أفكار لسيارتك ....... تكسب بها حسنات
بدون تطويل
كل واحد عنده عدّادين غير عداد السرعة والـRPM
عداد للحسنات وعداد آخر للسيئات
السؤال هنا !!
مادام عداد السيئات عندنا شغال بسرعة وذنوبنا كثيرة وفي المقابل لا نفعل الطاعات التي تغطي معدل السيئات لأننا دائما ما نشتكي أن الطاعات كقيام الليل والصدقات و.....و... أنها ثقيلة على النفس وتحتاج مجاهدة , فلماذا لا نبحث عن طاعات وحسنات سهلة المنال وعظيمة الأجر ؟
سيقول لي أحدهم : يعني انت اللي هاتجيب التايهة ؟!!
أرد عليه : لو ذنوبك مثل ذنوبي ستفكر ليل نهار كيف تتخلص منها , ولهذا أنا فكرت وأريدك أن تفكر معي
أولا : ســيــارتــــك
- وصلة البطارية : اشتري وصلة بطارية بعشرين جنيه وخليها في العربية , منها تنفعك لو بطريتك فضيت ومنها تساعد بيها واحد غلبان عربيته وقفت وتعطلت مصالحه وهنيئا لك دعوات الرجل
- كومبريسور هواء : حجمه صغير وثمنه رخيص ولن تعرف قيمته إلا لما تاخدلك مسمارين محترمين في عجلتين أو أكثر-لا قدر الله- وساعتها الاستبن الاحتياطي لن يحل الأزمة , أما الكومبريسور سيحل الموضوع في عشر دقائق تنفخ الإطارات وتذهب بالسيارة لأي مكان لإصلاح الكاوتش
وتخيل لو وجدت واحد واقف على جنب الطريق أو على الصحراوي وحصل فيه الموقف ده وانت ساعدته ونفختله الكاوتش !! متهيألي هايديلك العربية هدية ويركب تاكسي :)
- خذ أي حد في سكتك : اأقصد خذه في سكتك يعني تركبه معاك وتوصله في سكتك مش تاخده على الكبوت :)
الموضوع ده عن تجربة شخصية لا تتخيل مدى تأثيره في الناس , كان عندي عربية كيا عصفورة وكنت ساعات أشوف واحد واقف على المحور منتظر أوتوبيس أو عسكري ماشي أو واقف على الدائري مثلا فكنت أقف وأقول له : -انت رايح فين؟ -الحتة الفلانية -اركب هاوصلك أقرب مكان ...... والله الناس ماكانوش بيصدقوا نفسهم....... ويقعد يدعيلي طول السكة ويقولي : والله الدنيا لسه بخير هو لسه في ناس كده ؟! أنا مش عارف أشكرك ازاي .
ولو حد صمم يديلك فلوس قوله : أنا وصلتك عشان آخذ من ربنا مش منك
وفي حاجة مهمة جدا والله ...... إن لو الراجل اللي انت وصلته ده اشترى عربية في يوم من الأيام هايعمل زيك ويوصل الناس زي ما انت عملت معاه عشان يشكر نعمة ربنا عليه
وطبعا ساعتها هنيئا لك الثواب المضاعف (يعني ممكن يوم القيامة تلاقي مثلا 5 مليون حسنة انت لم تفعلهم ! تسأل دول جم منين ؟!! تعرف ان دول ناس انت ساعدتهم وهما اتعلموا منك فساعدوا غيرهم وغيرهم ساعدوا غيرهم وهكذا وكل هذا في ميزانهم وميزانك انت كمان عشان انت أول واحد)
جركن بنزين 4 لتر : منه ينفعك لو عربيتك قطعت بنزين ومنه ينفع غيرك وفي كلتا الحالتين انت الكسبان
جركن ماء : عشان الردياتير , وخصوصا أصحاب العربيات الـ 128 هايدعولك للصبح (أنا كان معايا 128 وعارف)
سلك حديدي للجر : اشتريه من محلات كماليات السيارات -وثمنه عشرين جنيه- وفائدته كبيرة جدا لأن سيارتك لو وقفت تماما لأي سبب -لا قدر الله- أو غرزت منك واضطريت تقطرها فهذا السلك الحديدي أنسب شيء لأنه قوي جدا لا ينقطع , وفائدته الثانية : لو وجدت أي واحد عطلان تماما أو غارز ويحتاج أن يخرج سيارته من الغرز أو ينقلها -وحجم سيارته أصغر من سيارتك- ممكن تقطره باستخدام هذا السلك.
كشاف إضاءة يعمل على ولاعة السيارة : وهذا أيضا من محلات الكماليات وهو كشاف 12 فولت واستخداماته غنية عن التعريف
الكوريك والصليبة وعدة صغيرة : وهذا لزوم تغيير الاطارات وأعمال الميكانيكا البسيطة
شنطة اسعافات أولية صغيرة : لو مررت بحادث أو رأيت أي مصاب
هذا ما خطر ببالي واقتبسته من مواضيع متفرقة على هذا المنتدى والمنتديات الأخرى
وأرجوا من الأعضاء طرح أفكار أخرى نكسب بها حسنات وتنفعنا في الزنقات :-)