معاها هاكون مختلف – مش هاكون مجرد واحد سايق عربيته – لكن هاكون واحد ماشى مع حبيبته.
المهم ابتديت اشوف بقى الوكيل و المعارض بتاعته و رحت نازل على عز اللى فى الصحراوى و قابلت أستاذ محسن صالح و الصراحه هو كان راجل صالح على اسمه – الراجل فعلا قاللى على امكانيات العربية و بكل امانه قاللى على العيوب اللى فيها ( العيوب اللى البروتانيين كلهم دلوقت حافظينها ) المهم فعلا اتفرجت عليها و كان فى الوقت ده موديل 2009 نزل منه عربية واحده فى المعرض فقط على أن يأتى الاستوك قريبا – مش فاكر الصراحة المدة اللى قالى عليها
و دخلت العربية – كان هناك وقتها عربية واحده 2008 و كانت الـ 2009 و كانت جانبهم البيرسونا – البيرسونا ..... انا فاكر انى قريت عنها فى نايل موتورز ..... اه صح انا قريت عنها موضوع مش فاكر الصراحة مين اللى كاتبه بيقول انه شاف العربيات البيرسونا فى الميناء فى اسكندرية – و كان بيقول انها نفس الجين تو و لكن سيدان – بصيت عليها ... عجبتنى ... بس ماوقفتش قدامها كتير – سيبتها و رحت للجين – فتحت الباب و دخلت .... فى اختلافات فعلا من جوه بين الـ 2008 و الـ 2009 – قعدت زي المجنون اتنطط مابين العربيتين الـ 2008 و الـ 2009 اشوف دى هنا و اتأكد انها مش متغيره او متشاله من هناك المهم قعدت كده حوالى ربع ساعه فى التنطيط ده و بعدين طلعت بالفروق – عاجبنى جدا فى الـ 2009 الزجاج من جنب باب القيادة الجزء بتاع الفتيس و عاجبنى فى الـ 2008 لون الكونسول و الفرش و عاجبنى الساعه و مثبت السرعه.
طيب انت قدامك دلوقت عربية واحده 2008 و تاخد المميزات اللى فيها و تخسر انك مش ضامن العربية اللى فاضله دى ممكن يكون فيها ايه و مجبر على اللون و خسرت سنه فى الموديل.
طيب تخسر ال2008 و تكسب الموديل الجديد وشوية التغيرات اللى عجباك و تختار اللون اللى عاجبك – المهم قررت انى اتوكل على الله و اقرر على 2009 ابتديت اتكلم مع استاذ محسن على الـ 2009 و على الاسعار و نظام القسط و الحجز و الاستلام.
فهمت منه ان الحجز بألف جنيه و التمويل عندهم مش فاكر البنك الصراحه بس هو كان على 5 سنين و فايده تقريبا 8.5% و شكرته و مشيت و روحت و قعدت مع المدام و جبت الورقة و القلم و قعدت احسبها لقيت ان انا مش هاقدر ادفع شهريا غير تقريبا 1300 جنيه على الاكثر و طبعا ده مش كان هايناسبنى فى نظام القسط اللى مع عز – فقررت انى ادور على حول تانية – المدام قالتلى طب نشوف عربية اقل فى السعر (91) ألف ساعتها – قولتلها انا شايف نفسى و شايفك معايا راكبين العربية دى و مش عارف اتخيل انى و انت راكبين غيرها – تعلق غريب حصل – لدجة انه مع الوقت انا نقلت التعلق و الاعجاب ده لمراتى بنسبة 100% بس الكلام ده مع الوقت يعنى مش مره واحده كده.
المهم اخدت نفسى و رحت على معارض العربيات و فى نفس الوقت ابتديت اتصل بالبنوك مباشرة – نسيت اقولكوا حاجه مهمه – ان فى الوقت ده كانت ملامح الازمة العالمية ابتدت تظهر – و ابتدت بنوك كتير تقفل على القروض الخاصة بالسيارات و كان منهم باركليز و سيتى تقريبا و الباقى ابتدى يعقد الدنيا – المهم لفيت على معارض كتير و كان أغلبهم أو كلهم تقريبا مش عارضين العربية فيما عدا فارايتى اللى كنت اتكلمت عليه فى الجزء اللى فات – المهم أغلب المعارض با اما مادخلش كلامهم دماغى يا اما اتكلموا فى رقم أعلى من الرقم اللى انا هاقدر عليه شهريا – و رحت كذا بنك و لقيت انى لازم اقسط على مده اطول من 5 سنين و ده انا مالقتهوش غير فى بنكين وقتها ( فى حدود مادورت ) بنك اسكندرية و الاهلى سوسيتيه و اظن اى بى سى ابتديت اقدم ورقى مع بنك اسكندرية مباشرة – و الناس هناك بصراحه ساعدونى جدا ( فرع الهرم) و كانوا متعاونين جدا معايا لكن انا كان عندى مشكله – انا مرتبى بيتحول جزء منه على البنك (سوسيتيه جنرال) و جرز تانى باخده كاش – و طبعا كان من ضمن الورق اللى طالبينه كشف حساب لاخر 3 شهور من البنك بتاعى فطبعا كان المرتب اللى بيتحول اقل من القيمة اللى فى مفردات المرتب – و دى خلت ادارة الائتمان فى البنك ترفض الطالب و كانت اول صدمة ليا ساعتها و حسيت ان الدنيا ابتدت تغمق – سحبت ورقى من هناك و مانسلش نظرات الحزن اللى كانت على موظفين الائتمان اللى فى الفرع و تصبيرهم ليا و ده لانى اترددت عليهم كتير و كونت علاقة كويسه معاهم فى الوقت ده و لان اكتشفت ان فى واحد منهم جارى و كان عايز يساعدنى.
المهم افتكر انى اخدت ورقى و رحت طالع على فارايتى و رحت لاستاذ ايمن مدير المعرض هناك فى الهرم – رحب بيا و قالى انا فاكر انى قابلتك من فتره قولتله فعلا انا جتلك قبل كده و كنت بسال على لجين تو و قعدت فيها عندك شويه – فى الوقت ده اساسا العربية اللى كانت عنده كانت اتباعت – المهم حكيتله على المشكلة اللى حصلت معايا مع بنك اسكندرية قاللى ولا تقلق نفسك هاتلى الورق و تعالا اشتغل معايا انا عندى بنكين سوسيتيه جنرال و اى بى سى هانجرب فى اى بى سى الاوول علشان فايدته اقل شويه و نجرب برضه فى سوسيتيه.
ابتدينا و الحمد لله و بعدين الموضوع اتأخر شوية و بعدين جالى رد بنك اى بى سى ....... مرفووووض :S مرفوض تانى !!! شكلها كده باظت الرفض كان لنفس السبب المهم قعد يطمنى و قالى ماتقلقش ان شاء الله العربية دى هاتاخدها من عندى المهم يومين تلاته كده و جالى رد البنك الاخير سوسيتيه جنرال – كلمنى و قالى البنك لا رفض ولا قبل – قولتله مش فاهم قالى البنك عايز يعمل استعلامات فى الشركة عندك علشان يتأكد ان كلامك بتاع الجزء الكاش و الجزء اللى بيتحول مظبوط – قولتله و ماله أهلا و سهلا قولتله يعنى فى أمل قالى هى دى الخطوة الاخيرة و فعلا بعدها بيومين تقريبا جه حد من البنك – من البنك مش من الشركة اللى بيوكلها البنك للاستعلام – جه حد من قسم الائتمان فى ادارة البنك نفسه و قعد مع ادارة الـ HR فى الشركة عندى و نزل – و انا ماعرفتش انه جه و نزل غير بعدها لما كلمتنى موظفة الـ HR و قالتلى ان كان عندها مندوب البنك قولتلها طب ماتعرفيش ايه الاخبار قالتلى انه قالها ان شاء الله خير و قطم على الموضوع قولتلها ربنا يستر و شكرتها و كلمت استاذ ايمن و قولتله على اللى حصل قاللى انه غالبا هايجيله الرد على الموضوع يا بكره يا بعده و بعدين جالى تليفون من استاذ ايمن ..... ترررررن .... برد و انا بترعش تقريبا .... خير يا استاذ أيمن أبشر الله يكرمك ...... انا اسف يا استاذ محمد ..... بجد كان نفسى تاخد العربية من عندى ...... بس للأسف .... البنك ...... وااااااااااااااافق.
كان بيوترنى و بيهزنى .......... ياااااااااااااااااااااااا اااااااااااااااااااه البنك وافق مش ممكن و اظن ان ساعتها قعدت اتنطط فى الشركة من كتر مانا مش مصدق أخيرا – أخيرا هاركب الجين تو – أخيرا هامتلكها ..... يااااااااااااااااااه ده أنا كأنى بحلم ...... أستلم ايه ؟!!! استلم العربية .... أمال هاستلم 2 كيلو طماطم ؟؟؟؟ قالى لالالا ماتتفائلش قوى كده مش بالسرعه دى لسه شويه ..... ليه لسه شوية ليه – امال الموافقة دى لازمتها ايه – قالى لا الموافقة خلاص – ماعدتش المشكلة فى البنك خلاص – المشكلة ان العربية مش موجوده – عز لسه ماستلمش عربيات و لا سلم موزعينه عربيات .... يانهار أبيض يا جدعان على البلاوى اللى بتتحدف ورا بعضها دى .
رضخت للأمر الواقع و بعدين قعدت اقرفهم بقى فى المعرض – كل يوم لازم اعدى عليهم و لو ماعدتش اتصل بالتليفون و لو ماحدش رد انزلهم و اشتغالات بقى لفترة مش قليلة – حوالى 10 ايام – و طبعا كنت فى الوقت ده متابع مع استاذ محسن صالح – اه مانا نسيت اقولكوا انى كنت حاجز مع استاذ محسن صالح بالألف جنيه اللى كان طلبها للحجز , و طبعا كده انا بسأل عنده بوجه حق مش مجرد زبون عايز يعرف الناس استلمت ولا لا – المهم فجأة عرفت ان فى ناس استلمت و عرفت الموضوع ده عن طريق نايل موتورز – طبعا ماسكتش , رحت للمعرض و قولتلهم انا عرفت ان فى ناس استلمت طبعا قعد يستخف بيا شويه – ماهو ماكانش يعرف انى حاجز و بتابع مع استاذ محسن و فى نفس الوقت بتابع مع نايل موتورز, دخلتهم فى المعرض على الموقع بتاع نايل موتورز و انبهروا بيه جدا و افتكر استاذ ايمن عمل تسجيل و ابتدى يتفاعل مع المواضيع – الحقيقة انا ماعرفش هو لسه متابع ولا لا لحد دلوقت , لكن وقتها كان بيخش كل يوم – المهم فى يوم بعد ال، 10 ايام كنت داخل على المعرض – اللى خلاص زهقوا منى و لمححت من بعيد عربية بروتون – ماهو كان خلاص ماعندوش اي بروتون – كان عنده جرييت وول تقريبا بس – طبعا انا قلبى اتنطط – بس العربية اللى انا شايفها حاسس انها كبيره شوية – و بعدين اللى انا شايفها من بعيد دى لونها فضى تقريبا و انا طالب لون رمادى – يمكن ياواد يكون حاطط بتاعتك فى المعرض من جوه اجرى يا واد الحق – و الله يا جدعان كنت حاسس انى رايح اشوف النتيجة من كتر التوتر – الدنيا اساسا كانت زحمة من كتر التكاتك الشعبية الامبريالية و معاها اخواتها الكبار اشباه الميكروباصات وانا عايز انط من فوقهم و اروح المعرض لكن هايهات – طب ارمى الشاهين هنا فى اي خرابه و اجرى عليهم على رجلى – لكن هيهات – ده استعمار – مافيش حتة ارض توحد ربنا الاقيها اركن فيها اتعاملت معاهم بقى كانت راسى بره الشباك و ايدى الشمال بتخبط على الصاج بتاع الباب و الايد اليمين ماسكه الكلاكس و الدريكسيون و رجلى الشمال على الديبرياج دايس عليه و رجلة اليمين دايسة على البنزين علشان اعلى صوت العربية يمكن يختشوا – طبعا انا بحكيلكوا الكلام ده و اللى كان فى مسافة بينى و بين المعرض تقريبا 60 – 70 متر – المهم بعد ارتكاب الكثير من الذنوب بعلو صوتى عليهم و شتيميتهم و صلت و الحمد لله للمعرض نزلت جري من العربية و دخلت على استاذ ايمن و طبعا انا مش باصص عليه انا باصص على العربيات اللى جات و كنت كل ما اخطى خطوة يثاورنى احساس بالاحباط – العربيات كلها بيرسونا – ابص يمين ابص شمال – كلها بيرسونا – بعد البهجة اللى كانت عليا اول ماركنت العربية وصلت لاستاذ ايمن و على وجهى الوجوم – خير يا استاذ ايمن – انت نسيت انى طالب جين تو ولا ايه – لا و الله مش ناسى ولا حاجه بس ده اللى سلمهولنا عز دلوقت و لسه ماجابس سيرة الجين تو هانستلمها امتى – طبعا بقى هللت و زعقت و اترفزت و فقدت فعلا اعصابى – لسه مش عارف هاتستلم امتى – صدمنى بكلمة – كلمة كانت بالنسبالى غريبة جدا – أستاذ محمد ... ماتاخد البيرسونا السيلفر دى ....
بصيتله كده و حسيت من تعبير وشى انى سمعته بيقولى خد الزيستافا دى – بيرسونا ؟؟!!! بيرسونة ايه يا عم هو انا جاي اشترى توووب قماش احمر و بتقولى خد الابيض – ايه يا عم ايمن – لا طبعا انا فى دماغى عربية معينة مش هاغيرها – يا استاذ محمد صدقنى مافيش فرق بينهم خالص – خد المفتاح و خش شوفها – و مد ايده بالمفتاح و كأنه مدلى ايده بكوباية مياه بسم مثلا بعدت ايده عنى و قولتله ايه يا عم بقولك مش هاغير – يا استاذ محمد جرب بس – يا اخى جرب بس تخشها علشان خاطرى – بينى و بينكوا دماغى ابتدت تلف – أستاذ ايمن بيقول هي هي و المنتدى بتاعنا بيقول هي هي – خش و اتفرج براحتك ماهو اللى بيتحايل عليك و اهو تشوف فعلا زي مالناس بتقول هي هي و لا انت هاتكتشف فروق و هو فى نفس الوقت لو طلعت هى هى حسس نفسك انك قاعد فى الجين تو و اتفرج عليها بمزاج و عملت كده فعلا و دخلت لقيتها تقريبا هي هي الجين تو باختلاف شكلى فى الكرسى – ماكنتش اعرف ان فى اختلافات تانية زي فانوس الشبورة اللى وراء و زي موتور الكشافات الامامية و طبعا المساحة الخلفية – المهم قعدت فيها و بينى و بينكم حسيت براحه لحد ما – بس على مين – هي الجين تو و إلا فلا – ممكن تعجبنى اه – انما اشتريها لا – المهم خلصت منها و رحت لاستاذ ايمن و قولتله دلوقت ايه العمل – انا الفلوس بتاعة المقدم بتاكلنى و خايف اتزنق و اصرف منها – عايز اخلص – قالى طب هاتها – قولتله اجيبها ازاي – لما و لسه مادفعتش و متمرمط كده امال لو دفعت – ده انت هاتلاقينى واخد اجازة من الشغل و بفتح معاك المعرض و بقفله و يم السبت اجازتك هاقضيه معاك فى البيت- استاذ ايمن حاول تشوفلى حل بجد – المهم رووحت و انا مكسور الخاطر و قعدت مع المدام و حكيتلها اللى حصل قالتلى انا حاسه انك هاتاخد البيرسونا مش عارف ليه – ماتيجى ننزل نشوفها – قولتلها يالا – ماهو تأثير المدام مش زي تأثير استاذ ايمن – اكيد مش هابمبك معاها كتير هي يالا يبقى يالا  نزلنا و رحنا على المعرض و هي اول ماشافتها عجبتها جدا و قالتلى انا حاسه ان شكلها احلى من الجين تو – طبعا بصيتلها كده و كأنى بقولها انت بتقولى ايه – بس هي عجبتها قوى و انا الصراحة ابتدت تعجبنى و بعدين ابتدت تمسكنى بقى من ايدى اللى بتوجعنى – دى شكلها عائلى اكتر و هاتلمنا احنا و مامتك و باباك و اخواتك او ماتى و اخواتى و هاتبقى لايقة علينا كعيله خارجه بيها – الجين تو شبابى اكتر – قولتلها انت محسسانى انى عندى 52 سنه يانتى ده انا لسه تامم الـ 29 يعنى – قالتلى بص لقدام هاتحس انها هاتنفعتا اكتر – طب حتى بص الشنطة – اوسع من الجين تو و هاتفيدنا فى سفراياتك بتاعة الشغل كتير ابتديت اقتنع و قولتلها بصى خلينا نصلى استخارة الاول – و رحت مروح و مصلى استخارة و بعدين تانى يوم اخدت اخو المدام و رحنا على المعرض اوريهاله – ماهو اصل اخو المدام انا اللى مربيه و بحب استشيره فى حاجات كتير زي ماهو بيستشيرنى – المهم دخلنا على العربية عجبته و قالى طبعا انا بالنسبالى عجبانى الجين تو اكتر لكن مميزات شكل و حجم البيرسونا احسن ليكم كعيله – و عندى احساس ان البيرسونا هاتكون من نصيبك – لان ده نفس اللى حصل معانا فاكر لما كنا راحين نسشترى عربيتى قولتله اه يا خويا فاكر – كنا بندور و نلف و ندعبس على الافيو و اليوم اللى نزلنا فيه نشتريها – اشترينا نيو اكسنت – و طبعا مش هاخش فى الحكاية دى حصلت ازاي علشان هاتاخد برضه جزأين زي اللى بكتبهم دول المهم روحت و قلت اصلى استخاره تانى و تانى يوم قعدت مع المدام و قولتلها خلاص انا استخرت ربنا و قررت انزل اقول لاستاذ ايمن انى هاخد البيرسونا بدل الجين و اتوكل على الله – قالتلى خلاص يالا ننزل- و اخدنا بعضنا و قولنا نتمشى – ليه نتمشى – علشان انا قبلها بيوم كنت واخد العربية و ماشى فى شارع العريش فى الهرم من ناحية فيصل و متجه على الهرم و مره واحده ظابط طلعلى من تحت الارض و وقفنى و قالى الرخص – اديته الرخص و قالى اركن – قولتله خير مش الرخص مظبوطة قالى اه مظبوطة بس انت ماشى عكس – عكس ؟؟!!!!!!!!!! عكس ايه يا باشا ده شارع العريش – ده طول عمره رايح جاي – قالى اتفضل شوف اليافطة و كانت اليافطة ساعتها العساكر بيثبتوها فى الارض و ده كان فى نص الشارع تقريبا – مش هاطول عليكوا لبست ساعتها 1000 ملطوش و كنت بعيط من الغيييييييظ و قتها – المهم رحنا المعرض مش و قبل ماوصل المعرض بـ 5 دقايق لقيت أستاذ ايمن بيتصل بيا – ايوا يا باشا ازيك انا جايلك فىالطريق اهو – قالى كويس و الله ده انا بكلمك علشان اقولك انى عرفت اخلصلك عربية جين تو بالعافية ..........................
جين تو !!!!!!!!!!!!!!!!
انت بتهرج – و اخدت المدام و جريت عليه قالى العربية فى الجراج – قولتله انت عارف انى كنت جايلك علشان اغير للبيرسونا – قالى انت دلوقت قدامك الاتنين انزل بص على الجين فى الجراج و قر – قولتله لا يا باشا انت تطلع الجين و تحطها جنب البيرسونا كده و تسيبنى مع نفسى انا و المدام قد ربع ساعه كده – قعدت اتشاور معاها و دخلت العرييتين و فتحت الشنتطين و طلعت بالقرار – هاتخلى عن جينتى حبيبتى و هاجيب البيرسونا لما قعدت فيها من ورا حسيت انها مريحه اكتر و فى نفس الوقت شنطتها اكبر و انا هاحتاج الاتنين دول – على الرغم من انى حاسس ان احساسى بانها من وراء اكبر تهيآت لككن خليك حاسس بكده و دخلت لاستاذ ايمن و قولتله خلاص انا هاخد البيرسونا و راح مكلم مسئول البنك و قاله هانغير الورق لبيرسونا بدل الجين و و جه مندوب البنك اللى ساكن قريب مننا و غيرلى الورق و قالى هامضيه من البنك بكره و ايمن قالى انا هاسعالك فى الورق و ادينى يومين كده عقبال ماخلصه من عز سيبتهم و قولتله ياريت بقى من فضلك تنزل العربية الجارج و ماتعرضهاش بقى خالص و ماتخليش حد يقلب فيها و قبل طلبى و ماسبتوش غير لما اتطمنت على نزولها الجراج و حط مكانه الجين مشيت و انا ببص للجين نظرة وداع .
تانى يوم اخدت اخو المدام و رحت اشيك على العربية بقى – كنت قريت موضوع فى المنتدى عن كيفية الاستلام و دخلت العربية و فصصتها حته حته انا و هو و جربت كل حاجه فيها الزجاج من باب القيادة – الزجاج من كل باب على حدى – السنتر الأنوار السى دى الحركة بتاعة الكراسة و ثنيها – فتح الشنطة و التنك من الداخل – و فتح الشنطة بالريموت (عرفته من المنتدى برضه) – المالتى فانكشنز - الانوار و الانذار - البادى من بره و الاطمئنان ان مافيش اي خدوش – فتح الكابووت – كله و الحمد لله كانت كل حاجه سليمة
المهم فعلا يومين و استاذ ايمن كلمنى و قالى بكره ان شاء الله هانرخ ياريت تيجى و معاك المقدم – و رحت و اخدت وصولات بيهم و روحت و كنت خلاص اقتنعت و الحمد لله بالبيرسونا و اتعلقت بيها.
و افتكر ان اليوم ده انا ماعرفتش انام و استعوقت النهار و حسيت انه بعيد قوى.
ياااااااااااااااااااااااا ااااااه اخيرا هاتحقق الحلم و هاتركب العربية اللى كنت بتحلم بيها – اه هي مش الجين – بس انا اقنعت نفسى انها هي هي بس بشنطة و فعلا اقتنعت بكده و اقنعت نفسى و اقتنعت بالفعل انى رايح ارخص العربية اللى حلمت بيها – العربية اللى خطفتنى – العربية اللى خلتنى استغنى عن اليابانى و الكورى و الفرنساوى و غيره – العربية اللى هاحس ان شاء الله انى و انا راكبها (ملك).
و بدأ الحلم يتحول إلى حقيقة
و فى صباح يوم الثلاثاء الموافق 12 ديسمبر عام 2008 الساعه 7 صباحا
ذهبت للمعرض و قابلت استاذ ايمن – و قالى يالا اتكل على الله و سمى الله و دور عربيتك و خد محمد (المندوب) و اطلع على المرور و رخص و ألف مبروك.
استاذ ايمن هو مين اللى هايسوق – قالى اكيد انت أمال مين – قولتله انت متأكد ؟؟؟ انا هاسوق العربية دى ؟؟؟ - قالى يا استاذ محمد – دى خلاص عربيتك خد مفاتيحك و دور و اتكل على الله ربنا يديك خيرها و يكفيك شرها اخدت المفاتيح و اقسم بالله و كأنى هاركب البساط السحرى – دخلت العربية و دورت و دى كانت اول مره ادور العربية للعلم انا كان اخرى اشغل الكونتاكت بس ماكنتش بدورها و من توترى بعد مادورتها دوست على المارش تانى و دى كانت اول مفاجأة – المارش ماعملش صوت – المارش لما بيشغل العربية و جيت تشغله تانى مابيشتغلش – يانهار ابيض يا جدعاااااااااااان – ايه الحلاوة دى – بسم الله توكلت على الله و لا حول ولاقوة الا بالله العلى العظيم سبحان الذى سخر لنا هذا و ما كنا له مقرنين و انا اليه لمنقلبون.
و برجلى بدور على الديبرياج (غشيم بقى و محدث نعمة) جبت الدى و ابتديت اتحرك – و ابتديت اسمع زئير الأسد يااااااااااااااااه الحمد لله الحمد لله ذكريات اليوم ده جميله جدا و على رأي خالد صالح فى اعلان سبيرانزا اليوم ده مابتحسش بتعبة فى التراخيص رحت على بين السرايات و ركنت العربية و كان تانى مفاجاة (بالنسبالى سعيده) ان العربية مش ينفع اسيبها متمورة طبعا قعدت ادةر على مكان صف اول اركن فيه لحد ماقيت و الحمد لله و نزلت رحت المرور مع المندوب خلصنا ورق الافراج و عملت التامين و جبت الملف و جهلت على الفحص و اخدوا بصمة الموتور و اشتريت الطفاية و طلعت اخدت الرخصة و بعدين اخدت النمر مع العسكرى ( كانت عليا بسيطة الصراحة على الرغم من انى قعدت فى المرور 4 ساعات تقريبا) و مشى المندوب – و فضلت انا و بيرسونتى لوحدينا ركبتها و قعدت اكلمها – ربنا يباركلى فيكى يا رب – ربنا يعينى انى احافظ عليكى يا رب – ربنا يحميكى ليا من شر الحاسدين و يحمينى بيكى من شرهم – ربنا يكفيكى و يكفينى شر الطريق – بسم الله الرحمن الرحيم و رحت رايح على الشغل ! اه الشغل ... كان عندى مأمورية مهمه و كان لازم اروح
و دى كانت حكايتى مع البيرسونا من ساعة لما فكرت اشترى عربية لحد ماقتنعت بالجين تو إلى ان غيرت العربية لـ بيرسونا
اما الآن فمع تقييم الآداء الموضوعى فى رأي الشخصى للسيارة
1- العربية فى الاول كنت حاسس انها مخنوقة لحد لما عديت الـ 1000 الاولى و عملت صيانتها و ابتديت افترى بقى
2- صوت موتور العربية بيحسسنى بالقوة فعلا.
3- الفرامل اخدت وقت كبير نسبيا على ما اتعودت عليها.
4- سحب العربية اتحسن تدريجى لغاية لما حسيت ان فعلا العربية فايقه و الحمد لله .
5- من الحاجات الجميله جدا اللى فى العربية ان الباور بتاعها مش ناعم قوى – ده بالنسبالى حاجه كويسه جدا
6- العربية ماحسيتش انها عالية عن الارض بنسبة كبيره زي ما ناس كتير وصفت فى المنتدى – انا بالفعل لبست كذا مره فى مطبات على الرغم من عدم وجود تحميل على العربية و حركتى عليه بسرعه بطيئة جدا جدا
7- المالتى فانكشنز اللى فى الدريكسون للاسف ابتدت تعلق من بعد ماعديت الـ 15 ألف و حاولوا كذا مره يصلحوها لكن بلاجدوى و المره الجاية ان شاء الله هاعافر انها تتغير.
8- الثبات بتاع العربية الحمد لله الحمد لله زي الفل و مش هاتكلم على منحنيات بقى و سرعه و كده لا انا تقريبا بعد 3 اسابيع تقريبا من شراءها و اثناء رجوعى من الشغل و كان معايا 4 من وملائى هاوصلهم فى الطريق و كنت على الدائرى و ماشى تقريبا 140 و كنت باخد عرزة (عذرا يعنى) و فجأة و انا بلم نفسى من الغرزة اللى اخدتها بين ميكروباص و مقطورة فى اقصى اليمين اتفجأت بمطب غبى بمعنى الكلمة – مش مطب صناعى عبارة تقريبا عن طين او اسمنت اتعرض للمطر و نشف – مطب فعلا غبى جدا المطب ده خلا فعلا العربية تقريبا تترفع عن الأرض و حسيت انى فعلا بعد ماهاخده هاتقلب و المفاجاة انى بعد المطب ماحسيتش بأي حاجة يعنى العربية و لا عامت منى و لا حاجة و لا حسيت مثلا انى باعافر مع الدريكسيون علشان اثبت العربية – كل ما هنالك ان بعدها بشوية حسيت ان العربية بتحدف و قولت خلاص اظبط زوايا ان شاء الله.
9- شديت مع عربيات كتير و الحمد لله كنت باكتسحهم – طبعا كنت بشد مع فئتى يعنى مش باجى مثلا جنب بى ام او مينى كوبر او الناس دى بس مع لانسر او مع النترا – و اعتقد ان احساس الثبات اللى بيخلينى ازود من غير خوفو اعتقد ان احساسهم بعدم الثبات اللى بيخليهم مايزودوش السرعه عن حد معين.
10- عربية واحده فعلا اللى كسرتنى إهئ إهئ و هى اللانسر البوما و ده كان فى اسكندرية و على الطريق الدولى و كان فاضى و انا ماشى تقريبا 180 و ده عدى طلقة من جنبى الصراحه حاولت اجيبه ماعرفتش.
11- اطفال حتتنا بارك الله فيهم رسمولى على الكبوت مربعات و لعبو عليها X O و طبعا ده يا كان بطوب يا كان بمسمار
12- العربية و انا فى اسكندرية اتخبطت منى خبطة فى الشنطة – كنت برجع بظهرى و باصص فى المرايا و مركز مع السينسور و مره واحده اسمع طخ – لبست فى شجره – ازااااااااااي معرفش.
13- سينسور الباركينج صوته واطى لحد ما.
14- مرايا الجنب حاسس انها كانت المفروض تكبر شوية.
15- طبة الجانط اتسرقت اهئ اهئ اهئ.
16- من بعد الخابطة اللى فى الشنطة و صاج الشنطة بيلب.
17- تسارع العربية عاجبنى جدا و الحمد لله
18- فرامل العربية أو الـ ABS بمعنى اصح زي الفل العربية بتفرمل فى خط مستقيم بتكلبش فى الارض مع اعتبار الضغط بقوة على الدواسة.
19- صوت تزييق رخم بيطلع من تحت الكنبة فى المطبات على الرغم من انهم غطوا الصواميل اللى تحت الكنبة بشيكرتون فى صيانة الـ 1000
20- التوكيل هو احين وتحد يظبط زمايا – جربت بريدجستون وواحد مشهور فى المنيل و بنزينة موبيل فى الهرم – ماحدش ظبطها غير التوكيل.
21- الريموت مابيتشغلش غير جنب العربية.
22- تكييف العربية زي الفل و بيدينى احساس انى منعزل عن العالم الخارجى تماما و الحمد لله.
23- الكونسول بتاع العربية شيك شيك شيك (من وجهة نظرى)
24- احساس بالفخامة (و الحمد لله) ينتابنى طول مانا سايق العربية.
25- تيل الفرامل خلص منى على 19000 تقريبا و غيرته من جارى و حبيبى أشرف منصور صاححب محلات أولاد منصور بالجيزة ( امام بيت والدتى).
26- صوت السى دى بتاع العربية تحفة تحفة تحفة و الحمد لله و عمرو دياب عامل شغل حلو قوى معايا .

و دى كانت حكايتى مع بيرسونتى حبيبتى و تقييمى المتواضع ليها و ان شاء الله متواصل معاكوا فى اي جديد و جاهو لاي استفسارات

اسف جدا انى طولت عليكوا و اسف انى اتاخرت عليكوا فى الجزء التانى
أتمنى ان الموضوع يعجبكوا و ماكنش عضو تقيل عليكوا
و السلام عليكم و رحمة الله و بركاته